Ọbe Rẹsosuọ rẹ Ikun Rivie
16 Ọtiọyena ayen de mu Ekpeti rẹ Ọphọ rẹ Ọghẹnẹ rẹ uyota na rhe, ayen de muo phiyọ evunrẹ utughẹ rẹ Devid bọn vwọ kẹ; ayen de ze izobo rẹ ẹtorhẹ kugbe izobo rẹ ọrekugbe vwẹ obaro rẹ Ọghẹnẹ rẹ uyota na. 2 Ọke rẹ Devid vwo ze izobo rẹ ẹtorhẹ kugbe izobo rẹ ọrekugbe na nu, ọ da vwẹ odẹ ri Jihova vwọ nẹrhovwo kẹ ihwo na. 3 Vwọba, ọ da vwẹ ibrẹdi rọ pha ghorien ghorien, ikeki rẹ ideti, kugbe ikeki ri rezin vwọ kẹ ihwo rẹ Izrẹl eje, te aye te ọshare. 4 Ọyena vwọ wan nu, ọ da vwẹ ihwo ri Livae evo mu nẹ i gbodibo vwẹ obaro rẹ Ekpeti rẹ Ọphọ ri Jihova na, ayen muọghọ,* kpẹvwẹ, ji jiri Jihova Ọghẹnẹ rẹ Izrẹl. 5 Esaf yen ọgbuyovwin, Zẹkaraya da rha vwọ kpahọn; Jehaẹl, Shẹmiramọt, Jehaiyẹl, Matataya, Elayab, Bẹnaya, Obẹd-idọm, kugbe Jehaẹl hworo ekuakua rẹ uhworo ri vwo ifi tẹnrẹnrẹn kugbe ihapu; Esaf hworo isimba, 6 Bẹnaya kugbe Jehazayẹl irherẹn na ki rhe hworo ewanre na ọkieje vwẹ obaro rẹ ekpeti rẹ ọphọ rẹ Ọghẹnẹ rẹ uyota na.
7 Ẹdẹ yena yen Devid tu vwo si une rẹ akpẹvwẹ kẹ Jihova womarẹ Esaf kugbe iniọvo rọyen:
8 “Vwẹ akpẹvwẹ kẹ Jihova, se odẹ rọyen,
Jẹ a riẹn iruo rọyen vwẹ ohri rẹ ihwo na!
10 Vwẹ odẹ ọfuanfon rọyen vwọ yonma.
E jẹ ubiudu rẹ ihwo re guọnọ Jihova ghọghọ.
11 Hiẹ guọnọ Jihova vẹ ogangan rọyen.
Guọnọ opharo rọyen ọkieje.
12 Karophiyọ iruo rẹ igbevwunu ro rure,
Igbevwunu rọyen kugbe ẹdjọeguo ro ghwoghwo re,
13 Ovwan emọ* rẹ Izrẹl odibo rọyen,
Ovwan emọ ri Jekọp, ihwo rọ jẹreyọ.
14 Ọyen yen Jihova Ọghẹnẹ rẹ avwanre.
O guẹdjọ rẹ akpọ na eje.
15 Karophiyọ ọphọ rọyen bẹdẹ,
Ive ro veri* kẹ ivwiẹ uriorin,
16 Ọphọ ro nene Ebraham re,
Kugbe iyorin ro duvwun kẹ Aizik,
17 Ro vwo mu kerẹ urhi kẹ Jekọp
Kerẹ ọphọ ri rhirin kẹ Izrẹl,
18 Nẹ, ‘Me cha kẹ wẹ otọ ri Kenan
Kerẹ uku ra ghare kẹ wẹ.’
19 Ọnana ọke rẹ ovwan vwo je buon,
E, ovwan bunru kakakaa, ovwan jẹ erhorha vwẹ otọ na.
20 Ayen yan nẹ ẹgborho ọvo kpo ọfa,
Vwo nẹ uvie ọvo brẹ ihwo efa.
21 Ọ vwẹ uphẹn vwọ kẹ ohwo vuọvo nẹ o shenyẹ ayeen,
Ẹkẹvuọvo ọ ghwọku ivie fiki rayen,
22 Nẹ, ‘Ovwan vwẹ obọ te ihwo mẹ re me jẹreyọọ,
Ovwan ruẹ emraro mẹ emu vuọvo rọ braree.’
23 So une kẹ Jihova, akpọ na ejobi!
Ghwoghwo usivwin rọyen nẹ ẹdẹ ra ro ẹdẹ!
24 Ghwoghwo urinrin rọyen vwẹ ohri rẹ ẹgborho na,
Iruo rẹ igbevwunu rọyen vwẹ ohri rẹ ihwo na eje.
25 Kidie Jihova rhoro, ọyen me fo ujiri.
O vwo udidi nọ eghẹnẹ efa eje.
26 Eghẹnẹ rẹ ihwo na eje, eyen eghẹnẹ ri fiemuu,
Ẹkẹvuọvo Jihova ọyen ohwo rọ ma idjuvwu na.
27 Ọrho* vẹ urinrin hẹ obaro rọyen;
Ogangan vẹ aghọghọ hẹ asan rọ dia.
28 Vwẹ obo ri fo Jihova kẹ, ovwan erua rẹ ihwo na,
Ovwan vwẹ obo ri fo Jihova kẹ fikirẹ urinrin vẹ ogangan rọyen.
29 Ovwan vwẹ urinrin ro fo odẹ ri Jihova vwọ kẹ;
Ovwan reyọ okẹ rere ovwan yanrhe obaro rọyen.
Ovwan vwẹ uyovwin kpotọ kẹ* Jihova vẹ iwun efuanfon.*
30 Phariẹ vwẹ obaro rọyen, akpọ na eje!
A vwẹ otọrakpọ* na vi kokoroko; e che se ghwiee.*
31 E jẹ idjuvwu na ghọghọ, e jẹ akpọ na ghọghọ;
Ghwoghwo vwẹ ohri rẹ ẹgborho na nẹ: ‘Jihova rhe dia Ovie re!’
32 Jẹ abadi na kugbe obo re vọn evun rọyen eje do;
Jẹ etọ na vẹ kemu kemu rehẹ evun rayen ghọghọ.
33 Vwẹ ọke vuọvo na, e jẹ irhe rẹ egbo na kperi ukperi rẹ aghọghọ vwẹ obaro ri Jihova,
Kidie ọ cha che* rhi guẹdjọ rẹ akpọ na.
34 Vwẹ akpẹvwẹ kẹ Jihova, kidie ọyen ohwo esiri;
Ẹguọnọ rọyen ro jẹ rhẹriẹ na dia bẹdẹ.
35 Ovwan ta, ‘Sivwin avwanre, E Ọghẹnẹ rẹ esivwon rẹ avwanre,
Ghwẹ avwanre koko rere wo sivwin avwanre vwo nẹ ohri ẹgborho na,
Rere avwanre vwẹ akpẹvwẹ kẹ odẹ ọfuanfon wẹn
Rere avwanre jiri uwe vẹ aghọghọ.*
Ihwo na eje da tanẹ, “Isẹ!”* ayen de jiri Jihova.
37 Devid da yanjẹ Esaf vẹ iniọvo rọyen vwo vwẹ etiyin vwẹ obaro rẹ ekpeti rẹ ọphọ ri Jihova na rere ayen rhe gbodibo ọkieje vwẹ obaro rẹ Ekpeti rẹ Ọphọ na, kirobo re ruẹ kẹdi kẹdẹ. 38 Obẹd-idọm vẹ iniọvo rọyen ri bun te 68, vẹ Obẹd-idọm ọmọ ri Jedutọn, kugbe Hosa yen ihwo ri muẹdia anurhoro na; 39 Zedọk orherẹn na kugbe ihwo re vẹ ọyen gba ga kerẹ irherẹn hẹ obaro rẹ itabanako ri Jihova na vwẹ asan ro kpenu na vwẹ Gibiọn 40 rere ayen ze izobo rẹ ẹtorhẹ kẹ Jihova ọkieje vwẹ enu rẹ agbada rẹ izobo rẹ ẹtorhẹ na, urhiọke vẹ ovwọnvwọn, rere ayen ru erọnvwọn eje re si phiyọ Urhi ri Jihova ro ji iji rọyen kẹ Izrẹl. 41 Himan kugbe Jedutọn vẹ ayen herọ kugbe ihwo ri chekọ vwẹ usun rẹ eshare ra sanere, ra vwẹ edẹ rayen se nẹ e kpẹvwẹ Jihova, kidie “ẹguọnọ rọyen ro jẹ rhẹriẹ na dia bẹdẹ”; 42 Himan kugbe Jedutọn vẹ ayen herọ ri hworo ewanre, isimba, kugbe ekuakua re vwo jiri* Ọghẹnẹ rẹ uyota na; emọ ri Jedutọn keyen rha hẹ anurhoro na. 43 Etiyin ihwo na eje de rhivwin kpo uwevwin rayen, Devid da yanran ra nẹrhovwo kẹ evwruwevwin robọ rọyen.