OSAPI YO KOÑOÑO | USOMA WA SUKU—U LOMBOLOKA NYE KOKUOVE?

**Usoma wa Suku—U Lomboloka Nye Kokuove?**

Ndomo wa ci kũlihisa vovipama via pita, Usoma wa Suku u kuete elomboloko linene Kolombangi Via Yehova. O ka komoha poku mõla amue pokati kasumulũho Usoma wa Suku u ka nena kovaso yoloneke. Citava okuti o komohavo nda olohumiyo viaco viwa kuenda viocili.

O pondola oku lekisa olondunge poku yuvula oku tava ovina viosi o yeva. (Olosapo 14:15) Utate o lekisa citava okuti u sokisiwa lowu va Bereya va lekisa kosimbu.a Onjanja yatete va va kundila olondaka viwa Viusoma, va Bereya va tava kueci va yeva pole, ka va ci lingile omo va yonguile oku kũlĩha ocili. Noke ovo va konomuisa lutate Ovisonehua oco va “kũlĩhise nda hẽ ovina viaco viocili nda ndati.” (Ovilinga 17:11) Eci ci lekisa okuti va Bereya va sokisa olondaka viwa va yeva leci Ovisonehua vi popia. Vokuenda kuotembo, va limbuka okuti olondaka viwa via kunamẽla Kondaka ya Suku.

Olombangi Via Yehova vi ku laleka oku linga ndeci va Bereya va linga. Lekuatiso liesokiyo lietu liocali lioku lilongisa Embimbiliya, tu ĩha epuluvi lioku sokisa ovina Olombangi Via Yehova vi tava viatiamẽla Kusoma wa Suku leci Embimbiliya li longisa.

Velilongiso liove liatiamẽla Kusoma wa Suku, Embimbiliya li pondola oku ku kuatisa oku sanga atambululo apulilo amue atiamẽla komuenyo a kuete esilivilo lia velapo.

Pi tua tunda?
Ci pi ocimãho comuenyo?
Momo lie Suku a ecelela ohali?
Nye ci pita letu eci tu fa?
Ongongo yi ka nyõliwa?
Nye ci kuatisa apata oku kuata esanju?

Oku lilongisa Embimbiliya ku ka ku kuatisa oku ‘amẽla ku Suku.’ (Tiago 4:8) Poku amẽla ku Suku o ka limbuka okuti Usoma wa Suku ocina cimue ciwa kokuove—haciloko ño pole otembo ka yi pui. Yesu poku litukula eye muẽle, wa likutilila ku Isiaye hati: “Omuenyo ko pui wowu, oku ku kũlĩha, ove lika vu Suku yocili, loku kũlĩhavo Yesu Kristu, u wa tuma.”—Yoano 17:3.

Olombangi Via Yehova vi pondola oku kuama elivulu eli oco va ku kuatise oku lilongisa Embimbiliya.

Nda o yongola oku lilongisa Embimbiliya ocali, pinga Kombangi yimue ya Yehova ale soneha vo www.jw.org. (Tala PINGA ELILONGISO LIEMBIMBILIYA pemẽla lia linga hati konjo)

a Bereya ya kala olupale lumue ko Makedonia yosimbu.

Esunga Lieci Usoma wa Suku u Kuetele Esilivilo Kokuaye

Umalẽhe umue okuete ekuĩ lianyamo otukuiwa hati, Folake, wa tambula ocikele coku soneha upange umue wo kosikola losapi hati: “Ocina ndi sole calua voluali lulo.” Folake wa nõlapo oku soneha esunga lieci a solele oku vangula la vakuavo catiamẽla ku Soma wa Suku.

Folake wa lombolola okuti: “Usoma wa Suku uviali umue wocili. Pole, ka u letiwe, ku pondola oku u mõla—ndaño wa u sandiliya lobinokulu!”

Folake wa soneha eci catiamẽla kasumulũho Usoma eye a lavoka okuti a ka tẽlisiwa. Eye poku tukula ovitangi vimue vi ka potoluiwa Lusoma, wa soneha ndoco: “Ndi sumua calua eci ndi mõla okuti omanu ka va kuete olonjo, kuenda omãla va fa lonjala kolonepa viosi violuali.” Eye wamisako hati: “Ndi sanjuka eci ndi tanga Isaya 65:21.” Catiamẽla komanu va ka kala vemehi liuviali Usoma wa Suku, ocinimbu caco ci lekisa ndoco: “Va [ka] tunga olonjo kuenje va kalamo; va [ka] kũla oviumbo viayuva kuenje va lia epako liavio.”

Folake wa popia hati o lavokavo otembo eci Suku, lekuatiso Liusoma waye a ka mãlako ovoveyi osi. Vulandu eye a soneha wa tukula Esituluilo 21:4, li lekisa okuti Suku o ka “puenya asuelela osi kovaso avo. Okufa ka ku kalako vali, ndaño oku lila loku liyula lupongo laviovo ka vi kalako vali.” Eye wa malusula loku popia hati, “oku vangula catiamẽla ku Yehova kuenda Kusoma waye, oco ci kuete esilivilo lia velapo kokuaye voluali lulo.” Ocili okuti Usoma wa Suku owo ocina ca velapo vutima umalẽhe ufeko!