EMBIMBILIYA LI PONGOLOLA OMUENYO WOMANU
“Ovo va yonguile okuti ndi seteka oco ndi limbuke ocili”
Ulandu wa lomboluiwA la Luis Alifonso
UNYAMO A CITIWA: 1982
KOFEKA A CITIWILA: REPUBLICA DOMINICANA
ULANDU WOMUENYO: WA KULILA VETAVO LIO MORMON
OMUENYO WANGE KOSIMBU: Nda citiwila volupale luo Santo Domingo, ko Republica Dominicana, ame ndimõla wa kuãla. Olonjali vietu via tu pindisa tunde vutila kuenda tua kuata ekalo liwa. Eci nda tẽlisa anyamo akuãla, olonjali viange via kũlĩha omisionaliu yimue yetavo lio Mormon. Omo okuti olonjali viange via komõhele ndomo akuenje va enda oku wala ciwa loku liposuisa, via nõlapo okuti etu tu kala epata liatete li tiamẽla ketavo lia Yesu Kristu Liolosandu vio Koloneke via Sulako okuti Etavo lio Mormon.
Osimbu nda kala oku kula, nda solaile calua oku linga upange wetavo kuenda epata lietu lia velisilepo oku kuata ovituwa viwa. Nda solele etavo lio Mormon kuenda nda yonguile oku kala omisionaliu.
Eci nda tẽlisa 18 kanyamo, epata liange lia ilukila ko Estados Unidos oco ndi tangele kosikola ya velapo. Noke yunyamo umosi, pahãyi la inanu yange okuti va kala Olombangi Via Yehova, veyile oku tu nyũla volupale luo Florida. Ovo va tu laleka oku enda kumue lavo kohongele yimue. Nda komõha calua poku mola ndomo omanu vosi va kala ponele yange va kuama oku tangiwa Kuembimbiliya loku soneha atosi a velapo. Kuenje, nda pinga ocitayo lopapelo kuenda nda fetikavo oku soneha.
Noke yohongele yaco, pahãyi la inanu yange va ndi sapuila okuti, omo ndi yongola oku kala omisionaliu va ka ndi kuatisa oku lilongisa ovina vimue viatiamẽla Kembimbiliya. Kuenje, nda tava kocisimĩlo caco momo vokuenda kuotembo nda limbuka okuti ovina vimue vi sangiwa Velivulu lio Mormon ka vi likuata lovina vi sangiwa Vembimbiliya.
NDOMO EMBIMBILIYA LIA PONGOLOLA OMUENYO WANGE: Osimbu tua kala oku lilongisa Embimbiliya votelefone, pahãyi la inanu yange, va ndi vetiya oku sokisa ovina nda kolelele, levi nda kala oku lilongisa Vembimbiliya. Ovo va yonguile okuti ndi seteka oco ndi limbuke ocili.
Kua kala ovina vialua nda kolelele viatiamẽla kalongiso etavo lio Mormon, pole, sia kuatele ekolelo nda ovina viaco vi li kuata Lovisonehua. Keteke 8 ya Kuvala, kunyamo wo 1995, pahãyi yange wa nyĩha o Despertai! yimue mu sangiwa ovipama vi lombolola ovina viatiamẽla kalongiso etavo lio Mormon. Nda komõha calua poku limbuka okuti, sia kũlĩhĩle ciwa alongisa amue etavo lio Mormon. Kuenje, ca ndi vetiya oku sandiliya vo Internet onumbi Yetavo lio Mormon oco ndi tale nda ovina via tukuiwa vo Despertai! viocili muẽle. Ndeya oku ci limbuka ciwa eci nda endele oku nyũla onjo yoku soleka ovina vio kosimbu volupale luo Utah, muna nda sanga ovolandu a tiamẽla kalongiso etavo lio Mormon.
Nda tavele okuti Velivulu lio Mormon mu sangiwa alongiso Embimbiliya. Pole, eci nda fetika oku tanga Embimbiliya lutate, nda limbuka okuti, alongiso etavo lio Mormon, ka a kuete elitokeko lovina vi sangiwa Vembimbiliya. Embimbiliya kelivulu lia Esekiele ocipama 18:4, ku popia hati, ovimuenyo viosi vi fa. Pole, Velivulu lio Mormon li tukuiwa hati, Alma (Ocilelembia) kocipama 42:9, ku popia hati: “Ocilelembia ka ci fi.”
Handi vali, omo etavo lio Mormon lia enda oku longisa ovina vimue ka via sungulukile loku vetiya omanu oku sivaya ofeka. Etavo lio Mormon li longisa okuti, Ocumbo Cedene ca kala ocipepi Lolupale luo Jackson Missouri, kofeka yo Estados Unidos. Ovaprofeto vetavo liaco, va siata oku popia vati: “Eci Usoma wa Suku u fetika oku viala, epandela lio ko Estados Unidos, olio li ka kala kolonepa viosi violuali.”
Nda komõha calua ndomo elongiso lietavo lio Mormon lia lisanduila kolofeka vikuavo, ndeci ofeka nda citiwila. Kuenje, eteke limue koñolosi, eci ukuenje umue wa kala oku pindisiwa oco a linge omisinaliu yo Mormon a ndi vilikiya votelefone, nda fetika oku sapela laye ca tiamẽla ketavo liaco. Noke ndo pulisa lutate nda eci vofeka yavo muiya uyaki o pondola oku yaka la vakuetavo lio Mormon. Eci a ndi tambulula okuti, o yaka nda komõha calua! Nda tiamisilile calua utima wange vetavo liaco kuenda nda enda oku pulisa asongui Vetavo lio Mormon ovina vialua. Pole, va ndi sapuila okuti, atambululo kapulilo ange, a kasi ndelumbu limue lia tatama okuti, eteke limue li ka situluiwa osimbu ocinyi ca amamako oku tua.
Omo sia solele elomboluilo liavo, nda fetika oku sokolola ekalo liange muẽle, kuenda kesunga lieci nda yonguilile oku kala omisionaliu yetavo lio Mormon. Nda limbuka okuti, esunga lieci nda yonguilile oku kala omisionaliu, oku linga upange woku kuatisa omanu. Ocina cikuavo ca ndi vetiyile oku kala omisionaliu, onjongole yoku kuata ekemãlo. Pole, osimbu nda kala oku amamako oku tinduka ku Suku, sia yonguile vali oku kũlĩha ovina viatiamãla kokuaye. Ndaño okuti nda enda oku tanga Embimbiliya vokuenda kuotembo yimue, sia litendele vali ndocina cimue ci kuete esilivilo. Sia kũlĩhĩle ocipango ca Suku ca tiamẽla palo posi kuenda komanu.
NDOMO NDA KUATISIWA: Vimue pokati kovina nda kũlĩha osimbu Olombangi Via Yehova via ndi longisa Embimbiliya, vievi: Onduko ya Suku, ceci ci pita lomanu va fa, kuenda ocikele ca Yesu vocipango ca Suku. Vokuenda kuotembo, nda fetika oku kũlĩha ovina vialua vi sangiwa Vembimbiliya, vi komõhisa kuenda nda yonguile oku sapuilakovo omanu ovina nda kala oku lilongisa. Nda kũlĩhĩle ale okuti, kuli Suku pole, kaliye ndi pondola oku vangula laye volohutililo momo wa linga Ekamba liange lia velapo. Keteke 12, Yevambi Linene kunyamo wo 2004, nda papatisiwa kuenje, nda linga Ombongi ya Yehova. Noke yolosãi epandu nda iñila kupange wotembo yosi.
Tunde eci nda fetika oku talavaya Kombala Yolombangi Via Yehova Voluali luosi, ko Brooklyn Nova Yorke, pa pita ale ci soka anyamo atãlo. Ndi sole calua oku kuatisa kupange woku panga alivulu Lambimbiliya, ana a kuatisa omanu valua kolonepa viosi violuali, kuenda ndi ka amamako oku kuatisa omanu oku lilongisa ovina viatiamẽla ku Suku.
[Elitalato kemela 8]
[Elitalato kemela 9]