Ẹvwọphia ri Jọn

11 A da kẹ vwẹ ubiurhe rẹ ovwanvwọ ọvo rọ pha kerẹ ọkpọ ọke rọ vwọ ta kẹ vwẹ nẹ: “Vrẹn wọ vwanvwe asan ọfuanfon rẹ uwevwin rẹ ẹga rẹ Ọghẹnẹ na kugbe agbada na kugbe ihwo re ga ẹga vwẹ evun rọyen. 2 Ẹkẹvuọvo vwọ kpahen otegodo rọhẹ otafe rẹ asan ọfuanfon rẹ uwevwin rẹ ẹga na, yan jovwo wọ vwanvwọ-ọ, kidie a reyerọ vwọ kẹ ẹgborho na nure, ayen che chiyin orere ọfuanfon na muotọ vwẹ emeranvwe 42. 3 Ke me cha nẹrhẹ iseri mẹ ivẹ ku iwun rẹ esiso phiyọ je mraro vwẹ ẹdẹ 1,260.” 4 Enana mudiaphiyọ urhe rẹ oliv ivẹ na kugbe igburhukpẹ* ivẹ na, ayen mudia obaro rẹ Ọrovwori rẹ akpọ na.

5 Ọ da dianẹ ohwo ọvo guọnọ wan ayen oma, erhanre ko nẹ unu rayen cha, ọ me torhẹ ivwighrẹn rayen. Ọ da dianẹ ohwo ọvo guọnọ wan ayen oma, enẹ kọyen e che hwe ohwo na wan. 6 Enana vwo ogangan rẹ ayen vwọ kanre enu* na rere osio vwo jẹ rhọ vwẹ uvwre ọke rẹ ayen vwọ mraro na, ayen ji vwo ogangan vwẹ enu rẹ ame na, rẹ ayen vwọ rhẹriẹ ayen kpo ọbara je reyọ koka koka rẹ ọtiekọ vwọ ghwiẹ akpọ na uchabọ rẹ ayen guọnọre.

7 Ọke rẹ ayen de soseri rayen nu, eranvwe rẹ aghwa ro nẹ evunrẹ ukpotọ ro jẹ oba evwo na rhe ko che nene ayen phi ofovwin, ko phi ayen kparobọ ji hwe ayen. 8 Irivwin rayen ke cha dia evunrẹ urhuvwun rode rẹ orere rode na re seri vwọrẹ udje* nẹ Sodọm kugbe Ijipt, asan re de ji hwe Ọrovwori rayen mu urhe. 9 Evo vwẹ usun rẹ ihwo na kugbe uvwiẹ kugbe ẹrẹnvwe* kugbe ẹgborho na ki che ni irivwin rayen vwẹ ẹdẹ erha gbubro, ayen je cha rhọnvwe nẹ e mu irivwin rayen phiyọ ushi-i. 10 Ihwo re dia akpọ na ke cha ghọghọ ji gbudje fiki rayen, ayen je cha vwẹ okẹ rhe ohwohwo, kidie emraro ivẹ nana kpokpo ihwo re dia akpọ na.

11 Ẹdẹ erha gbubro na vwọ wan nu, ẹwẹn rẹ arhọ ro nẹ obọ rẹ Ọghẹnẹ rhe da ro ayen oma, ayen de vrẹn mudia, oshọ rode de mu ihwo re mrẹ ayen. 12 Ayen de nyo urhuru ọgangan ọvo nẹ obodjuvwu rhe rọ ta kẹ ayen nẹ: “Ovwan yanrhe obenu obonẹ.” Ayen de kpo obodjuvwu vwevunrẹ evwru na, ivwighrẹn rayen mrẹ ayen.* 13 Otọ de kpogho gangan vwẹ unọke yena, ẹkẹn ọvo rẹ ẹkẹn ihwe rẹ orere na de she; otọ ro kpoghori na de hwe ihwo 7,000 oshọ de mu ihwo ri chekọ na, ayen da vwẹ urinrin kẹ Ọghẹnẹ rẹ odjuvwu na.

14 Okpetu rode rivẹ na wanre. Nighere! Okpetu rode rerha na cha kpakpata.

15 Amakashe righwrẹn na de hworo owanre* rọyen. E de nyo urhuru egangan vwẹ odjuvwu re tanẹ: “Uvie rẹ akpọ na rhe dia Uvie rẹ Ọrovwavwanre kugbe ọ ri Kristi rọyen re, ko che sun kerẹ ovie rhirin bẹdi bẹdẹ.”

16 Ekpako 24 na ri chidia ekete rayen vwẹ obaro rẹ Ọghẹnẹ de she bọvwọn opharo rhuotọ, ayen da ga Ọghẹnẹ, 17 rẹ ayen vwọ tanẹ: “Avwanre kpẹvwẹ owẹ Jihova* Ọghẹnẹ, Ọromevwẹgba na, ohwo rọ herọ enẹna rọ je herọ rhabae, kidie wọ reyọ ogangan wẹn rode na re, wọ je tuẹn usuon phiyọ kerẹ ovie re. 18 Ẹkẹvuọvo ẹgborho na ki muophu gangan, ophu de ji mu we gangan, ọke re bruphiyọ re che vwo guẹdjọ rẹ ihwo ri ghwuru je hwosa kẹ idibo wẹn re dia emraro na kugbe ihwo efuanfon na kugbe ihwo re djoshọ rẹ odẹ wẹn, te itete te iride, kugbe ọke ra cha vwọ ghwọrọ ihwo re ghwọrọ akpọ na de rhi te.”

19 E de rhie asan ọfuanfon rẹ uwevwin rẹ ẹga rẹ Ọghẹnẹ vwẹ odjuvwu, a da mrẹ okọ rẹ ọphọ rọyen vwẹ asan ọfuanfon rẹ uwevwin rẹ ẹga rọyen na. Enu da nyavwaro, e de nyo urhuru sansan kugbe egbraran, otọ de kpogho, osio rẹ imicho da rhọ gangan.