Jẹnẹsis
25 Asaọkiephana Ebraham da rhoma reyọ aye ọfa, odẹ rọyen Ketura. 2 Ọke vwọ yanran, o de vwiẹ Zimran, Jọkshan, Midan, Midian, Ishbak, kugbe Shua vwọ kẹ.
3 Jọkshan da rhe dia ọsẹ ri Shiba kugbe Didan.
Emọ ri Didan yen Ashurim, Lẹtushim, kugbe Lẹọmim.
4 Emọ ri Midian yen Ifah, Ifẹ, Henọk, Abaida, kugbe Ẹldeha.
Enana eje emọ* ri Ketura.
5 Ọke vwọ yanran, Ebraham da vwẹ erọnvwọn eje ro vwori vwọ kẹ Aizik, 6 ẹkẹvuọvo Ebraham da vwẹ okẹ sansan vwọ kẹ emọ rẹ esen rọyen vwiẹ vwọ kẹ. Ọ je vwọ hẹ akpọ na, o de siobọnu ayen kpo ẹbẹre ọnre va nẹcha, sherabọ kẹ ọmọ rọyen Aizik, vwo kpo otọ rẹ Ẹbẹre Ọnre Va Nẹcha. 7 Uche ikpe rẹ Ebraham dia akpọ da dia ẹgbukpe 175. 8 Ọtiọyena Ebraham da wẹn ẹwẹn rọ koba rọyen, o de ghwu ọke rọ vwọ ghwo yẹghẹyẹghẹ re, ọ ghworo ji yeren omamọ akpọ, e de koko bru ihwo rọyen ra.* 9 Aizik vẹ Ishmẹl re dia emọ rọyen de sho phiyọ unu rẹ ukuta ri Makpila rọhẹ udju rẹ Ifrọn ọmọ ri Zoha ohwo ri Hẹt, rọhẹ obaro ri Mamre, 10 udju rẹ Ebraham dẹ mie emọ ri Hẹt. Etiyin yen e shi Ebraham phiyọ, ọtiọyen ji te aye rọyen Sera. 11 Ebraham vwo ughwu nu, Ọghẹnẹ ko ji brẹba kẹ ọmọ rọyen Aizik, jẹ Aizik dia kẹrẹ Biẹ-lehai-rọi.
12 Ọnana ikuegbe rẹ Ishmẹl ọmọ rẹ Ebraham rẹ Hega ohwo rẹ Ijipt na, odibo ri Sera vwiẹ kẹ Ebraham.
13 Asaọkiephana enana yen edẹ rẹ emọ rẹ Ishmẹl, edẹ rayen vwo nene orua rẹ ayen nurhe: Ọmọkpako rẹ Ishmẹl yen Nẹbeọt, tavwen a ke mrẹ Kida, Adbil, Mibsam, 14 Mishma, Duma, Masa, 15 Hedad, Tima, Jitọ, Nefish, kugbe Kẹdẹma. 16 Enana emọ rẹ Ishmẹl, enana yen edẹ rayen vwo nene asan rẹ ayen dia kugbe asan rẹ ayen wonphiyọ,* isun 12 vwo nene erua rayen. 17 Ishmẹl da dia ikpe 137. Ọ da wẹn ẹwẹn rọyen rọ koba, o de ghwu, e de koko bru ihwo rọyen ra.* 18 Ayen da dia vwo nẹ Havilah rọ kẹrẹ Shọ, rọ kẹrẹ Ijipt, rhirin re te Asiria. Kọ dia kẹrẹ iniọvo rọyen eje.*
19 Ọnana ikuegbe rẹ Aizik ọmọ rẹ Ebraham.
Ebraham da rhe dia ọsẹ rẹ Aizik. 20 Aizik hẹ ẹgbukpe 40 ọke rọ vwọ rọvwọn Rebeka, ọmọtẹ ri Bẹtuẹl ohwo rẹ Aremia ri Padan-eram, oniọvo ọmọtẹ ri Leban ohwo rẹ Aremia. 21 Aizik kọ rẹ Jihova fikirẹ aye rọyen, kidie ẹgan o ruẹ; ọtiọyena Jihova da kpahen phiyọ orẹ rọyen, aye rọyen Rebeka da mrevun. 22 Emọ rehẹ evun rọyen ke họnra ohwohwo, ọtiọyena ọ da ta: “Ọ da dianẹ ọtiọna yen ọ cha dia, kẹ diesorọ mi vwo rhe yerẹn?” Ọtiọyena ọ da nọ mie Jihova. 23 Jihova da ta kẹ: “Ẹgborho ivẹ yehẹ uwevwiẹ wẹn, a cha hẹriẹ ẹko rẹ ihwo ivẹ nẹ evun wẹn rhe; ẹgborho ọvo cha gan vrẹ ẹgborho ro chekọ na, ọ rẹ ọkpako na cha ga ọ rẹ otete na.”
24 Ọke ro che vwo vwiẹ vwo te, nighere! ejimẹ yehẹ evunrẹ uwevwiẹ rọyen. 25 Ọrẹsosuọ na de wontọ, oma rọyen eje pha vwavware, ọ pha kerẹ ewun ro vwo ẹton, ọtiọyena e de se Isọ.* 26 Ọyena vwọ wan nu, oniọvo rọyen de wontọ, ọ vwẹ obọ rọyen vwọ yọnrọn uchukowọ rẹ Isọ, ọtiọyena o de se Jekọp.* Aizik hẹ ẹgbukpe 60 ọke rẹ Rebeka vwo vwiẹ ayen.
27 Emeshare na vwọ rhuaphiyọ, Isọ da rhe dia orhuẹn rọ tẹn ona, ohwo rẹ aghwa na, ẹkẹvuọvo Jekọp kẹ ohwo ro vwo abee, rọ dia itughẹ. 28 Aizik vwo ẹguọnọ rẹ Isọ kidie o hwe eranvwe kẹ ria, ẹkẹvuọvo Rebeka vwo ẹguọnọ ri Jekọp. 29 Vwẹ ọke ọvo Jekọp chere istiu rẹ ilẹntil* ọke rẹ Isọ vwo rhivwin nẹ aghwa rhe, jẹ oma ghwọrerọ. 30 Ọtiọyena Isọ da ta kẹ Jekọp: “Jọphẹre, biko, kẹ vwẹ emerha rẹ istiu ọvwavware ro rhe we vwẹ etiyin na,* kidie oma bru vwe ku!”* Kọyensorọ odẹ rọyen vwọ dia Idọm.* 31 Ọtiọyena Jekọp da ta: “Shẹ ẹdia wẹn kerẹ ọmọkpako kẹ vwẹ tavwen!” 32 Isọ da ta: “Ughwu me hepha na! Die yen me cha vwẹ ẹdia rẹ ọmọkpako vwo ru?” 33 Vwọba Jekọp da ta: “Duvwun iyorin kẹ vwẹ tavwen!” Ọtiọyena o de duvwun iyorin kẹ, je shẹ ẹdia rọyen kerẹ ọmọkpako vwọ kẹ Jekọp. 34 Ọtiọyena Jekọp da vwẹ ibrẹdi vẹ istiu rẹ ilẹntil kẹ Isọ, ọ da re je da, o de vrẹn ọ da yanran. Ọtiọyena Isọ da jẹ ẹdia rẹ ọmọkpako na fia.