Kuata Ukamba La Suku

‘Eye, Eye Suku Yava va Kasi Lomuenyo’

Anga hẽ olofa vi kuete unene okuti Suku ci sule? Sio, ka vi kuete! Olofa, pamue “unyãli” umue ukuavo, vi pondola oku kuata ndati unene walua, okuti “Suku Tõlo” ci sule? (1 Va Korindo 15:26; Etundilo 6:3) Suku o kuete unene woku pindula omanu va fa, oco va kale voluali luokaliye palo posi.a Tu kolela ndati kohuminyo yaco? Suku kumue lomõlaye Yesu, va tu sapuila ovina vi tu kuatisa oku kuata elavoko kutima.—Tanga Mateo 22:31, 32.

Poku sapela la va Sandukeo vana ka va tavele kepinduko, Yesu wa va sapuila hati: ‘Kondaka yepinduko liava va fa, ka wa tangeli hẽ eci Suku a popia lene hati, Ame Suku ya Avirahama, haime ndi Suku ya Isake, haime ndi Suku ya Yakoba? Suku hayeko Suku yava va fa, te yava va kasi lomuenyo.’ Yesu wa tukula ombangulo Suku a kuata la Mose vocisapa ca kala oku taima kunyamo wo 1514 O.Y.K. (Etundilo 3:1-6) Ndomo Yesu a ci popia, Yehova wa sapuila Mose hati: ‘Ame Suku ya Avirahama la Isake kuenda Yakoba’ poku lekisa okuti ohuminyo ya tiamẽla kepinduko yi ka tẽlisiwa muẽle. Ndamupi?

Tete, tu konomuisi olondaka viulandu waco. Eci Yehova a vangula la Mose, pa pitile ale otembo yalua tunde eci va kukululu vaye va fa,—okuti ku Avirahama, pa pitile 329 kanyamo, Isake 224, kuenda Yakoba pa pitile 197 kanyamo. Ocili okuiti, Yehova wa popia hati, “Ame.” Ka popele hati nda “kaile” Suku yavo. Yehova wa sapuila Mose hati, vakukululu vaye vana va fa va kala oku amamako lomuenyo. Momo lie?

Yesu wa popia hati: ‘Yehova hayeko Suku yava va fa, te yava va kasi lomuenyo.’ Sokolola ciwa vepuluvi olondaka viaco via popiwa. Nda okuti ka kua kaile epinduko, Avirahama, Isake, la Yakoba nda va kala kolofa otembo ka yi pui. Nda ka kua kaile epinduko, Yehova nda wa linga Suku yava va fa. Eci nda ca lekisa okuti olofa vi kuete vali ongusu okuti, Yehova ci sule, kuenje nda ka kuatele unene woku yovola kolofa afendeli vaye vo kolela.

Nye tu pondola oku popia ca tiamẽla ku Avirahama, Isake, Yakoba kuenda afendeli vosi va Yehova vana va fa? Yesu wa tukula olondaka vimue vi kuete unene poku popia hati: “Vosi yavo va kasi lomuenyo.” (Luka 20:38, NW.) Omo ocipango ca Yehova coku pindula afendeli vaye vo kolela ci ka tẽlisiwa muẽle, Yesu wa va tendele ndu okuti va kasi komuenyo. (Va Roma 4:16, 17) Yehova o yongola okuti vosi va kasi vovisimĩlo viaye o ka va pindula oco va kuate vali omuenyo.

Onjongole ya Yehova yoku pindula vana va fa, ka yi lekisa hẽ ocisola a ku kuetele? Ivaluka okuti, Yehova lunene waye o ka pindula omanu va fa. Lacimue ci pondola oku tateka Suku oku tẽlisa ohuminyo yaye yoku pindula vana va fa. Momo lie ku lilongisila vali ovina vikuavo viatiamẽla kohuminyo yepinduko kuenda ku Suku una o ka tẽlisa ohuminyo yaco? Poku ci linga, o ka kuata ukamba la Yehova, ‘Suku yava va kasi lomuenyo.’ ▪

OLONUMBI VIOKU TANGA EMBIMBILIYA KOSÃI YA KAYOVO

Mateo 22–Marko 8

[Atosi pombuelo yamẽla]

[Etosi lia velapo kemẽla 7]

Yehova o kuete unene ka u pui okuti olofa ci sule