Yesu Kristu tu Pondola Ndati oku Wivaluka?

Kosãi ya Cembanima omanu valua voluali luosi va mola oviluvialuvia via Yesu eci a kala oñaña. Eye o kasi vocimanga vakapale okulia oco ovinyama vilie. Anga hẽ, tu ivaluka lika Yesu ndoñaña?—a Tu kũlĩhisi onjila ya velapo yoku wivaluka. Tu pondola oku li longisa esanju angombo va kuata, osimbu va kala oku lava olomeme luteke vusenge ocipepi lo Beteleme.

Ungelo umue wa moleha kangombo. Eye wa va sapuila hati: “Etaili vimbo lia Daviti muo citilui Upopeli, eye Kristu Ñala.” Ungelo wa va sapuilavo okuti va ka sanga Yesu wa ‘muñiwa ponanga, wa pekela vocililo colongombe.’ Noke kua moleha o vangelo valua kuenda va fetika oku “sivaya Suku.”

Nda wa kala ndati poku yeva ovangelo va sivaya Suku?— Angombo va sanjuka loku popia ndoco! “Tu endi ko Beteleme, tu ka tali eci ca pitako.” Va sanga “Maria la Yosefe kuenda oñaña ya pekela vocililo colongombe.”

Omanu vakuavo veyavo ko Beteleme kuna kua kala Maria la Yosefe. Eci angombo va va lomboluila ovina va pita lavio, vosi yavo va komõha. Ove hẽ, o yeva esanju poku kũlĩha ovina viaco vi komõhisa?— Vosi yetu tu sole Suku, tua sanjuka. Kaliye tu kũlĩhisi esunga lieci oku citiwa kua Yesu ku nenela esanju lialua. Oco tu limbuke esunga liaco tu sukila oku sokolola ovina via pita osimbu Maria ka kuelele.

Eteke limue ungelo umue otukuiwa hati Gabrieli, wa nyula Maria. Eye wa sapuila Maria okuti oka cita oñaña, “eye o linga unene, o tukuiwa hati Mõla a Tõlo.” Gabrieli wa vokiyako hati, “o viala ño-o hũ, kuenje usoma waye ko sulila.”

Maria wa yonguile oku kũlĩha ndomo ovina ­viaco vi ka pita momo eye lalimue eteke a li pekelele lulume. Gabrieli wo lomboluila ndomo ovina via laikele oku pita: “Unene wa Tõlo u ku tuvika. Oco omõla o citiwa o tukuiwa o kola, Eye Mõla a Suku.” Suku poku upa omuenyo womõlaye kilu loku u kapa vimo lia Maria oco a citiwe ndoñaña, ca kala ocina cimue ci komõhisa!

Wa muile ale oviluvialuvia vi lekisa “olonoño vitatu” via nyula Yesu kuenda angombo?— Oviluvialuvia viaco via siata oku lekisiwa calua po Natale. Pole, ulandu waco hawociliko. Alume vaco va kala “vakuakutãha olombungululu,” va lingaile ovina vi pisiwa la Suku. Kũlĩhisa esanju va kuata eci va pitĩla. Embimbiliya li popia ndoco: “Poku iñila vonjo, va mola okamõla kaco kumue la Maria inako.” Otembo yaco Yesu ka kaile vali oñaña ya pekela vocimanga, eye wa kulile ale kuenda wa kala la Yosefe kuenda Maria konjo!

Vakuakutãha olombungululu va sanga ndati Yesu?— Poku songuiwa lolumbungululu lumue, ka va endele toke ko Beteleme pole, va enda toke ku Soma Herode ko Yerusalãi. Embimbiliya li lekisa okuti Herode wa yonguile oku sanga Yesu oco o ponde. Kaliye sokolola ndoco. Helie o sima okuti eye wa tuma olumbungululu oco u songuile vakuakutãha olombungululu ku Herode?— Ha Yehova ko Suku yocili, pole unyãli waye Satana Eliapu!

Koloneke vilo, Satana o vetiya omanu oku sima okuti Yesu handi, oñaña yi sukila ekuatiso. Pole, ungelo Gabrieli wa sapuila Maria hati: “O viala ño-o hũ, . . . kuenje usoma waye ko sulila.” Cilo Yesu o kasi oku viala ndosoma kilu, kuenda eye o ka lundula ovanyali vosi va Suku. Eci oco tu sukila oku ivaluka catiamẽla ku Yesu, kuenda ocikele cetu coku sapuila vakuetu ulandu waco.