Eliangiliyo Lia Suku Lioku Yovola Omanu

Suku wa likuminyile ku Avirahama okuti “ombuto” yi keyilila kocitumbulukila caye. Omanu “vo kolofeka viosi” va pondola oku sumũlũisiwa lekuatiso liaye. (Efetikilo 22:18) Yakoba onekulu ya Avirahama, noke wa ilukila Kegito, kuna epata liaye liafetika oku livokiya kuenje lia linga epata lia va Isareli.

Osimbu va kala Kegito Fareo umue okuti wa kala ongangala, wa lingisa va Isareli apika kuenje Suku watuma uprofeto Mose wa songuila va Isareli eci va tunda vofeka poku tepa ovava o Kalunga Kakusuka. Suku wa eca ovihandeleko ku va Isareli mua kongelele Ekũi Liovihandeleko oco vi va songuile kuenda oku va teyuila. Ovihandeleko viaco vi tukula ovilumba omunu a sukilile oku eca oco a tambule ongecelo yakandu. Lekuatiso lia Suku, Mose wa sapuila va Isareli okuti, Suku o ka va tumisa uprofeto ukuavo. Uprofeto waco, “ombuto” ya likuminyiwile.

Ci pitãhala 400 kanyamo, Suku wa sapuilile Soma Daviti okuti, “ombuto ya likuminyiwile vocumbo Cedene yi ka viala otembo ka yi pui. Ombuto yaco Mesiya, onjovoli okuti, eye wa nõliwa la Suku oco a popele omanu kuenda oku tumbulula Ocumbo ceposo palo posi.

Suku wa situlula ovina vialua viatiamẽla ku Mesiya, vonduko ya Daviti kuenda ovaprofeto vakuavo. Ovo va popele okuti, eye o ka kala embombe, ukuahenda, vuviali waye ka mu ka kala onjala, ekambo liesunga kuenda uyaki. Pokati komanu kuenda ovinyama pa ka kala ombembua. Uveyi, ohali, olofa, omo okuti ka via pangele onepa kocipango ca Suku, ka vi ka kalako vali, kuenda omanu va fa va ka pinduiwa.

Vonduko yuprofeto Mika, Suku wa popele hati, Mesiya o ka citiwila ko Beteleme. Noke, uprofeto Daniele wa popiavo hati, Mesiya o ka pondiwa. Pole, Suku U pindula kolofa loku u vialeka komangu Yusoma kilu. Daniele wa popelevo hati, Usoma wa Mesiya u ka kala otembo ka yi pui, kuenda u ka piñainya ovosoma osi. Anga hẽ, Mesiya wa mõleha ndomo ca popiwile?

—Ulandu wopiwa kelivulu Liefetikilo ovipama 22-50,Etundilo, Esinumũilo, 2 Samuele, Osamo, Isaya, Daniele, Mika, kuenda Sakariya 9:9.