‘Oku Nyuapo Vali Kamue Evi Vi Koluisa’

ALLEN wa fetika oku nyua evi vi koluisa eci a kuata 11 kanyamo.a Eye kuenda akamba vaye va enda oku papalela vovisenge, loku setukula omanu va mola volofilme. Omanu vana va mola volofilme, havociliko, pole, ovinyua Allen a enda oku nyua lakamba vaye, viocili.

Tony, eci a fetika oku vokiya onjongo yaye yoku nyua evi koluisa, wa kuata 40 kanyamo. Kefetikilo wa enda oku nyua lika okopo yimosi ale vivali koñolosi, pole, noke, wa fetika oku nyua olokopo vitãlo ale epandu eteke leteke. Vokuenda kuotembo ka tẽlele vali oku kũlĩha olokopo a enda oku nyua veteke.

Allen wa sandiliya ekuatiso oco a siepo ocitangi caye cuholua. Pole, Tony ka tavele oku kuatisiwa lepata liaye kuenda akamba. Cilo, Allen o kasi lomuenyo kuenda o lombolola ulandu waye. Kanyamo a pita, Tony wa tusuiwa lekãlu omo liuholua, kuenje wa fa.

Ndaño okuti omunu o nyuila calua pokolika, olonjanja vimue uholua waye u kokela omanu valua ovitangi.b Uholua wa siata oku vetiya omanu oku popia olondaka vĩvi, oku sanda ovama, oku nyana, oku ponda, oku litusula lakãlu, oku kuata ovitangi kovopange, kuenda oku kuatiwa lovovei. Unyamo lunyamo, kua siata oku pesiwa olombongo vialua omo liovitangi vi tunda kuholua. Handi vali, uholua wa siatavo oku nyõla olondunge viomunu, etimba, epata, kuenda oku nena ovitangi vikuavo komãla.

Ocisoko Cupange Wuhayele kofeka yo Estados Unidos, ca popia hati: “Omanu vana va nyua evi vi koluisa, havosiko okuti oloholua. Handi vali, vana okuti oloholua, havosiko va nyua eteke leteke.” Omanu vana okuti haloholuako, olonjanja vimue ka va siatele oku limbuka ndomo utima wavo u fetika oku tekela lika kovinyua vi koluisa. Vakuavo, vanyua lika olonjanja vimue, pole, eci va nyua va pitahãla olokopo vitãlo.

Nda wa nõlapo oku nyua, o pondola ndati oku kũlĩha onjongo yove? O kũlĩha ndati okuti ku sukila vali ‘oku nyua ovinyua vi koluisa’? (Olosapo 23:29, 30) Ovipama vi kuãimo vi ka lekisa olonumbi viatiamẽla kondaka eyi.

[Atosi pombuelo yemela]