Kuatisa Omãla Oco va Kũlĩhe Ocisoko ca Yehova
OMÃLA va sole oku longisiwa. Kũlĩhĩsi apulilo a lingiwa lomãla a va Isareli eci va kala Kegito, vuteke kua lingiwa o Paskoa yatete. Ovo va pula ndoco: ‘Momo lie omeme ya sukilile oku fa?’ ‘Momo lie Isia a kapela osonde vocikuli cepito?’ ‘Pi tu kasi oku enda?’ Apulilo aco, a eca uvangi wolonumbi Yehova a ecele kolonjali va Isareli. Yehova wa va sapuila ovina va sukilile oku linga ko Paskoa yikuavo va kala oku lavoka poku popia hati: “Eci omãla vene vo puli vati, Ociholo eci [ci] lomboloka [nye]? Ene vu kumbulula, hoti, Eci oco ocilumba co [Paskoa] ya Yehova momo wa pitãhala olonjo via va Isareli ve Egito eci a nyõla va Egito, puãi wa popela olonjo vietu.” (Etu. 12:24-27) Noke Yehova wa lekisa kolonjali via va Isareli esilivilo lioku eca atambululo komãla vavo, atiamẽla ‘kovisila kuenda koviholo’ Yehova a va handelekele.—Esin. 6:20-25.
Yehova wa yonguile okuti, omãla va sanga atambululo a suapo atiamẽla kefendelo liocili, momo a pondola oku va vetiya oku sola Yehova Suku kuenda oku limbuka okuti eye Upopeli wavo. Koloneke vilo Yehova o yongola okuti amalẽhe va kuata ovisimĩlo viaco. Onjila yimue olonjali vi pondola oku kuama oco vi vetiye omãla vavo oku sola Suku kuenda afendeli vaye, oku va kuatisa oku kũlĩha ocisoko ca Yehova, kuenda oku limbuka ndomo tua siata oku kuatisiwa locisoko caco. Omo liaco, tu konomuisi olonjila vimue vi pondola oku kuatisa amalẽhe oku kũlĩha ovina vikuavo viatiamẽla kocisoko ca Yehova.
Vekongelo wa Tiamẽli
Amalẽhe va sukila oku kũlĩha ciwa ekongelo mu kasi olonjali viavo. Oco ci tẽliwe, ene ulonjali u sukila oku ambata omãla vene poku enda kolohongele. Nda wa ci lingi, vu kuama onumbi Yehova a ecele ku va Isareli, yi popia hati: “Ongolola omanu vosi, okuti alume lakãi lomãla, . . . okuti va yevelela loku lilongisa oku sumbila Yehova, Suku yene, kuenje va panga oku tẽlisa lutate olondaka viosi viocihandeleko cilo vongolola okuti omãla vavo, ava ka va ci kũlĩhĩle, va yevelela, loku lilongisa oku sumbila Yehova, Suku yene.”—Esin. 31:12, 13.
Omãla va pondola oku lilongisa Ondaka ya Yehova tunde vutila. Upostolo Paulu wa popia eci catiamẽla ku Timoteo hati: “Tunde [vutila], wa kũlĩha ovisonehua vi kola.” (2 Tim. 3:15) Omãla valua va siata oku upa esilivilo kovipama vi lingiwa kolohongele, kuenda va likolisilako oku kũlĩha ovisungo Viusoma. Ovo va lilongisa oku tata ciwa Embimbiliya kuenda a livulu a kuavo. Kolohongele, ovo va pondola oku limbuka ocisola vamanji va likuetele pokati, momo oco ocituwa ci situlula Akristão vocili. Yesu wa popia hati: “Ndu wihi ocihandeleko cokaliye cokuti, Lisoli pokati. Ndeci ame ndo soli, haico ene, lisolivo pokati. Kokulisola kuene pokati oko omanu vosi va limbukila okuti vulondonge viange.” (Yoa. 13:34, 35) Ocisola vamanji va siata oku lekisa Vonjango Yusoma kuenda ombembua yi kasi pokati kavo, ci kuatisa omãla oku endaenda kolohongele olonjanja viosi.
Ocituwa coku pitila selo Vonjango Yusoma kuenda oku sapela la vamanji kesulilo liohongele, ci kuatisa omãla vove oku kuata akamba valua. Nda omãla vove va kuete lika ukamba lomãla vakuavo, momo lie ku va kuatisila oku linga ukamba la vamanji vana okuti akulu? Nda omãla vove va linga ukamba la vamanji akulu, va pondola oku vokiya ukũlĩhĩso wavo kuenda olondunge. Ndeci, Sakariya ufendeli wa Yehova a lingile kosimbu poku ‘longisa umalẽhe Usiya soma yo ko Yuda oku sumbila Suku,’ cimuamue haico vamanji vana va kasi oku vumba Yehova vokuenda kuanyamo alua va siata oku linga poku kuatisa amalẽhe longangu yavo yiwa. (2 Asa. 26:1, 4, 5) Nda u kasi Vonjango Yusoma, lomboluili komãla vene oco va kũlĩhe pokahondo pa sangiwa alivulu, apa pa sangiwa omakina yovileñi, kuenda ovina vikuavo.
Ocisoko ca Yehova Voluali Luosi
Omãla va sukila oku kũlĩha okuti, ekongelo vatiamẽla, li panga onepa kocisoko ca Yehova voluali luosi, ci kuete ci pitahãla 100.000 kakongelo. Va lomboluili ndomo ocisoko ca Yehova ci kasi oku talavaya, kuenda ndomo va pondola oku eca ekuatiso liavo. Lombololivo esunga lieci vu lavokaila lesanju olohongele vimbo, viofeka, kuenda epasu lia manji o nyula akongelo.—Tala pokakasia losapi hati: “Ovina tu Sukila Oku Kuama Vokuenda Kuefendelo Liepata,” kemẽla 28.
Lingi esokiyo lioku laleka akulu va nyula akongelo, olomisionaliu, vamanji vatiamẽla kepata lio Betele, kuenda vakuavo va kasi kupange wakundi votembo yosi, oco veye okulia konjo yene. Ka u ka simi okuti ka va kuete otembo yoku sapela lamalẽhe. Momo vamanji vaco, va siata oku kuama ongangu ya Yesu wa kuata ocituwa coku ecelela omãla oku iya kokuaye kuenda oku sapela lavo. (Mar. 10:13-16) Osimbu vu yevelela ovolandu avo, kuenda esanju va kuete kupange wa Yehova, ci pondola oku vetiya omãla vene oku kuata ocimãho coku litumbikavo kupange waco.
Ene alonjali nye vu sukila oku linga oco vu kuatisi omãla vene oku kũlĩha ciwa ocisoko ca Yehova? Kuami olonumbi evi: Kumue lepata, sokiyi oku lilongisa elivulu Testemunhas de Jeová—Proclamadores do Reino de Deus. Lombololi ovituwa vimue afendeli va Yehova va siata oku lekisa ndeci: Ekolelo, umbombe, kuenda esunguluko. Lekisi ndomo Yehova a siata oku kuatisa vamanji vaco oku sandeka olondaka viwa voluali luosi. Tali lomãla vene olovideo via sandekiwa locisoko ca Yehova oco u va longise ovolandu afendeli va Yehova kosimbu kuenda koloneke vilo. Nda citava, kumue lepata liene, lingi esokiyo lioku nyula o Betele vofeka yene ale kofeka yikuavo. Nda wa ci lingi, ci vetiya omãla vene oku limbuka ndomo ukuenje wa kolelua haeye wa lunguka a siata oku songola ocisoko ca Yehova palo posi, loku eca okulia kuespiritu votembo ya sokiyiwa, kuenda olonumbi vi kuatisa vamanji voluali luosi, ndeci ca enda oku lingiwa kocita catete, K.K.—Mat. 24:45-47; Ovil. 15:22-31.
Longisi Komõla Lomõla Olonumbi a Sesamẽla
Poku longisa omãla vene, sokololi onjila Yesu a kuama poku longisa ovapostolo vaye. Onjanja yimue, wa va sapuilile hati: “Lopo ñasi lovina via lua vioku popia lene, puãi [ka] vu tẽla handi oku vi yeva.” (Yoa. 16:12) Yesu poku sapela lolondonge viaye ka vi longisile ovina vialua vonjanja yimosi. Pole, wa vi longisa ovina vi kuete esilivilo vokuenda kuotembo yalua oco vi kuate elomboloko lia suapo. Cimuamue haico vu sukila oku linga poku eca olonumbi vimue komãla vene. Nda olonjanja viosi omãla vene wa va longisi ovina vitito, ci va kuatisa oku kũlĩha ciwa ocisoko ca Yehova, ci vokiya onjongole yavo, kuenda oku limbuka esanju li tunda koku kala vekongelo. Osimbu omãla va kasi oku kula, vu sukila oku pitolola ovina wa va longisi kosimbu, kuenda oku va lomboluila ovina viokaliye.
Ekongelo lia siata oku tu kuatisa oku pamisa ukamba wetu la Yehova, kuenda amalẽhe vana va kuete ombili kupange woku kunda, va pondola oku tamãlala kayonjo oluali lua Satana. (Va Rom. 12:2) Tua kolela okuti nda wa likolisiliko oku kuatisa omãla vene oku kũlĩha ciwa ocisoko ca Yehova, vu ka kuata esanju lialua. Lesumũlũho lia Suku, ovo va ka amamako lekolelo osimbu va pokola kolonumbi va tambula, kuenda va ka lekisa ocisola ku Yehova Suku yetu.
[Okakasia Lelitalatu kemẽla 28]
Ovina tu Sukila Oku Kuama Vokuenda Kuefendelo Liepata
Kũlĩhĩsi olonumbi vi kuãimo u pondola oku kuama vokuenda Kuefendelo Liepata koñolosi.
▪ Pitululi ovolandu atiamẽla kekongelo vu kasi. Otembo yipi lia sokiyiwa, kuenda ndamupi? Olonjango vipi Viusoma wa endi oku lingila olohongele? Momo lie ka vu lalekela manji umue o kasi otembo yalua vocikanjo okuti, iya konjo yene oco a tambulule apulilo aco komãla vene?
▪ Lomboluili komãla vene esilivilo lieci vekongelo mua siatela oku lingiwila olohongele via litepa ndeci: Olohongele vimbo, vilikasi, viofeka, kuenda lekisi ndomo va pondola oku kuatisiwa lolohongele viaco.
▪ Konomuisi lavo esilivilo liolosikola via litepa via sokiyiwa locisoko ca Yehova. Va lomboluili asumũlũho vamanji va pita kolosikola viaco va siata oku tambula.
▪ Vetiyi amalẽhe oco va kale vakuambili kupange woku kunda olondaka viwa. Va kuatisi oku limbuka esilivilo lioku eca orelatoriu yavo oco yi kongeliwe kulandu wupange woluali luosi wa siata oku moleha vo Anuário das Testemunhas de Jeová.
▪ Konomuisi lavo catiamẽla kovimãho via litepa amalẽhe va pondola oku kuata vocisoko ca Yehova. Ocipama 10 celivulu Organizados Para Fazer a Vontade de Jeová, ceca olonumbi viatiamẽla kovimãho viaco.
▪ Kuatisi amalẽhe oku kuata elomboloko lieci vamanji va sukilila oku kuama olonumbi via tumbikiwa vekongelo. Va lomboluili esunga lieci va sukilila oku pokola kolonumbi viocisoko ca Yehova ndaño kovina vitito. Lekisi kokuavo ndomo va pondola oku kuatisa koku endisa ciwa ekongelo, poku pokola kolonumbi viakulu vekongelo.
[Elitalatu]
Omãla vene va pondola oku kuatisiwa calua nda wa va vetiyi oku kuata ukamba la vamanji va kasi kupange wotembo yosi vokuenda kuanyamo a lua
[Elitalatu kemẽla 26]
Olonjali vi sukila oku likolisilako oku eca atambululo a suapo komãla vavo catiamẽla kocisoko ca Yehova, ndeci va Isareli va enda oku linga