APULILO EMBIMBILIYA A TAMBULUIWA

Eliapu lia tunda pi?

Suku hayeko wa lulika Eliapu. Pole, Suku wa lulika ungelo una wa lilingisa eye muẽle Eliapu, lia kũlĩhĩwavo okuti, Satana. Yesu wa popia hati, vokuenda kuotembo yimue Eliapu lia kala vocili kuenda ka lia kuatele eko. Kefetikilo Eliapu lia kala ungelo umue wa sunguluka haeye omõla a Suku.—Yoano 8:44.

Ndamupi ungelo umue a lilingisa Eliapu?

Ungelo una wa lilingisa Eliapu, wa ñualelapo Suku kuenda wa vetiya olohueli viatete oku likongela kusuanji waye. Ocili okuti, eye muẽle wa lilingisa Satana, ci lomboloka okuti “Unyãli.”—Tanga Efetikilo 3:1-5; Esituluilo 12:9.

Ndeci ovangelo kuenda omanu vosi va lulikiwa la Suku va kuete elianjo lioku nõla eci va yongola oku linga, Eliapu laliavo lia kuata elianjo lioku linga eci ciwa, ale oku linga eci cĩvi. Pole, lia yonguile yoku fendeliwa. Onjongole yoku kuata ekemãlo ya livokiya calua okuti, oku sanjuisa Suku ci sule.—Tanga Mateo 4:8, 9; Tiago 1:13, 14.

Ndamupi Eliapu lia kuata onjongole yoku amamako oku yapuisa omanu? Anga hẽ ove o kuete usumba Leliapu? O pondola oku sanga atambululo kapulilo aco Vembimbiliya.