Momo Lie tu Kapelako Usoma wa Suku?

Omanu valua voluali va tiamisila elavoko liavo Kusoma wa Suku. Ovo va kuãi ongangu ya Yesu, wa longisa olondonge viaye oku likutilila hati: “Usoma wove wiye. Ocipango cove ci lingiwe posi.”​—Mateo 6:10.

Osimbu omanu valua va kapako Usoma wa Suku, onepa yalua yatavo ka va kapeleko Usoma waco. Ulume umue ukuasapulo o tukuiwa hati . . . H. G. Wells wa lombolola okuti Yesu wa kapeleko calua elongiso lina a tukula hati . . . Usoma wo Kilu, pole elongiso liaco “ka lia kapiwileko latavo ana a litukula hati, Akristão.”

Ca litepa latavo aco ceci okuti, Olombangi Via Yehova via kapako Usoma wa Suku. Kũlĩhisa ndoco: O revista yilo o kasi oku tanga, ya pongoluiwa ale kueci ci soka 220 kalimi. Kuopiwa eci ci panda 46 kolohuluwa violokopia. Omo liaco, o revista yilo oyo yi kasi oku tangiwa vali calua voluali. Esapulo lipi lia velapo li sangiwa vo revista yaco? Kũlĩhisa osapi yayo yi popia hati: Utala Wondavululi Wusapula Usoma wa Yehovaa

Momo lie Olombangi Via Yehova vi likolisilako oku sapula Usoma wa Suku? Etu tu ci linga omo tua kolela okuti Usoma wa Suku owo esapulo li sangiwa velivulu lia velapo voluali okuti, Embimbiliya. Handi vali, tua kolela okuti Usoma wa Suku owo lika u ka potolola ovitangi omanu va kasi oku liyaka lavio koloneke vilo.

Olombangi Via Yehova poku pitisa kovaso Usoma wa Suku, vi kasi oku likolisilako oku kuama ongangu ya Yesu. Eci eye a kala palo posi, omuenyo waye kuenda upange waye woku kunda, wa tiamẽlele lika Kusoma wa Suku. (Luka 4:43) Momo lie Usoma wa kuatelele esilivilo lialua ku Yesu? Kuenda u lomboloka nye kokuove? Tu ku laleka oco o kũlĩhise a tambululo Embimbiliya ndomo a lomboluiwa vocipama ci kuãimo.