Diutaronomi
33 Asaọkiephana ọnana yen ebruphiyọ rẹ Mosis ohwo rẹ Ọghẹnẹ rẹ uyota na ghwoghwo vwọ kẹ ihwo rẹ Izrẹl tavwen o ki ghwu. 2 Ọ da ta:
“Jihova—Sainai yen o nurhe,
O de lo mu ayen vwo nẹ Siẹ rhe.
O lo phia vẹ urinrin vwo nẹ ekogho rẹ igbenu ri Peran rhe,
Uri mane uri rẹ ihwo efuanfon* vẹ ọyen herọ,
Egba ofovwin rọyen hẹ obọrhen rọyen.
3 O vwo ẹguọnọ rẹ ihwo rọyen;
Ihwo efuanfon rayen eje hẹ obọ wẹn.
Ayen chidia asan awọ wẹn;
Kẹ ayen kerhọ rẹ eta wẹn.
4 (Mosis kẹ avwanre iji, urhi,
Kerẹ ughwẹ rẹ ọghwẹgbe ri Jekọp.)
6 E jẹ Rubẹn dia akpọ, e jẹ o ghwẹẹ,
E jẹ eshare rọyen hanvwaa.”
7 O de ghwoghwo ebruphiyọ nana kpahen Juda:
“E Jihova, nyo urhuru ri Juda,
Wọ reyọ rhivwin bru ihwo rọyen rhe.
Abọ rọyen chochọn rẹ* obo re dia ọrọyen re,
Wọ me je vwẹ ukẹcha kẹ vwọ họnre ivwighrẹn rọyen.”
8 Vwọ kpahen Livae, ọ da ta:
“Yurim vẹ Tọmim wẹn* e rẹ ohwo rọ fuevun kẹ wẹ,
Ọ ru wọ davwen ni vwẹ Masah.
Wẹ vẹ ọyen da tuẹn ohọnre phiyọ vwẹ asan ame ri Mẹriba,
9 Ohwo rọ ta kpahen ọsẹ vẹ oni rọyen nẹ, ‘Mi muoghọ kẹ ayeen.’
Ọ tobọ sen iniọvo rọyen,
O de chukoku emọ robọ rọyen.
Kidie ayen sẹro rẹ eta wẹn,
Ayen de ji ru nene ọphọ wẹn.
10 E jẹ ayen yono Jekọp orhiẹn-ebro wẹn
Ji yono Izrẹl Urhi wẹn.
E jẹ ayen torhẹ insẹnsi kerẹ ọnrhe ọvwevwerhen vwọ kẹ wẹ*
Je vwẹ izobo ọsoso vwọ kpahotọ vwẹ agbada wẹn.
11 E Jihova, bruba ogangan rọyen,
Rere wo dje omavwerhovwẹn phia kpahen iruo rẹ obọ rọyen.
Guọghọ awọ* rẹ ihwo re kpare vwọsuọ,
Rere ihwo ri vwo utuoma kpahọn vwo jẹ evrẹn ọfa.”
12 Vwọ kpahen Bẹnjamin, ọ da ta:
“E jẹ ọ rẹ Jihova vwo ẹguọnọ rọyen na dia kẹrẹ vwọrẹ ofuvwegbe;
Ro vwo nene dia vwẹ ọsoso rẹ ẹdẹ na,
Ọ cha dia uvwre rẹ igabọ rọyen.”
13 Vwọ kpahen Josẹf, ọ da ta:
“E jẹ Jihova ku ebruphiyọ ku otọ rọyen
Vẹ erọnvwọn iyoyovwin rẹ idjuvwu na,
Vẹ irho kugbe ame ri nẹ ogbugbu rehẹ otọ na cha,
14 Vẹ erọnvwọn iyoyovwin rẹ ọnre na nẹrhẹ e djẹ
Kugbe emamọ iyoyovwin rẹ kemeranvwe kemeranvwe,
15 Vẹ erọnvwọn ri me yovwin ri nẹ igbenu rẹ awanre na* rhe
Kugbe erọnvwọn iyoyovwin rẹ igbenu itete re herọ nẹ ọke nana re duvwun ọke rọ cha vwẹ obaro na shesheri,
16 Vẹ erọnvwọn iyoyovwin rẹ otọrakpọ na kugbe obo re vọn evun rọyen,
Vẹ ọrhọnvwephiyọ rẹ Ohwo rọ vwomaphia vwẹ umurhe ro vwo inwe na.
E jẹ ayen rhe enu rẹ uyovwin ri Josẹf,
Enu rẹ ekrekruyovwin rẹ ọ ra sanere vwo nẹ ohri rẹ iniọvo rọyen rhe na.
17 Ẹgba rọyen pha kerẹ ọ rẹ ọmọkpako rẹ erhuẹn,
Idjo rọyen idjo rẹ erhuẹn rẹ aghwa.
Ọ cha vwẹ ayen vwo genre* ihwo
O che genre ayen re te oba rẹ akpọ na.
Ayen uriorin ihwe buebun rẹ Ifrem,
Ayen jẹ uriorin buebun ri Manasẹ.”
18 Vwọ kpahen Zẹbulọn, ọ da ta:
Ghọghọ E Zẹbulọn, ọke wọ da yan phia,
Ọtiọyen ji te we Isaka, vwevunrẹ itughẹ wẹn.
19 Ayen che se ihwo vwo kpo ugbenu na.
Etiyin ayen de che ze izobo rẹ ophiọnphiọn.
Kidie ayen cha reyọ vwo nẹ efe gbidiki* rẹ abadi na rhe
Vẹ efe re sinu rẹ ekpẹn na.”
20 Vwọ kpahen Gad, ọ da ta:
Ebruphiyọ kẹ ohwo ro ruẹ ughwru ri Gad hẹrẹphiyọ.
Ọ hwa phiyọ kerẹ okpohrokpo,
O muegbe rọ vwọ fian obọ na no, e, ekrekruyovwin na.
21 Ọ cha sane ẹkẹn rẹsosuọ na kẹ oma rọyen,
Kidie etiyin a sẹro rẹ ẹkẹn rẹ ojurhi phiyọ
Igbuyovwin rẹ ihwo na che koko.
O che dje ophiọnphiọn ri Jihova phia,
Kugbe orhiẹn-ebro rọyen vẹ Izrẹl.”
22 Vwọ kpahen Dan, ọ da ta:
“Dan ọyen ọmọ rẹ okpohrokpo.
O che pho vwo nẹ Beshan rhe.”
23 Vwọ kpahen Naftalai, ọ da ta:
“Ọrhọnvwephiyọ na vọn Naftalai evun
Ọ vọnre vẹ ebruphiyọ ri Jihova.
Re ughwẹ rẹ ẹbẹre ọnre shera vẹ obọrhen ọnre na.”
24 Vwọ kpahen Asha, ọ da ta:
“Ọghẹnẹ vwẹ emọ buebun vwo bruba kẹ Asha.
E jẹ ọ mrẹ ẹroesiri rẹ iniọvo rọyen,
E jẹ o duvwun awọ rọyen phiyọ evwri.
25 Utehru vẹ ẹrovwo yen wọ vwọ kanra ẹchẹ,
Wọ cha dia vwọrẹ ofuvwegbe vwẹ ẹdẹ wẹn eje.*
26 O vwo ohwo ọfa rọ họhọ Ọghẹnẹ rẹ uyota ri Jẹshurọnii,
Rọ gua wan idjuvwu na rọ vwọ cha wẹ uko
Rọ je gua vwẹ enu rẹ evwru na vwẹ ọrho rọyen.
27 Ọghẹnẹ ọyen adjarhọ vwo nẹ ọke awanre rhe,
Abọ ri bẹdẹ rọyen hẹ obotọ wẹn.
Ọ cha djẹ ivwighrẹn na yanran vwo nẹ obaro wẹn,
Kọ je cha tanẹ, ‘Ghwọrọ ayen!’
28 Izrẹl cha dia vwọrẹ ofuvwegbe,
A cha djahen ogbugbu ri Jekọp
Vwẹ otọ rẹ eka vẹ iwaini kpokpọ,
Rẹ evwru rọyen che sun nẹ irharheghe na rhe.
29 Omavwerhovwẹn dia kẹ wẹ, E Izrẹl!
Ono yehẹ etiyin rọ họhọ owẹ,
Ihwo re riavwerhen rẹ usivwin vwevunrẹ Jihova,
Ekpọfia rẹ ochọnvwe wẹn
Kugbe ọlọkọ rode wẹn na?
Ivwighrẹn wẹn cha djẹ ro vẹ oshọ vwẹ obaro wẹn,
Ku wo che chiyin ugbuko* rayen.”