Job

1 O vwo ọshare ọvo vwẹ otọ rẹ Ọz rẹ odẹ rọyen dia Job.* Ọyen ohwo ọsoso ro vwo ọyọnregan;* ọ djoshọ rẹ Ọghẹnẹ je sian obo re brare. 2 Emeshare ighwrẹn vẹ emetẹ erha yen e vwiẹ kẹ. 3 Ichuru rọyen bun te igodẹ 7,000, ikamẹl 3,000, erhuẹn 1,000,* kugbe ekẹkẹtẹ* 500, idibo rọyen ji bun mamọ, ọtiọyena ọ da rhe dia ohwo rọ ma rho kparobọ vwẹ usun rẹ ihwo eje re dia Ẹbẹre Ọnre Va Nẹcha na.

4 Emọ rọyen emeshare ọvuọvo mi muegbe rẹ udemu phiyotọ vwẹ uwevwin rọyen vwẹ ẹdẹ ro bruphiyọ.* Ayen mi durhie iniọvo rayen emetẹ erha na nẹ i rhi nene ayen re je da. 5 Ayen eje de se use rẹ udemu gba re, Job mi se ayen nẹ ayen bru ọyen rhe rere o ru ayen fon. O mi vrẹn vwẹ edegburhiọke, o mi ze izobo rẹ ẹtorhẹ fikirẹ ayen ọvuọvo. Kidie Job me ta: “Ọkiọvo emọ mẹ ru umwemwu je hanrhe Ọghẹnẹ vwẹ ubiudu rayen.” Ọnana yen oborẹ Job ruẹ ọkieje.

6 Asaọkiephana ẹdẹ na de rhi te rẹ emọ rẹ Ọghẹnẹ rẹ uyota na* vwọ rhe reyọ ẹdia rayen vwẹ obaro ri Jihova, Eshu da je ro ohri rayen.

7 Etiyin Jihova da ta kẹ Eshu: “Tivọ wo nẹ cha?” Eshu da kpahen kẹ Jihova: “Me yancha yankpo vwẹ otọrakpọ na ji ghoro vwẹ evun rọyen.” 8 Jihova da ta kẹ Eshu: “Wo vwo oniso rẹ* odibo mẹ Job re? O vwo ohwo vuọvo rọ họherọ vwẹ otọrakpọ naa. Ọyen ohwo ọsoso ro vwo ọyọnregan,* ọ djoshọ rẹ Ọghẹnẹ je sian obo re brare.” 9 Etiyin Eshu da kpahen kẹ Jihova: “Job de djoshọ rẹ Ọghẹnẹ? 10 Ọ dia owẹ yen gbogba rẹ ochọnvwe riariẹ phiyọ vẹ uwevwin rọyen kugbe erọnvwọn ejobi ro vwori? Wo bruba iruo rẹ obọ rọyen, ichuru rọyen je hrabọ nene otọ na. 11 Ẹkẹvuọvo vwọ kẹ ewene, rionbọ wẹn phia rere wọ ghwiẹ kemu kemu ro vwori, vwọrẹ imuẹro, ọ cha hanrhe owẹ vwẹ obaro wẹn.”* 12 Ọtiọyena Jihova da ta kẹ Eshu: “Nighere! Kemu kemu ro vwori eje hẹ obọ wẹn.* Ẹkẹvuọvo wọ vwẹ obọ wẹn te ọshare na komobọọ!” Ọtiọyena Eshu de vrẹn nẹ obaro* ri Jihova.

13 Asaọkiephana vwẹ ẹdẹ rẹ emọ rọyen emeshare vẹ emetẹ vwọ riemu je da iwaini vwẹ uwevwin rẹ oniọvo rayen ọmọshare ọkpako, 14 odibo ọvo de bru Job rhe, ọ da ta: “Erhuẹn na voro jẹ ekẹkẹtẹ na ria odin kẹrẹ ayen 15 ihwo ri Sabi da rhe họnre avwanre, ayen de mu ayen reyọ, ayen da vwẹ ọlọkọ vwo hwe idibo na. Mẹvwẹ ọvo yen djẹ vabọ rhe vuẹ wẹ na.”

16 Rọ je vwọ ta ota na, ọfa da rhe, ọ da ta: “Erhanre ro nẹ obọ rẹ Ọghẹnẹ rhe she nẹ idjuvwu na rhe, ọ da la vwẹ ohri rẹ igodẹ na vẹ idibo na, ọ da torhẹ ayen! Mẹvwẹ ọvo yen djẹ vabọ rhe vuẹ wẹ na.”

17 Rọ je vwọ ta ota na, ọfa da rhe, ọ da ta: “Ihwo ri Kaldia rhuẹrẹ oma phiyọ ẹko erha, ayen de rhi gborho ikamẹl na, ayen de mu ayen reyọ, ayen da vwẹ ọlọkọ vwo hwe idibo na. Mẹvwẹ ọvo yen djẹ vabọ rhe vuẹ wẹ na.”

18 Rọ je vwọ ta ota na, ọfa da je rhe, ọ da ta: “Emọ wẹn emeshare vẹ emetẹ riemu je da iwaini vwẹ uwevwin rẹ oniọvo rayen ọmọshare ọkpako. 19 Siẹvuọvo na, odju ọgangan de dju nẹ aton na rhe, o de dju igogo ẹne rẹ uwevwin na, uwevwin na de she teyen ighene na, ayen de ghwu. Mẹvwẹ ọvo yen djẹ vabọ rhe vuẹ wẹ na.”

20 Etiyin Job de vrẹn, ọ da bẹrẹ iwun rọyen, o de bru ẹton rẹ uyovwin rọyen; o de she teyen otọ je bọvwọn opharo rhuotọ 21 ọ da ta:

Jihova kẹre, Jihova je reyọ.

E jẹ e rhe jiri odẹ ri Jihova.”

22 Vwẹ enana eje na, Job ru umwemwu yẹrẹ kọ tanẹ Ọghẹnẹ ru emu vuọvo rọ chọree.*