O Pondola Oku Kuata Ombembua Vokuenda Kuotembo Yovitangi

1. “Ombembua ya Suku” yi lomboloka nye kuenda tu kuatisiwa ndati poku yi kuata? (Va Filipoi 4:6, 7)

KULI ombembua yimue okuti omanu va kasi voluali lulo ka va yi kũlĩhĩle. Oyo “ombembua ya Suku,” yina yi kuatisa oku kuata ukamba wa velapo la Isietu wo kilu. Nda tu kuete ombembua ya Suku, tu liyeva okuti tua kolapo. (Tanga Va Filipoi 4:6, 7.) Tu sanjuka poku linga ukamba la vana tu sole. Kuenda tu sanjuka poku kuata ukamba la ‘Suku yombembua.’ (1 Va Tes. 5:23) Eci tu kũlĩha, loku kolela kuenda oku pokola ku Isietu wokilu, ombembua ya Suku yi pondola oku tulumula asakalalo vutima wetu, eci tu liyaka locitangi cimue.

2. Momo lie tu kolelela okuti ci tẽliwa oku kuata ombembua ya Suku?

² Ci tẽliwa hẽ oku kuata ombembua ya Suku eci tu liyaka lovitangi ndeci, cuvei umue, ocilunga, ombuanja yovitundo, ale elambalalo? Ovitangi evi, vi pondola oku tu yokokisa. Yesu wa sapuila kolondonge viaye hati: “Ovitima viene ka vi ka tokotelue ndaño oku kala lusumba.” (Yoa. 14:27) Ci sanjuisa omo okuti, vamanji vakapako elungulo lia Yesu. Lekuatiso lia Yehova, ovo va kuete ombembua ndaño va kasi oku liyaka lovitangi vialua.

KUATA OMBEMBUA POKU LIYAKA LUVEI UMUE

3. Ndamupi efengi limue li pondola oku kapa kohele ombembua yetu?

³ Ocili okuti efengi limue, vocipikipiki li pondola oku pongolola ekalo liomuenyo wetu wosi. Sokolola ovintangi efengi lio COVID-19 lia nena komanu valua. Ekonomuiso limue lia lingiwa, lia lekisa okuti omanu valua va kuata ocitangi cotulo vokuenda kuefengi liaco. Vokuenda kuefengi liaco, uvei wesakalalo wa livokiya, esumuo, okunyua ovina vikoluisa, oku fenya olodroga, oku tipula omanu kuenda oku kuata ovisimĩlo vioku li ponda. Nda okuti kocitumãlo o kasi kuli uvei umue usambuka, o yuvula ndati oku sakalala loku sanjukila ombembua ya Suku?

4. Momo lie oku kũlĩha ocitumasuku ca Yesu catiamẽla koloneke via sulako ci tu kokela ombembua?

⁴ Yesu wa popele okuti, koloneke via sulako, kua laikele oku kala afengi, ale ovovei, “kocitumãlo locitumãlo.” (Luka 21:11) Momo lie ci tu kokelela ombembua poku ci kũlĩha? Etu ka tu komõha lovovei a sambuka. Etu tua kũlĩha okuti, ovina evi via ponduile oku pita ndomo Yesu a ci popele. Tu kuete esunga lioku kapako elungulo Yesu a ecele ku vana va laikele oku kala kotembo ya sulako liokuti: “Ko ka yokoki.”—Mat. 24:6.

5. (a) Olondaka vi sangiwa kukanda ku Va Filipoi 4:8, 9, vi tu kuatisa ndati oku nõla ovina tu pinga vohutililo eci tu liyaka locitangi cuvei umue? (b) Oku yevelela ulandu Wembimbiliya wangalavaliwa ci ku kuatisa ndati?

⁵ Poku liyaka locitangi cuvei umue, tu pondola oku sakalala calua. Eci oco ca pita la manji umue o tukuiwa Desi.b Noke lia yinanu yaye, lepalume liaye okuti ondotolo, va fa omo lio COVID-19, manji Desi wa kala lusumba woku kuatiwavo luvei waco loku sambuisako ina yaye wa kuka. Omo liefengi liaco, wa kalavo lusumba woku pumba upange waye, kuenje wa lipula ndomo a ponduile oku landa okulia loku feta onjo. Ovina viaco viokokela esakalalo lialua okuti wa kala locipakupaku. Pole, manji Desi wa tumbulula vali ombembua yaye. Wa ci linga ndati? Eye wa likutilila ku Yehova oco o kuatise oku tulumuha loku kuata ovisimĩlo via sunguluka. (Tanga Va Filipoi 4:8, 9.) Eye wa enda oku yevelela Yehova oku “vangula” pocakati culandu Wembimbiliya wangalavaliwa. Manji Desi wa popia hati: “Olondaka via vana va kala oku tanga ulandu waco, wa ñuatisa oku tulumuha kasakalalo ange kuenda va ndivaluisa okuti Yehova wa ñapako.”—Osa. 94:19.

6. Elilongiso liopokolika kuenda olohongele viekongelo vi ku kuatisa ndati?

⁶ Poku liyaka locitangi cuvei umue, halonjanja viosiko tu pondola oku linga ovina viosi tua lingaile, pole, ka ci ku tateka oku linga elilongiso liove liopokolika, ale oku kala kolohongele. Ovolandu omuenyo a sangiwa valivulu etu kuenda volovideo, a pondola oku ku ivaluisa okuti vamanji va kasi oku amamako oku vumba Yehova lekoleko ndaño lovitangi va kasi oku liyaka lavio. (1 Pet. 5:9) Olohongele vi pondola oku ku kuatisa oku kuata ovisimĩlo via sunguluka pocakati Covisonehua. Ovio vi ku ĩhavo epuluvi lioku kolisa vamanji kuenda oku ku kolisa. (Va Rom. 1:11, 12) Eci o sokolola ndomo Yehova a siata oku kuatisa afendeli vaye eci va liyaka locitangi cuvei, cusumba, ale culika, ekolelo liove li pama kuenda o kolela okuti eye o ka ku kuatisavo.

7. Nye o pondola oku lilongisila kulandu wupostolo Yoano?

⁷ Likolisilako oku sapela la vamanji. Poku liyaka locitangi cimue cuvei, pamue ci sukila okuti o kala ocipãla lomanu vakuavo, ndaño muẽle la vamanjetu. Citava okuti vepuluvi liaco, o liyeva ndupostolo Yoano. Eye wa yonguile oku mola ekamba liaye Gaio polo la polo. (3 Yoa. 13, 14) Ndaño ndoco, Yoano wa kũlĩhĩle okuti vepuluvi liaco, eye ka ponduile oku mola Gaio. Kuenje Yoano wa linga cosi ci tava; eye wa sonehela ukanda umue ku Gaio. Nda okuti, vepuluvi limue ka ci tẽliwa oku nyũla vamanjetu polo la polo, citava okuti o va telefonelela, o linga ovideokonferencia, ale o va tumisa esapulo. Eci o likolisilako oku sapela la vamanji, ku ka liyeva ulika kuenda o ka kuata ombembua. Sanda oku sapela lakulu vekongelo ca piãla enene nda o kasi lesakalalo kuenda tava elembeleko liavo.—Isa. 32:1, 2.

KUATA OMBEMBUA POKU LIYAKA LOCILUNGA CIMUE

8. Ndamupi ocilunga cimue ci pondola oku kapa kohele ombembua yove?

⁸ Nda okuti wa liyaka ale locitangi cendunde, locilemawe, ale oku timihiwa kusengue, ove pamue o kuata asakalalo vokuenda kuotembo yalua, noke liovilunga viaco oku pita. Nda wa fisa umue ngandiove, ale oku pumba ovipako viove, citava okuti wa kuata esumuo lialua, ekambo lielavoko, ale onyeño yalua. Eci ka ci lomboloka okuti, ove o sole ovokuasi, ale wa kamba ekolelo. Ove wa pita lovitangi ka via lelukile kuenje vamue va lavoka okuti o kuata ovisimĩlo ka via sungulukile. (Yovi 1:11) Pole, ndaño lekalo ka lia lelukile, ove handi o pondola oku kuata ombembua. Ndamupi?

9. Nye Yesu a popia oco tu li pongiyile ovilunga via laikele oku pita?

⁹ Ivaluka eci Yesu a popele. Omanu vamue voluali, va sima okuti lalimue eteke va ka pita locilunga cimue, pole, etu tu lavoka okuti ku ka pita ovilunga vialua kotembo yetu yilo, okuti vimue pokati kavio vi ka pitavo letu. Yesu wa sapuila kolondonge viaye okuti, kua laikele oku kala ‘ovilemawe vinene’ kuenda ovilunga vikuavo osimbu esulilo ka lieyile. (Luka 21:11) Eye wa popelevo okuti kua laikele oku kala oku “livokiya kuevĩho,” ovilinga viungangala, umondi kuenda ovina vikuavo. (Mat. 24:12) Yesu lalimue eteke a popele okuti ovina viaco via ponduile oku pita lika lomanu vana ka va fendela Yehova. Ndaño muẽle afendeli va Yehova vakuekolelo, va siatavo oku pita lovilunga viaco. (Isa. 57:1; 2 Va Kor. 11:25) Yehova ka lingi ocikomo oco a tu teyuile kovilunga viosi, pole, eye o tu ĩha ovina tu sukila vi tu kuatisa oku amamako oku tula utima kuenda oku kuata ombembua.

10. Momo lie oku lipongiyila ocilunga cimue cilo, ci lekisa okuti tu kuete ekolelo? (Olosapo 22:3)

¹⁰ Ci ka leluka kokuetu oku tula utima poku liyaka locitangi cimue ciya ocipikipiki, nda tua lipongiya. Anga hẽ oku lipongiya ci lekisa okuti ka tua kolelele Yehova? Sio hacoko. Oku lipongiyila ocilunga cimue ci lekisa okuti tu kuetele ekolelo kunene wa Yehova woku tu tata. Ndamupi? Ondaka ya Suku yi tu lungula oco tu lipongiyile kovilunga vi pondola oku pita. (Tanga Olosapo 22:3.) Pocakati covipama violorevista, colohongele viekongelo kuenda vasapulo a siata oku eciwa vocisoko ca Suku olonjanja viosi, tua siata oku vetiyiwa oco tu lipongiyile kovina viya ocipikipiki.c Tua kolela hẽ ku Yehova? Nda oco, tu sukila oku kapako alungulo aco cilo osimbu ka kua pitile ocilunga cimue.

11. Nye o li longisila kulandu wa manji Margaret?

¹¹ Kũlĩhĩsa ulandu wa manji umue ukãi o tukuiwa Margaret. Eye wa handelekiwa oku tunda vonjo yaye omo lioku timihiwa kusenge umue posongo eye a kala. Omo okuti omanu valua va yonguile oku tila vonjanja yimuamue, akãlu alua a talama vetapalo okuti ka va ponduile oku enda. Kuenje omo liofela ya sanya kuenda lowisi walua, manji Margaret ka ponduile oku tunda vekãlu liaye. Pole, eye wa puluka kocilunga caco omo okuti, wa lipongiyile. Vekolombele liaye wa kapelemo omapa yimue ya ponduile oku u kuatisa oku sanga onjila yikuavo. Eye wa kũlĩhĩle kocitumãlo a laikele oku enda nda kueya ocilunga cimue. Manji Margaret omo lioku lipongiya, wa puluka.

12. Momo lie tu sukilila oku kapako olonumbi vioku liteyuila?

¹² Oco tu liteyuile loku teyuilavo omanu vakuavo, olombiali pamue vi tu pinga oco tu pokole konumbi yimue yoku tunda pocitumãlo tu kasi, ale yoku kuama olonumbi vikuavo va eca. Omanu vamue ka va lekisa epokolo, momo va kakatela calua kovina va kuete. Ndamupi Akristão va ci tenda? Embimbiliya li tu sapuila hati: “Mekonda lia Ñala, pokoli komanu vosi, ci kaile osoma okuti omunu umue wa ku velipo, ale olonguluvulu via tumiwa laye.” (1 Pet. 2:13, 14) Ocisoko ca Suku ca siatavo oku tu ĩha olonumbi oco tu kolepo. Olonjanja viosi tua siata oku vetiyiwa oku eca atendelo etu otelefone kakulu vekongelo, oco okuti eci ku iya ocitangi cimue ovo va pondola oku tu kuatisa. Anga hẽ wa eca ale etendelo liove? Pamue tu tambulavo onumbi yoku kala pocitumãlo cimue ca koka, yoku tunda pocitumãlo tu kasi kuenda yoku yuvula oku sakalala calua, ale ndomo tu kuatisa vakuetu. Nda ka tua pokuile, tu pondola oku kapa kohele omuenyo wetu kuenda wakulu vekongelo. Ivaluka okuti alume ava vakuekolelo va kasi oku amamako oku tu lava. (Va Hev. 13:17) Manji Margaret hati: “Nda kolela okuti oku kuama olonumbi vi eciwa lakulu vekongelo kuenda locisoko ca Yehova ca popela omuenyo wange.”

13. Nye ca siata oku kuatisa Akristão valua va siapo ovitumãlo viavo, oku kuata esanju lombembua?

¹³ Vamanji valua okuti va siapo olonjo viavo omo liocilunga cimue, ale omo liuyaki, va siata oku likolisilako oku ambata omuenyo ndomo ci likuata lekalo va sangiwa kuenda va linga vali calua kupange wa Yehova. Ndeci ca pita Lakristão vatete okuti va lisandola omo lioku lambalaliwa, pole, vamamako “oku kunda esapulo liwa liondaka ya Suku.” (Ovil. 8:4) Oku kunda ca va kuatisa oku tiamisila utima Kusoma ndaño lekalo ka lia lelukile. Onima yeyililako yeyi okuti, ovo vamamako lesanju kuenda ombembua.

KUATA OMBEMBUA NDAÑO LELAMBALALO

14. Ndamupi elambalalo li pondola oku kapa kohele ombembua yetu?

¹⁴ Eci tu lambalaliwa, tu pondola oku pumba ovina vialua vi pondola oku tu kuatisa oku tulumuha. Tu sanjuka calua eci tu kala pamosi, tu kunda lelianjo kuenda oku linga ovina okuti ka tu kala lusumba woku ambatiwa vokayike. Nda okuti ka tu pondola oku linga ovina evi, citava okuti tu kala lesakalalo kuenda lusumba weci ci laika oku pita noke. Hacĩviko oku liyeva ndoco. Pole, tu sukila oku kuata utate. Yesu wa popele okuti elambalalo lia ponduile oku konyũisa olondonge viaye. (Yoa. 16:1, 2) Pole, tu amamako ndati oku kuata ombembua ndaño lelambalalo?

15. Momo lie ka tu sukilila oku kuatela usumba elambalalo? (Yoano 15:20; 16:33)

¹⁵ Ondaka ya Suku yi tu sapuila hati: “Vosi vana va yongola oku ambata omuenyo umue woku sumbila Suku ndolondonge via Kristu Yesu, va ka lambalaliwavo.” (2 Tim. 3:12) Manji umue o tukuiwa Andrei, ka ca lelukile kokuaye oku tava okuti afendeli vosi va Yehova va laikele oku lambalaliwa, toke eci upange woku kunda kofeka a kasi weya oku tatekiwa. Eye wa sokolola ndoco: ‘Kulo kulivo Olombangi vialua Via Yehova. Ndamupi olombiali via ponduile oku tu kapa vosi yetu vokayike?’ Pole, eci ca kala oku kapa kohele ombembua ya manji Andrei, loku kuata asakalalo alua. Vamanji vakuavo va kolelele ku Yehova kuenda ka va simile okuti va ka puluka kelambalalo liaco. Ovo va kũlĩhĩle okuti va ka kuatiwa, pole ka va sakalalele calua ndeci manji Andrei. Kuenje manji Andrei wa nõlapo oku lekisa ocituwa ndeci ca va manji vakuavo loku kolela lutima wosi ku Yehova. Kuenje wa tumbulula ombembua yaye kuenda cilo, o kuete esanju ndaño lovitangi. Cimuamue haico tu pondola oku linga. Ndaño Yesu wa tu sapuila okuti tu lavoka oku lambalaliwa, eye wa tu sapuilavo oco tu amameko lekolelo.—Tanga Yoano 15:20; 16:33.

16. Onumbi yipi tu sukila oku pokola ndaño lelambalalo?

¹⁶ Eci upange wetu woku kunda u tatekiwa, pamue tu tambula olonumbi vi tunda kofiliale kuenda kakulu vekongelo. Olonumbi viaco vi eciwa oco vi tu teyuile, loku tu ĩha ekolelo liokuti tu amamako oku tambula okulia kuespiritu kuenda oku tu kuatisa oku amamako oku kunda ndomo ci likuata lekalo tu sangiwa. Likolisilako oku pokola konumbi o tambula, ndaño ku kuete elomboloko lia suapo liesunga lieci kua eciwila onumbi yaco. (Tia. 3:17) Handi vali, lalimue eteke ku ka ece olonumbi viatiamẽla ku vamanjetu, ale olonumbi viatiamẽla kovopange ekongelo ku vana ka va kuete omoko yoku vi kũlĩha.—Uku. 3:7.

17. Ndeci ovopostolo vokocita catate, nye tua nõlapo oku linga?

¹⁷ Amue pokati kasunga atete lieci Satana a yakela lafendeli va Suku, lieli liokuti ovo “va kuete upange woku imba uvangi watiamẽla ku Yesu.” (Esit. 12:17) Ku ka ecelele okuti Satana kuenda oluali luaye va ku yokokisa. Oku kunda kuenda oku longisa ndaño lelambalalo, ci tu kuatisa oku kuata esanju lombembua. Kocita catete eci olonganji vio ko Yudea va handeleka kovapostolo oco va liwekepo oku kunda, alume ava vakuekolelo va nõlapo oku pokola ku Suku. Ovo vamamako oku kunda kuenda upange waco wa kala oku va kokela esanju lialua. (Ovil. 5:27-29, 41, 42) Ocili okuti, eci upange wetu woku kunda u tatekiwa, tu sukila oku lekisa utate osimbu tu kunda. (Mat. 10:16) Pole, nda tua likolisilako oku linga eci tu tẽla, tu ka kuata ombembua yi tunda koku sivaya Yehova kuenda tu ka eca esapulo li popela omuenyo.

‘SUKU YOMBEMBUA O KA KALA LOVE’

18. Nye tu pondola oku ivaluka catiamẽla Kono yombembua tu sukila?

¹⁸ Kolela okuti vokuenda kuotembo yovitangi, tu pondola oku kuata ombembua. Kapuluvi aco, tu sukila oku ivaluka okuti ombembua tu sukila, ombembua ya Suku, yina okuti Yehova eye lika o pondola oku yeca. Kolela kokuaye eci o liyaka locitangi cimue cuvei, locilunga cimue, ale lelambalalo. Amamako oku kala vocisoko caye. Luluvalela kelavoko liwa liokovaso yoloneke o kasi oku lavoka. Nda wa ci linga, ‘Suku yombembua o ka kala love.’ (Va Fil. 4:9) Vocipama cikuãimo, tu ka konomuisa ndomo tu kuatisa vamanji vana va kasi oku liyaka lovitangi, oku kuata ombembua ya Suku.