Ẹyano
8 Ọyena vwọ wan nu, Jihova da ta kẹ Mosis: “Bru Fero ra rere wọ ta kẹ, ‘Ọnana yen oborẹ Jihova tare: “Siobọnu ihwo mẹ rere ayen sa vwọ ga vwẹ. 2 Wọ da je sen nẹ wo che siobọnu ayeen, me cha vwẹ igoro vwo gboja kẹ ihwo rẹ Ijipt eje. 3 Urhie ri Nail na cha vọn vẹ igoro, ayen che nẹ evun rọyen rhe, ayen me ro evunrẹ uwevwin wẹn, ivun wẹn, enu rẹ ehwa wẹn, iwevwin rẹ idibo wẹn kugbe ohri rẹ ihwo wẹn, vwẹ ovunu wẹn, kugbe imize wẹn re vwo ruẹ ibrẹdi. 4 Igoro na che bru we rhe, ọtiọyen ji te ihwo wẹn kugbe idibo wẹn ejobi.”’”
5 Ọke vwọ yan obaro, Jihova da ta kẹ Mosis: “Ta kẹ Erọn, ‘Rionbọ wẹn vẹ ọkpọ ro rhe we obọ na phiyọ enu rẹ irhie na, igbo rẹ ame ri Nail na kugbe ivwori na, rere wọ nẹrhẹ igoro na nẹ evun rọyen ro evunrẹ otọ rẹ Ijipt.’” 6 Ọtiọyena Erọn da rionbọ rọyen phia vwẹ enu rẹ ame rẹ Ijipt, igoro na ki nẹ evun rọyen cha, ayen de rhurhu otọ rẹ Ijipt. 7 Ẹkẹvuọvo irherẹn ri ruẹ imajiki na da je reyọ ena rẹ odjahọn rayen vwo ru orọnvwọn vuọvo na, ayen da je nẹrhẹ igoro na ro otọ rẹ Ijipt. 8 Fero de se Mosis vẹ Erọn, ọ da ta: “Rẹ Jihova nẹ o si igoro na nẹ oma mẹ vẹ ihwo mẹ, kidie me guọnọ siobọnu ihwo na yanran rere ayen se vwo ze izobo kẹ Jihova.” 9 Mosis da ta kẹ Fero: “Mi brọghọ nana phiyọ owẹ oma, wọ vwọ vuẹ vwẹ ọke me vwọ rẹ nẹ e si igoro na nẹ oma wẹn, idibo wẹn, ihwo wẹn, kugbe iwevwin wẹn. Urhie ri Nail na ọvo yen i de che chekọ.” 10 Ọ da ta: “Odẹ rọ cha na.” Ọtiọyena Mosis da ta: “Ọ cha dia kirobo wọ tare rere wọ vwọ riẹn nẹ o vwo ohwo ọfa rọ họhọ Jihova Ọghẹnẹ rẹ avwanre naa. 11 Igoro na che nẹ oma wẹn, iwevwin wẹn, idibo wẹn, kugbe ihwo wẹn. Nail na ọvo yen i de che chekọ.”
12 Ọtiọyena Mosis vẹ Erọn de nẹ obaro ri Fero, Mosis da rẹ Jihova kpahen igoro rọ hwarhiẹ rhe Fero na. 13 Jihova de ru kirobo rẹ Mosis nọre, igoro na ki ghwẹ vwevunrẹ iwevwin na, otegodo na, kugbe idju na. 14 Ke koko ayen phiyọ ẹko sansan re se kerii, otọ na ko gbon. 15 Ọke rẹ Fero vwọ mrẹ nẹ oma funro re, o de ru ubiudu rọyen gangan, ọ rha rhọnvwe kerhọ rayeen, kirobo rẹ Jihova tare.
16 Asaọkiephana Jihova da ta kẹ Mosis: “Ta kẹ Erọn, ‘Riẹn ọkpọ wẹn phia rere wọ ghwiẹ ekpẹn rẹ otọ na, ko che hirhephiyọ iwen* vwẹ otọ rẹ Ijipt eje.’” 17 Ayen de ru ọtiọyen. Erọn da rionbọ rọyen phia vẹ ọkpọ rọyen, ọ da ghwiẹ ekpẹn rẹ otọ na, iwen na da rhan mu ihworakpọ vẹ eranvwe. Ekpẹn rẹ otọ na eje da rhe dia iwen vwẹ otọ rẹ Ijipt eje. 18 Irherẹn ri ruẹ imajiki na da davwẹngba rẹ ayen vwo ru emu vuọvo na, rẹ ayen vwọ reyọ ena rẹ odjahọn rayen vwo ru iwen, ẹkẹvuọvo ayen se ruoo. Iwen na da rhan mu ihworakpọ vẹ eranvwe. 19 Ọtiọyena irherẹn ri ruẹ imajiki na da ta kẹ Fero: “Ọnana urhiobọ rẹ Ọghẹnẹ!” Ẹkẹvuọvo Fero ji ruẹ ubiudu gangan, ọ kerhọ rayeen kirobo rẹ Jihova tare.
20 Ọtiọyena Jihova da ta kẹ Mosis: “Vrẹn vwẹ edegburhiọke rere wo mudia obaro ri Fero. Nighere! O kpo obo ame na! Wọ me ta kẹ nẹ, ‘Ọnana yen oborẹ Jihova tare: “Siobọnu ihwo mẹ rere ayen sa vwọ ga vwẹ. 21 Ẹkẹvuọvo wo rhe siobọnu ihwo mẹẹ, mi che ji iyẹn re rhọvwọ ohwo bru we rhe vẹ idibo wẹn kugbe ihwo wẹn; iyẹn na je cha ro evunrẹ iwevwin wẹn, iwevwin rẹ Ijipt ke cha vọn vẹ iyẹn na, ayen cha tobọ rhurhu otọ na rẹ ayen* muẹdia na. 22 Vwẹ ẹdẹ yena ke me cha hẹriẹ otọ ri Goshẹn rẹ ihwo mẹ dia. Uyẹn vuọvo cha dia etiyiin, womarẹ ọnana ku wọ cha riẹn nẹ mẹvwẹ ri Jihova, hẹ etinẹ vwevunrẹ otọ na. 23 Ki mi che phi ofẹnẹ phiyọ uvwre rẹ ihwo mẹ kugbe ihwo wẹn. Oka nana cha vwomaphia odẹ rọ cha na.”’”
24 Jihova de ru ọtiọyen, ekrun rẹ iyẹn buebun ke rua evunrẹ uwevwin ri Fero kugbe iwevwin rẹ idibo rọyen kugbe otọ rẹ Ijipt eje. Iyẹn na de miovwo otọ na. 25 Ukuotọ rọyen, Fero de se Mosis vẹ Erọn, ọ da ta: “Ovwan yanran re ze izobo kẹ Ọghẹnẹ rẹ ovwan vwevunrẹ otọ na.” 26 Ẹkẹvuọvo Mosis da ta: “O yovwirin re vwo ru ọtiọyeen, kidie oborẹ avwanre che vwo ze izobo kẹ Jihova Ọghẹnẹ rẹ avwanre cha dia emu rẹ ẹgua kẹ ihwo rẹ Ijipt. Avwanre de ze izobo rọ dia emu rẹ ẹgua kẹ ihwo rẹ Ijipt vwẹ irharo rayen, ayen rhe phi avwanre? 27 Avwanre cha yan oyan rẹ ẹdẹ erha ro evunrẹ aton na, kẹ avwanre che ze izobo vwẹ etiyin kẹ Jihova Ọghẹnẹ rẹ avwanre kirobo rọ vuẹ avwanre.”
28 Asaọkiephana Fero da ta: “Mi che siobọnu ovwan yanran rere ovwan re ze izobo kẹ Jihova Ọghẹnẹ rẹ ovwan vwevunrẹ aton na. Ẹkẹvuọvo ovwan yan sherẹ kakakaa. Rẹ fiki mẹ.” 29 Ọtiọyena Mosis da ta: “Asaọkiephana me yan nẹ obaro wẹn, ke me cha rẹ Jihova, iyẹn na ki che nẹ oma ri Fero, idibo rọyen, kugbe ihwo rọyen odẹ rọ cha na. Ẹkẹvuọvo e jẹ Fero rha phiẹn avwanree,* rọ vwọ sian nẹ ọyen che siobọnu ihwo na yanran rere ayen re ze izobo kẹ Jihovaa.” 30 Mosis da yan nẹ obaro ri Fero, ọ da rẹ Jihova. 31 Ọtiọyena Jihova de ru nene ota ri Mosis, iyẹn na de nẹ oma ri Fero, idibo rọyen, kugbe ihwo rọyen. Ọvuọvo chekọọ. 32 Ẹkẹvuọvo Fero da rhoma ru ubiudu rọyen ganphiyọ, o rhe siobọnu ihwo naa.