Ẹzra
7 Erọnvwọn nana vwọ wan nu, vwẹ ọke rẹ usuon rẹ Ovie Atazẹzis ri Pẹsia, Ẹzra* de rhivwin. Ọyen ọmọ ri Sẹraya, ọmọ rẹ Azaraya, ọmọ ri Hilkaya, 2 ọmọ ri Shalọm, ọmọ ri Zedọk, ọmọ rẹ Ahaitọb, 3 ọmọ rẹ Amaraya, ọmọ rẹ Azaraya, ọmọ ri Mẹreọt, 4 ọmọ ri Zẹrahaya, ọmọ rẹ Ọzai, ọmọ ri Bọkai, 5 ọmọ rẹ Abishua, ọmọ ri Finihas, ọmọ rẹ Ẹlieza, ọmọ rẹ Erọn orherẹn rode na. 6 Ẹzra nana nẹ Babilọn rhe. Ọyen osiọbe rọ nabọ riẹn* Urhi ri Mosis rẹ Jihova Ọghẹnẹ rẹ Izrẹl vwọ phia. Ovie na ru kemu kemu rọ nokpẹn rọyen, kidie obọ ri Jihova Ọghẹnẹ rọyen hẹ enu rọyen.
7 Evo vwẹ usun rẹ ihwo rẹ Izrẹl na, irherẹn na, ihwo ri Livae na, ibuine na, ihwo re rhẹrẹ anurhoro na, kugbe idibo rẹ uwevwin rẹ ẹga na,* de kpo Jerusalẹm vwẹ ukpe righwrẹn rẹ Ovie Atazẹzis. 8 Ẹzra rhe Jerusalẹm vwẹ emeranvwe riyorin, vwẹ ukpe righwrẹn rẹ ovie na. 9 Vwẹ ẹdẹ rẹsosuọ rẹ emeranvwe rẹsosuọ na, o de mu oyan phiyọ vwo nẹ Babilọn, o de te Jerusalẹm vwẹ ẹdẹ rẹsosuọ rẹ emeranvwe riyorin na, kidie obọ esiri rẹ Ọghẹnẹ rọyen hẹ enu rọyen. 10 Ẹzra muegbe rẹ ubiudu rọyen* rọ vwọ fuẹrẹn Urhi ri Jihova ji ru obo rehẹ evun rọyen, rere o vwo yono iji kugbe ẹdjọeguo rọyen vwẹ Izrẹl.
11 Ọnana ọfa rẹ ọbe na rẹ Ovie Atazẹzis vwọ kẹ Ẹzra rọ dia orherẹn kugbe osiọbe na, ọwena rẹ uyono rẹ* irhi ri Jihova kugbe iji rọyen ro ji kẹ Izrẹl:
12 * “Atazẹzis ovie rẹ ivie, vwo rhe Ẹzra orherẹn na, osiọbe rẹ Urhi rẹ Ọghẹnẹ rẹ idjuvwu na: E jẹ uvi rẹ ufuoma nene uwe dia. Asaọkiephana 13 mi jurhi nẹ kohwo kohwo rọ dia ohwo rẹ Izrẹl rọhẹ otọ rẹ usuon mẹ, irherẹn rayen kugbe ihwo ri Livae na ri vwo owenvwe ri vwo nene uwe kpo Jerusalẹm sa yanran. 14 Kidie ovie na ji we vẹ ibruche rọyen ighwrẹn nẹ ovwan ra guọnọ otọ rọyen sẹ Urhi rẹ Ọghẹnẹ wẹn ro rhe we* na, e ruẹ nene vwẹ Juda vẹ Jerusalẹm, 15 rere ovwan mu idọnọ efuanfon kugbe iro rẹ ovie na kugbe ibruche rọyen vwọ kpahotọ vwo nẹ otọ rẹ ẹwẹn rhe kẹ Ọghẹnẹ rẹ Izrẹl, rọ dia Jerusalẹm, 16 vẹ idọnọ efuanfon na eje kugbe iro re mu kẹ ovwan* vwẹ ubrakpọ ri Babilọn eje, ọtiọyen ji te okẹ rẹ ihwo na kugbe irherẹn na vwọ kpahotọ nẹ otọ rẹ ẹwẹn rhe vwọ kẹ uwevwin rẹ Ọghẹnẹ rayen rọhẹ Jerusalẹm. 17 Wọ me vwẹ igho nana vwọ dẹ erhuẹn, egbon, imigodẹ, ọtiọyen ji te izobo rẹ eka rayen kugbe izobo rẹ udi rayen kpakpata, ovwan me vwẹ ayen vwọ kpahotọ vwẹ enu rẹ agbada rẹ uwevwin rẹ Ọghẹnẹ rẹ ovwan vwẹ Jerusalẹm.
18 “Kemu kemu ro shephiyọ kẹ wẹ vẹ iniọvo wẹn rẹ ovwan guọnọ ru, ovwan sa reyọ idọnọ efuanfon ro chekọ vẹ iro na vwo ruiruo vwo nene ọhọre rẹ Ọghẹnẹ rẹ ovwan. 19 Ekuakua na eje ra vwọ kẹ wẹ vwọ kẹ ẹga rẹ uwevwin rẹ Ọghẹnẹ wẹn na, wo mi mu ayen phiyotọ vwẹ obaro rẹ Ọghẹnẹ vwẹ Jerusalẹm. 20 Ekuakua ri chekọ rẹ uwevwin rẹ Ọghẹnẹ wẹn ri fori, ra guọnọre nẹ wọ vwọ kpahotọ, wọ mẹ reyọ ayen vwo nẹ asan ra ghwẹ efe rẹ ovie phiyọ na.
21 “Mẹvwẹ, Ovie Atazẹzis, jurhi kẹ eyọnrigho eje rehẹ ekogho rẹ Obovrẹ rẹ Urhie* na nẹ kemu kemu rẹ Ẹzra orherẹn na, osiọbe rẹ Urhi rẹ Ọghẹnẹ rẹ idjuvwu na nokpẹn rọyen mie ovwan, we ruo kpakpata, 22 rhirin re te italẹnti* 100 rẹ idọnọ ọfuanfon, ovwanvwọ rẹ ikọ* 100 rẹ iwiti, ovwanvwọ rẹ ibati 100 rẹ iwaini, ovwanvwọ rẹ ibati* 100 rẹ evwri, kugbe ughwanka ro vwo unuu. 23 E jẹ e ru kemu kemu rẹ Ọghẹnẹ rẹ idjuvwu na jurhi rọyen vẹ oruru vwọ kẹ uwevwin rẹ Ọghẹnẹ rẹ idjuvwu na, rere ophu vwo jẹ enu rẹ usuon rẹ ovie na vẹ emọ rọyen ẹdia. 24 Vwọba, a rhọnvwe kẹ ovwan nẹ ovwan reyọ osa uyovwiin, ovwan je reyọ arhọghọ, yẹrẹ osa rẹ idjerhe mie ọvuọvo vwẹ usun rẹ irherẹn na kugbe ihwo ri Livae na, ibuine na, ihwo re rhẹrẹ anurhoro na, idibo rẹ uwevwin rẹ ẹga na,* kugbe ihwo re wian vwẹ uwevwin rẹ Ọghẹnẹ nanaa.
25 “Wẹwẹ, Ẹzra, vwo nene aghwanre rẹ Ọghẹnẹ wẹn vwọ kẹ wẹ,* vwẹ ediaguare* kugbe iguẹdjọ vwo mu rere ayen guẹdjọ rẹ ihwo eje rehẹ ekogho rẹ Obovrẹ rẹ Urhie na, ihwo eje re riẹn irhi rẹ Ọghẹnẹ wẹn; wo mi yono kohwo kohwo rọ riẹn ayeen. 26 Kohwo kohwo rọ yọnrọn Urhi rẹ Ọghẹnẹ wẹn kugbe urhi rẹ ovie naa, e brokpakpa guẹdjọ rọyen, owenẹ ọ dia ughwu, a djẹ nẹ orho, e bru eho kẹ, yẹrẹ muo phiyọ uwodi.”
27 E jẹ ujiri dia kẹ Jihova Ọghẹnẹ rẹ esẹ rẹ avwanre ride, ro phiro phiyọ ubiudu rẹ ovie na nẹ o ru uwevwin ri Jihova rọhẹ Jerusalẹm yoyovwin! 28 O ji dje ẹguọnọ ro jẹ rhẹriẹ kẹ vwẹ vwẹ obaro rẹ ovie na kugbe ibruche rọyen kugbe isun rẹ ovie na eje ri vwo ogangan. Ọtiọyena mi de fiudugberi* kidie obọ ri Jihova Ọghẹnẹ mẹ hẹ enu mẹ, mi de se igbuyovwin rẹ Izrẹl koko rere ayen nene uvwe yanran.