Tu Eya Ndati Komuenyo?

Elivulu Liefetikilo, olio liatete Vembimbiliya okuti, li lombolola ndomo ovina via lulikiwa poku popia hati: “Poku fetika Suku wa sovola ilu losi.” (Efetikilo 1:1) Suku noke yoku lulika ovikũla kuenda ovinyama, wa lulikavo omanu vatete, Adama la Heva. Ovo va litepele lovinyama momo va kuatele epondolo lioku setukula ovituwa via Suku oku kongelamo elianjo lioku nõla eci va yongola oku linga. Ovo va kuatele ocikele coku kũlĩhĩsa o vilinga viavo. Nda va pokuile kolonumbi via Suku, nda va tẽlisa ocipango ca Suku coku kala olonjali viatete voluali, vekalo limue liombembua kuenda oku kuata omuenyo walipua otembo ka yi pui palo posi.

Pole, ungelo umue oco a tẽlise onjongole yaye yĩvi, wa yapuisa omanu. Eye wa linga Satana, ci lomboloka “Unyali.” Satana poku vanguila vonyoha, wa yapuisa Heva poku u sapuila hati, o pondola oku kala ciwa nda wa liwekapo oku pokola kolonumbi via Suku. Adama la Heva va nyõla ukamba va kuatele Lululiki wavo poku kuama Satana. Omo lionjila yĩvi va nõla, olonjali vietu viatete via pumba omuenyo uwa va kuatele loku piñala ekandu, ekambo lioku lipua kuenda olofa.

Kuenje, Suku wa lekisa onjongole yaye yoku pongolola ekalo liaco kuenda oku eca kocitumbulukila ca Adama epuluvi lioku kuata omuenyo ko pui. Suku wa popele okuti “ombuto,” omunu umue o li kasi, o nyõla Satana kuenda oku mãlako ohali Satana, Adama kuenda Heva va koka. (Efetikilo 3:15) “Ombuto” yaco helie? Oyo ya situluiwa vokuenda kuotembo.

Kotembo yaco, Satana wa seteka oku nyõla ocipango ciwa ca Suku. Ekandu kuenda evĩho via li sandula lonjanga. Suku wa sokiya oku nyõla olondingaĩvi letande. Eye wa sapuila Noha ukuesunga oco a tunge ocimbaluku, okuti eye kumue lepata liaye kuenda ovinyama, va iñilamo oco va popeliwe.

Noke yunyamo umosi tunde eci Etande liafetika, Noha kumue lepata liaye va tunda vocimbaluku, kuenje va sanga okuti ongongo yayela. Pole, “ombuto” ya likuminyiwa ka ya molehele handi.

—Ulandu wopiwa kelivulu Liefetikilo 1-11; Yuda 6, 14, 15; Esituluilo 12:9.