Tu Pondola Oku Kala Otembo ka yi Pui

1. Momo lie oku sokolola kohuminyo ya Yehova yomuenyo ko pui ci tu sanjuisila?

YEHOVA wa likuminya okuti vana va pokola kokuaye va ka kuata “omuenyo ko pui.” (Va Rom. 6:23) Eci tu sokolola kocina Yehova a tu ĩha, ocisola cetu kokuaye cipama. Sokolola: Isietu wokilu o tu sole calua, okuti lalimue eteke tu ka litepa kokuaye.

2. Ohuminyo yomuenyo ko pui yi tu kuatisa ndati?

² Ohuminyo ya Suku yomuenyo ko pui yi tu kuatisa oku pandikisa kovitangi vietu. Ndaño okuti ovanyãli vetu va tu sapuila okuti va yongola oku tu ponda, etu ka tu liwekapo oku vumba Yehova. Momo lie? Momo tua kũlĩha okuti nda tua fa lekolelo lietu ku Yehova, eye o ka tu pindula lelavoko liokuti lalimue eteke tu ka fa vali. (Yoa. 5:28, 29; 1 Va Kor. 15:55-58; Va Hev. 2:15) Momo lie, tu kolelela okuti tu ka kala otembo ka yi pui? Konomuisa asunga akuãimo.

YEHOVA O KASI OTEMBO KA YI PUI

3. Momo lie tu kolelela okuti Yehova o ka tu ĩha ekalo lioku kala otembo ka yi pui? (Olosamo 102:12, 24, 27)

³ Etu tua kũlĩha okuti Yehova o ka tu ĩha ekalo lioku kala otembo ka yi pui, momo eye Ono yomuenyo kuenda eye o kasi otembo ka yi pui. (Osa. 36:9) Tala ovinimbu vimue vi lekisa okuti, Yehova otembo yosi wa kalako kuenda o kasiko. Kelivulu Liosamo 90:2 ku popia okuti, Yehova o kasi “tunde otembo ka yi pui toke otembo ka yi pui.” Kosamo 102 ku popiavo ocina cimuamue. (Tanga Olosamo 102:12, 24, 27.) Handi vali, uprofeto Havakuki wa soneha eci catiamẽla ku Isietu wokilu poku popia hati: “A Yehova ku kasi hẽ tunde otembo ka yi pui? Ove wu Suku yange o Kola kuenda ku fi.”—Hav. 1:12.

4. Tu sukila hẽ oku sakalala nda ka tu kuete elomboloko liokuti Yehova o kasiko tunde otembo ka yi pui? Ci lombolola.

⁴ O kuete hẽ atatahãi okuti Yehova o kasiko “otembo ka yi pui”? (Isa. 40:28) Omanu valua va kuetevo atatahãi aco. Elihu poku popia catiamẽla ku Suku eye hati: “Etendelo lianyamo aye ka li tẽliwa oku li tenda.” (Yovi 36:26) Pole, omo okuti ka tu kuete elomboloko liocina cimue, ka ci lomboloka okuti haciliko. Ndeci, ndaño okuti ka tu kuete elomboloko ndomo olusu yi talavaya, eci ci lomboloka hẽ okuti olusu ka yi kasiko? Sio hacoko! Cimuamue haico okuti, etu tumanu lalimue eteke tu ka kuata elomboloko lia suapo liokuti Yehova o kasiko tunde otembo ka yi pui. Pole, eci ka ci lomboloka okuti Suku ka kasi otembo ka yi pui. Omo okuti, ka tu kuete elomboloko lia suapo ka ci lekisa okuti Ululiki o kuete ongave. (Va Rom. 11:33-36) Handi vali, eye o kasiko osimbu handi oluali ka lua lulikiwile, oku kongelamo ekumbi lolombungululu. Tua kolela okuti Yehova wa “panga ongongo lunene waye.” Kuenje eye o kasiko osimbu handi ka ‘yalele ovailu.’ (Yer. 51:15; Ovil. 17:24) Lipi esunga likuavo tu kolelela okuti ci tẽliwa etu oku kala otembo ka yi pui?

YEHOVA WA TU LULIKA OCO TU KALE OTEMBO KA YI PUI

5. Elavoko lipi ohueli yatete ya kuatele?

⁵ Oviendalomuenyo viosi Yehova a lulika palo posi via ponduile oku fa, pole, omunu sio. Eye wa ecele komunu elavoko lioku kala otembo ka yi pui. Pole, Yehova wa lungula Adama okuti: “Kuti wukũlĩhĩso weci ciwa leci cĩvi ka citava okuti ove o liako, momo eteke o liako, o fa muẽle.” (Efet. 2:17) Nda okuti, Adama la Eva va pokuile ku Yehova, ovo nda ka va file. Hacivĩko oku sima okuti, Yehova wa ponduile oku ecelela okuti ovo valia ‘kuti womuenyo.’ Eci ca lombolokele okuti, ovo va ponduile oku kolela okuti va kala “lomuenyo otembo ka yi pui.”b—Efet. 3:22.

6-7. (a) Uvangi upi u lekisa okuti omanu ka va lulikiwile oco va fe? (b) Onjongole yipi o kuete? (Tala ociluvialuvia)

⁶ Ci komõhisa okuti vamue vakuakukonomuisa va popia okuti, ovovangi olonoño a lekisa okuti owoño wetu ukuete uloño woku soleka ovina vialua vokuenda kuomuenyo wetu. Kunyamo 2010 ocipama cimue casapulo ca popia okuti, owoño wetu ukuete uloño woku soleka ovina eci ci soka 2.5 kolohuluwa, okuti ci soka olohuluwa vitatu kolowola (ci likuata 300 kanyamo) viovina via ngalavaliwa Votelevisãu. Citava okuti, owoño wetu u soleka vali ovina vialua okuti eci ci sule. Omo liaco, eci ci lekisa okuti Yehova wa lulika owoño locimãho coku soleka ovina vialua okuti eci tu lilongisa vokuenda kueci ci soka 70 ale 80 kanyamo ci sule.—Osa. 90:10.

⁷ Yehova wa tu lulikavo lonjongole yoku amamako oku kala komuenyo. Embimbiliya li popia okuti, Suku wa kapa komunu “onjongole yoku kala otembo ka yi pui vutima wavo.” (Uku. 3:11) Eli olio esunga lieci tu tendela olofa ndunyãli umue. (1 Va Kor. 15:26) Nda okuti tu kasi oku vela calua, anga hẽ ka tu lingi lacimue, tu kevelela lika oku fa? Sio. Tu sandiliya ondotolo yimue oco a tu tate. Eci ci lekisa okuti, tu linga cosi ci tava oco tu yuvule olofa. Handi vali, eci omunu umue tu sole a fa, ndaño umalẽhe, ale ukulu, ka tu yevi hẽ esumuo lialua? (Yoa. 11:32, 33) Tu pondola oku amamako oku lilongisa otembo yosi kuenda tu kuete onjongole yoku kala otembo ka yi pui momo, ululiki wetu ukuacisola wa tu lulika lonjongole yaco. Ocili okuti, eye o ka citẽlisa muẽle oco tu kale otembo ka yi pui. Pole, tu kuete asunga alua oku tava okuti tu ka kala otembo ka yi pui. Kaliye, tu konomuisa eci Yehova a linga kosimbu eci eye a kasi oku linga cilo, ci lekisa okuti eye ka pongoluile ocipango caye.

OCIPANGO CA YEHOVA KA CA PONGOLOKELE

8. Kelivulu lia Isaya 55:11, ku tu longisa nye catiamẽla kocipango ca Yehova?

⁸ Ndaño okuti Adama la Eva va linga ekandu kuenda omo lielinga liaco cakokela olofa komãla vavo, Yehova ka pongoluile ocipango caye. (Tanga Isaya 55:11.) Ocipango caye handi ceci okuti omanu vakuekolelo va ka kala otembo ka yi pui. Etu tua ci kũlĩha, omo liovina Yehova apopia, levi a linga oco a tẽlise ocipango caye.

9. Nye Suku a likuminya? (Daniele 12:2, 13)

⁹ Yehova wa likuminya okuti eye o ka pindula vana va fa loku eca kokuavo epuluvi lioku kala otembo ka yi pui. (Ovil. 24:15; Tito 1:1, 2) Yovi ulume umue ukuekolelo, wa kũlĩhĩle okuti Yehova wa yonguile oku pindula vana va fa. (Yovi 14:14, 15) Uprofeto Daniele wa kũlĩhĩle okuti omanu va ponduile oku pinduiwa lepuluvi lioku kala otembo ka yi pui. (Osa. 37:29; tanga Daniele 12:2, 13.) Va Yudea vokoloneke via Yesu va kũlĩhĩlevo okuti Yehova wa laikele oku eca kafendeli vaye vakuekolelo “omuenyo ko pui.” (Luka 10:25; 18:18) Yesu olonjanja vialua wa vangula eci catiamẽla kohuminyo yaco kuenda eye muẽle wa pinduiwa la Isiaye.—Mat. 19:29; 22:31, 32; Luka 18:30; Yoa. 11:25.

10. Apinduko apita kosimbu a lekisa nye? (Tala ociluvialuvia.)

¹⁰ Yehova eye Wa Eca omuenyo kuenda o kuete unene woku nena vali omanu komuenyo. Eye wa eca unene kuprofeto Eliya oco a pindule omõla wacimbumba wo ko Sarepata. (1 Olos. 17:21-23) Lekuatiso lia Suku, Elisia wa pindula omõla wukãi wo ko Siuname. (2 Olos. 4:18-20, 34-37) Apinduko ava kuenda akuavo a lekisa okuti Yehova o kuete unene woku nene vali omanu komuenyo. Yesu osimbu a kala palo posi, wa lekisile okuti Isiaye wa ecele kokuaye unene waco. (Yoa. 11:23-25, 43, 44) Cilo, Yesu o kasi kilu kuenda kuo wĩhiwa “unene wosi wo kilu lowu wo posi.” Kuenje eye o pondola oku tẽlisa ohuminyo yokuti, “vosi va kasi vayambo” va ka pinduiwa locimãho coku amamako oku kala komuenyo otembo ka yi pui.—Mat. 28:18; Yoa. 5:25-29.

11. Ocisembi ca tẽlisa ndati ocimãho oco tu kale otembo ka yi pui?

¹¹ Momo lie Yehova ecelela okuti Omõlaye o soliwe o tala ohali toke kolofa? Yesu wa situlula esunga liaco poku popia hati: “Omo Suku a sola calua oluali, wa eca Omõlaye wongunga okuti, wosi o kolela kokuaye ka nyõliwa, pole, o kuata omuenyo ko pui.” (Yoa. 3:16) Suku poku eca Omõlaye ndocisembi oco a tu yovole kakandu etu, wa tẽlisa ocimãho oco etu tu kuate omuenyo ko pui. (Mat. 20:28) Upostolo Paulu o lombolola esilivilo yonepa eyi yocipango ca Suku eci eye a soneha hati: “Momo ndeci oku fa kueya omo liomunu umosi, epinduko liava va fa, lieyavo omo liomunu umosi. Ndeci ku Adama vosi va fa, vosi va ka muilavo omuenyo vu Kristu.”—1 Va Kor. 15:21, 22.

12. Usoma u kuatisa ndati koku tẽlisa ocipango ca Yehova kokuetu?

¹² Yesu wa longisa olondonge viaye oku likutilila oco Usoma wa Suku wiye kuenda oco ocipango ca Suku ci lingiwe palo posi. (Mat. 6:9, 10) Cimue pokati kocipango ca Suku ceci okuti, omanu va kala otembo ka yi pui palo posi. Oco ocipango caco ci tẽlisiwe, Yehova wa nõla Omõlaye oco a kale o Soma. Handi vali, Yehova wa nõla eci ci soka 144.000 komanu palo posi, oco va talavaye la Yesu koku tẽlisiwa kuocipango ca Suku.—Esit. 5:9, 10.

13. Nye Yehova a kasi oku linga cilo kuenda nye o sukila oku linga?

¹³ Cilo, Yehova o kasi oku kongela omanu okuti “owiñi wakahandangala” loku va pindisa oco va kale olonungi Viusoma waye. (Esit. 7:9, 10; Tia. 2:8) Ndaño okuti, omanu valua koloneke vilo ka va likuete omunga omo liesuvu kuenda uyaki, owiñi wakahandangala u likolisilako oku yuvula ocituwa caco. Ovo va lekisa kovilinga viavo okuti, va kasi oku tela olosipata viavo oco vi linge atemo. (Mika 4:3) Ovo ka va litengi kuyaki una wa siata oku ponda omanu valua, pole va siata oku kuatisa omanu oku sanga ‘omuenyo wocili,’ poku va longisa catiamẽla ku Suku yocili kuenda kocipango caye. (1 Tim. 6:19) Citava okuti, va lambalaliwa lepata, ale pamue va pesela olombongo omo lioku kuatisa Usoma wa Suku, pole, Yehova o va kuatisa oku kuata ovina ovo va sukila. (Mat. 6:25, 30-33; Luka 18:29, 30) Ovovangi ava, a tu ĩha ekolelo liokuti Usoma wa Suku wocili kuenda owo u ka amamako oku tẽlisa ocipango ca Yehova.

ELAVOKO LIMUE LIWA KOVASO YOLONEKE

14-15. Ohuminyo ya Yehova yoku malako olofa otembo ka yi pui, yi ka tẽlisiwa ndati?

¹⁴ Yesu cilo, Osoma Yusoma wa Suku kilu kuenda eye o ka tẽlisa olohuminyo viosi Yehova a linga. (2 Va Kor. 1:20) Tunde kunyamo 1914, Yesu o kasi oku sombisa ovanyãli vaye. (Osa. 110:1, 2) Eye kumue la vana va ka viala laye, va ka kundula ovanyãli vosi.—Esit. 6:2.

¹⁵ Vokuenda Kuviali Wohulukãi Yanyamo wa Yesu, vana va fa va ka pinduiwa kuenda omanu vakuepokolo va ka li pua. Noke lioseteko ya sulako, vana Yehova a ka sombisa ndavakuesunga “va ka piñala ilu lieve, kuenda va ka kalamo otembo ka yi pui.” (Osa. 37:10, 11, 29) Lesanju, ‘unyãli wa sulako okuti kufa’ o ka “kunduiwa.”—1 Va Kor. 15:26.

16. Esunga lipi lia velapo tu kuete lioku vumba Yehova?

¹⁶ Vocipama cilo, tua konomuisa okuti, elavoko lietu lioku kala otembo ka yi pui liakunamẽla Vondaka ya Suku. Elavoko liaco, li pondola oku tu kuatisa oku amamako lekolelo vokuenda kuoloneke vilo via sulako ndaño lovitangi. Pole, tu sukila oku linga ovina vi sanjuisa Yehova, okuti onjongole yoku kala lika komuenyo yi sule. Esunga lia velapo tu kuete lioku amamako lekolelo lietu ku Yehova kuenda ku Yesu lieli okuti, tu va sole calua. (2 Va Kor. 5:14, 15) Ocisola caco ci tu vetiya oku va setukula kuenda lesanju lialua tu sapuilako omanu vakuavo elavoko tu kuete. (Va Rom. 10:13-15) Osimbu tu lilongisa oku kala vakuakueca la vakuacali, tu kala omanu vana Yehova a yongola oco va linge akamba vaye otembo ka yi pui.—Va Hev. 13:16.

17. Ocikele cipi omunu lomunu pokati ketu a kuete? (Mateo 7:13, 14)

¹⁷ Anga hẽ tu ka kala pokati komanu vana va ka kuata omuenyo ko pui? Yehova o kasi oku tu ĩha epuluvi liaco. Omo liaco, cilo tu sukila oku nõla oku endela vonjila yi tuala komuenyo. (Tanga Mateo 7:13, 14.) Omuenyo u ka kala ndati eci tu ka kala otembo ka yi pui? Tu ka tambulula epulilo eli kocipama cikuãimo.