Ẹsta
4 Ọke rẹ Mọdekai vwo nyo kpahen erọnvwọn eje re ruru na, ọ da bẹrẹ iwun rọyen, o de ku iwun rẹ esiso phiyọ je ghwẹ iwurhie kuoma. Etiyin ọ da yan kpo uherevie rẹ orere na, jẹ ọ viẹ gangan ji beroma. 2 Anurhoro rẹ ovie na ọvo yen ọ yan ba, kidie o vwo ohwo vuọvo ro ku ewun rẹ esiso phiyọ rọ rua anurhoro rẹ ovie naa. 3 Kubrakpọ kubrakpọ rẹ ota rẹ ovie na vẹ iji rọyen teri, ihwo ri Ju na ki muomaphiyọ gangan, jẹ ayen chiri owẹnvwe, viẹ, ji vwerhe oma. Buebun rayen de sherhẹn amwa rẹ esiso vẹ iwurhie. 4 Ọke rẹ idibo rẹ Ẹsta rẹ emetẹ kugbe ichibẹ rọyen vwọ rhe rẹ ayen vwọ vuẹ, ẹwẹn rẹ aye ovie na da yanghan ku. Etiyin ọ da reyọ iwun vwo rhe Mọdekai nẹ o kuphiyọ ukperẹ ewun rẹ esiso rọyen na, ẹkẹvuọvo ọ da sen ayen. 5 Ọtiọyena Ẹsta de se Hetak, ọvo vwẹ usun rẹ ichibẹ rẹ ovie na ro vwo mu nẹ o gbodibo kẹ, ọ da vuẹ nẹ ọ ra riẹn mie Mọdekai oborẹ ọnana mudiaphiyọ kugbe obo re phia.
6 Ọtiọyena Hetak da yanran bru Mọdekai vwẹ ọsuorere rẹ orere na vwẹ obaro rẹ anurhoro rẹ ovie na. 7 Mọdekai da vuẹ kpahen erọnvwọn eje re phia vwọ kẹ kugbe uchunu rẹ igho rẹ Heman veri nẹ ọ cha hwa phiyọ ekpu rẹ igho rẹ ovie na rere a vwọ ghwọrọ ihwo ri Ju. 8 Mọdekai je vwẹ ọfa rẹ ọbe rẹ iji re siri vwẹ Shushan,* ra vwọ ghwọrọ ayen vwọ kẹ. Ọ cha reyọ vwọ nẹ Ẹsta je nabọ djefiotọ kẹ, ọ me vuẹ nẹ ọ yan bru ovie na ra ra rẹ vwọ kẹ ẹroesiri rọyen, ọ me je rẹ fikirẹ ihwo rọyen.
9 Hetak de rhivwin rhe, ọ da vuẹ Ẹsta oborẹ Mọdekai tare. 10 Ẹsta da kpahen kẹ Hetak vẹ ovuẹ rọ cha vuẹ Mọdekai nẹ: 11 “Idibo rẹ ovie na eje kugbe ihwo rehẹ ubrakpọ sansan rẹ ovie na suẹn riẹnre nẹ ọ da dianẹ kọshare kọshare yẹrẹ kaye kaye ro otegodo rẹ obevun rẹ uwevwin rẹ ovie na jẹ ọ dia e seree, urhi vuọvo yen muro: A cha teyọn hwe; ọ sa rhọ ọ da dianẹ ovie na riẹn ọkpọ rẹ oro rọyen vwọ kẹ. Etiyin ẹdẹ 30 re, e ji rhi se vwe bru ovie na raa.”
12 Ọke ra vwọ vuẹ Mọdekai oborẹ Ẹsta tare, 13 ọ da kpahen kẹ Ẹsta: “Wo roro nẹ kidie nẹ wọ hẹ evwruwevwin rẹ ovie na ku wo che sivwin rhọ vrẹ ihwo ri Ju ri chekọ ọke re de che hwe ayeen. 14 Kidie wo de fotovwin vwẹ ọke nana, omaerovwon kugbe esivwon che bru ihwo ri Ju na vwo nẹ asan ọfa rhe, ẹkẹvuọvo wẹ vẹ uwevwin rẹ ọsẹ wẹn cha ghwọrọ kufia. Kẹ ono yen riẹnre sẹ fikirẹ ọke ọtiọna yen nẹrhẹ wọ dia ẹdia rẹ aye rẹ ovie ru wọ hepha na?”
15 Etiyin Ẹsta da kpahen kẹ Mọdekai nẹ: 16 “Yanran, koko ihwo ri Ju eje ra mrẹre vwẹ Shushan,* rere ovwan chiri owẹnvwe fiki mẹ. Ovwan ria yẹrẹ da vwẹ ẹdẹ erhaa te ason te uvo. Mẹvwẹ vẹ idibo mẹ rẹ emetẹ ji che chiri owẹnvwe. Me cha yan bru ovie na ra, dede nẹ ọ vwọso urhi na, ọ da dianẹ mi che ghwu, ki mi ghwu.” 17 Ọtiọyena Mọdekai da yanran re ru erọnvwọn eje rẹ Ẹsta vuẹrẹ nẹ o ru.