Ẹyano
38 Ọ da vwẹ urhe rẹ akesha vwo ru agbada rẹ izobo rẹ ẹtorhẹ na. Ẹbẹre ẹne rọyen da dia abavo, ugrongron rọyen kubit iyorin, ohẹhẹre rọyen kubit iyorin, o de rhe kpenu te kubit erha. 2 O de ru idjo rọyen phiyọ igogo ẹne rọyen. Idjo na vẹ agbada na da dia ọvuọvo. Ọ da vwẹ ẹrovwo vwọ pharọ. 3 O vwo ru ọyena nu, o de ru ekuakua rẹ agbada na eje, igogono na, isaboro na, imize ikokodo na, ifọku na,* kugbe orọnvwọn ra vwọ wan erhanre na. Ẹrovwo yen o vwo ru ekuakua rọyen eje. 4 O de ji ru ovuvwiyerin vwọ kẹ agbada na, ẹrovwo yen o vwo ru ovuvwiyerin na, o de ruo phiyọ evunrẹ agbada na, kẹrẹ ugava rọyen. 5 O de ru isa ẹne kẹrẹ ovuvwiyerin ra vwẹ ẹrovwo vwo ru na, rere ayen dia asan ra cha chọrọ ekpọ na phiyọ. 6 O vwo ru ọyena nu, ọ da vwẹ urhe rẹ akesha vwo ru ekpọ na, ọ da vwẹ ẹrovwo vwọ phare ayen. 7 Ọ da chọrọ ekpọ na phiyọ isa na rehẹ orhoma rẹ agbada na, rere a vwẹ ayen vwo muo. O ru agbada na kerẹ ekpeti rẹ urhe rẹ obotọ vẹ obenu rọyen rhiephiyọ.
8 Ọ da vwẹ ẹrovwo vwo ru oze na vẹ awọ rọyen; ighegbe* rẹ eya re ga vwẹ asan ra wan rua utughẹ ra da vwoma na yen o vwo ru ayen.
9 O de ru otegodo rẹ itabanako na. Vwẹ ẹbẹre rẹ obọrhen ọnre na ro hirharoku obọrhen ọnre na, o de ru ikọtini rẹ amwa oyoyovwin re meri ra jẹphiyọ na, ugrongron rọyen da dia kubit 100. 10 O vwo ichivwo 20 kugbe inu 20 ra vwẹ ẹrovwo vwo ru, idọnọ efuanfon yen e vwo ru obo ra vwọ jẹ erọnvwọn phiyọ vẹ obo re vwo churẹ erọnvwọn siẹ ohwohwo rehẹ ichivwo na. 11 Vwọba, ikọtini ri gron te kubit 100 hẹ ẹbẹre rẹ obohwẹre ọnre na. Ẹrovwo yen e vwo ru ichivwo 20 rayen vẹ inu 20 rayen. Idọnọ efuanfon yen e vwo ru obo ra vwọ jẹ erọnvwọn phiyọ vẹ obo re vwo churẹ erọnvwọn siẹ ohwohwo rehẹ ichivwo na. 12 Ẹkẹvuọvo ikọtini ra jẹphiyọ vwẹ ẹbẹre ọnre shera na gron te kubit 50. O vwo ichivwo ihwe kugbe inu ihwe, idọnọ efuanfon yen e vwo ru obo ra vwọ jẹ erọnvwọn phiyọ vẹ obo re vwo churẹ erọnvwọn siẹ ohwohwo rehẹ ichivwo na. 13 Ohẹhẹre rẹ ẹbẹre ro hirharoku ẹbẹre ọnre va nẹcha na kubit 50. 14 Ikọtini ra jẹphiyọ ro gron te kubit 15 hẹ ẹbẹre ọvo, vẹ ichivwo erha kugbe inu erha. 15 Ẹbẹre ro chekọ rẹ asan ra wan rua otegodo na vwo ikọtini ra jẹphiyọ ri gron te kubit 15, e vẹ ichivwo erha kugbe inu erha. 16 Amwa oyoyovwin re meri yen e vwo ru ikọtini na eje ra jẹphiyọ, re riariẹ otegodo na phiyọ na. 17 Ẹrovwo yen e vwo ru inu vwọ kẹ ichivwo na, idọnọ efuanfon yen e vwo ru obo ra vwọ jẹ erọnvwọn phiyọ vẹ obo re vwo churẹ erọnvwọn siẹ ohwohwo rehẹ ichivwo na, idọnọ efuanfon yen a vwọ phare obenu rayen. A je vwẹ idọnọ efuanfon vwo ru obo ra vwọ gba erọnvwọn kuẹgbe phiyọ ichivwo na eje rehẹ otegodo na.
18 Oruru rẹ iblu, ẹton rẹ ogodẹ rẹ ipọpo, amwa ọvwavware, kugbe amwa oyoyovwin re meri yen e vwo ru ikọtini rọhẹ asan ra wan rua otegodo na. Ugrongron rọyen kubit 20, o de rhe kpenu te kubit 5, oborẹ ikọtini ra vwọ ya vwẹ otegodo na kpenu te, ọtiọyen o ji kpenu te. 19 Ẹrovwo yen e vwo ru ichivwo ẹne rọyen vẹ inu ẹne rẹ ichivwo na. Idọnọ efuanfon yen e vwo ru obo ra vwọ jẹ erọnvwọn phiyọ re ru phiyọ ayen, idọnọ efuanfon yen a je vwọ phare obenu rayen kugbe obo re vwo churẹ erọnvwọn siẹ ohwohwo re ru phiyọ ayen. 20 Ẹrovwo yen e vwo ru ipẹrẹn rẹ utughẹ na kugbe ipẹrẹn rẹ otegodo na eje.
21 Enana yen ikekeri rẹ obo re vwo ru itabanako na, itabanako rẹ Oseri na, ekuakua re kereri vwo nene iji ri Mosis, kerẹ oghwa rẹ ihwo ri Livae vwẹ otọ rẹ odjekẹ rẹ Itama, ọmọ rẹ Erọn orherẹn na. 22 Bẹzalẹl ọmọ ri Yurai ọmọ ri Họr ohwo rẹ uvwiẹ ri Juda ru erọnvwọn eje rẹ Jihova ji iji rọyen kẹ Mosis. 23 Ọ vẹ Oholiab ọmọ rẹ Ahisamak ohwo rẹ uvwiẹ ri Dan, rọ dia ọwena, ohwo ro rhuon emwa, kugbe ohwo rọ vwẹ oruru rẹ iblu, ẹton rẹ ogodẹ rẹ ipọpo, amwa ọvwavware, kugbe amwa oyoyovwin vwo rhuon erọnvwọn.
24 Oro na eje re vwo ruiruo rẹ asan ọfuanfon na eje vẹ oro rẹ izobo rẹ edjuo na abavo, italẹnti* 29 kugbe shẹkẹl* 730 vwo nene uwan ri shẹkẹl rẹ asan ọfuanfon na.* 25 Idọnọ efuanfon rẹ ihwo re kereri vwẹ ọghwẹgbe na da dia italẹnti 100 vẹ shẹkẹl 1,775 vwo nene uwan ri shẹkẹl rẹ asan ọfuanfon na.* 26 Ubro ri shẹkẹl rẹ ohwo ọvuọvo ọyen ubro ri shẹkẹl vwo nene uwan ri shẹkẹl rẹ asan ọfuanfon na* vwọ kẹ eshare na eje vwẹ usun rẹ ihwo re kereri vwo nẹ ẹgbukpe 20 kpenu, ayen ejobi da dia 603,550.
27 Obo re vwo ru inu rẹ ichivwo rẹ asan ọfuanfon na kugbe inu rẹ ichivwo ra vwẹ ikọtini ya na da dia italẹnti 100; inu 100 vẹ italẹnti 100 abavo, italẹnti ọvo vwọ kẹ unu ọvuọvo. 28 Vwo nẹ shẹkẹl 1,775 na yen o de ru obo ra vwọ jẹ erọnvwọn phiyọ vwọ kẹ ichivwo na, ọyen ọ je vwọ phare obenu rayen ji ku ayen kugbe.
29 Ẹrovwo rẹ izobo* na da dia italẹnti 70 kugbe shẹkẹl 2,400. 30 Enana yen o vwo ru inu vwọ kẹ ichivwo rehẹ asan ra wan rua utughẹ ra da vwoma na, agbada rẹ ẹrovwo na, kugbe ovuvwiyerin rọyen ra vwẹ ẹrovwo vwo ru, ekuakua rẹ agbada na eje, 31 inu rehẹ otegodo na riariẹ, inu rehẹ asan ra wan rua otegodo na, kugbe ipẹrẹn rẹ utughẹ rẹ itabanako na eje vẹ ipẹrẹn eje rehẹ otegodo na riariẹ.