Ọbe Rẹsosuọ rẹ Ikun Rivie

15 Kọ bọn iwevwin kẹ oma rọyen vwẹ Orere ri Devid, o de muegbe rẹ asan vwọ kẹ Ekpeti rẹ Ọphọ rẹ Ọghẹnẹ rẹ uyota na, ọ da bọn utughẹ vwọ kẹ. 2 Etiyin Devid da tanẹ: “E jẹ ohwo vuọvo muẹ Ekpeti rẹ Ọphọ rẹ Ọghẹnẹ rẹ uyota naa, jokparẹ ihwo ri Livae na, kidie Jihova sane ayen rẹ ayen vwo mu Ekpeti rẹ Ọphọ ri Jihova na ji gbodibo kẹ ọyen ọkieje.” 3 Devid de se Izrẹl eje koko vwẹ Jerusalẹm rere e mu Ekpeti rẹ Ọphọ ri Jihova na rhe asan ro muegbe rọyen kẹ.

4 Devid de koko emọ rẹ Erọn kugbe ihwo ri Livae na: 5 vwo nẹ ihwo ri Kohat, Yuraẹl osun kugbe ihwo rẹ orua rọyen 120; 6 vwo nẹ emọ ri Mẹrerai, Asaya osun kugbe ihwo rẹ orua rọyen 220; 7 vwo nẹ emọ ri Gẹshọm, Joẹl osun kugbe ihwo rẹ orua rọyen 130; 8 vwo nẹ emọ rẹ Ẹlizefan, Shẹmaya osun kugbe ihwo rẹ orua rọyen 200; 9 vwo nẹ emọ ri Hẹbrọn, Iliẹl osun kugbe ihwo rẹ orua rọyen 80; 10 vwo nẹ emọ rẹ Ọziẹl, Aminadab osun kugbe ihwo rẹ orua rọyen 112. 11 Kpobarophiyọ, Devid de se Zedọk kugbe Abayata irherẹn na vẹ ihwo ri Livae na Yuraẹl, Asaya, Joẹl, Shẹmaya, Iliẹl, kugbe Aminadab, 12 ọ da ta kẹ ayen nẹ: “Ovwan yen igbuyovwin rẹ iwevwin rẹ esẹ rẹ ihwo ri Livae na. Ovwan ru oma rẹ ovwan fon, te ovwan te iniọvo rẹ ovwan* rere ovwan mu Ekpeti rẹ Ọphọ ri Jihova Ọghẹnẹ rẹ Izrẹl kpo asan ri mi muegbe rọyen kẹ na. 13 Kidie nẹ ovwan muro vwẹ ọke rẹsosuọọ na, ophu de mu Jihova Ọghẹnẹ rẹ avwanre kpahen avwanre, kidie avwanre muro vwo nene obo* ro fori nẹ e muo waan.” 14 Ọtiọyena irherẹn na kugbe ihwo ri Livae na de ru oma rayen fon rere ayen re mu Ekpeti rẹ Ọphọ ri Jihova Ọghẹnẹ rẹ Izrẹl na rhe.

15 Etiyin ihwo ri Livae na da vwẹ ekpọ rẹ Ekpeti rẹ Ọphọ rẹ Ọghẹnẹ rẹ uyota na vwo muo phiyọ igabọ rayen, vwo nene iji ri Jihova rẹ Mosis vwọ phia. 16 Devid da vuẹ isun rẹ ihwo ri Livae na nẹ ayen vwẹ iniọvo rayen vwo mu ibuine rere ayen so ine vẹ aghọghọ, jẹ ayen hworo ihwehworo: ekuakua uhworo ri vwo ifi tẹnrẹnrẹn, ihapu, kugbe isimba.

17 Ọtiọyena ihwo ri Livae na da vwẹ Himan ọmọ ri Joẹl mu vwẹ usun rẹ iniọvo rọyen, Esaf ọmọ ri Berakaya, vwẹ usun rẹ emọ ri Mẹrerai iniọvo rayen, Itan ọmọ ri Kushaya. 18 Iniọvo rayen rehẹ ẹko rivẹ na vẹ ayen yen gba herọ, Zẹkaraya, Bẹn, Jeheziẹl, Shẹmiramọt, Jehaiyẹl, Ọnai, Elayab, Bẹnaya, Measaya, Matataya, Ẹlifẹlẹhu, kugbe Miknia kugbe Obẹd-idọm vẹ Jehaẹl ihwo ri muẹdia phiyọ anurhoro na. 19 Ibuine Himan, Esaf, kugbe Itan che hworo isimba rẹ ẹrovwo na; 20 Zẹkaraya, Eziẹl, Shẹmiramọt, Jehaiyẹl, Ọnai, Elayab, Measaya, kugbe Bẹnaya hworo ekuakua rẹ uhworo ri vwo ifi tẹnrẹnrẹn ra chahen kpo ẹdia rọ da vwẹ edo ro kpenu vwọ phia;* 21 Matataya, Ẹlifẹlẹhu, Miknia, Obẹd-idọm, Jehaẹl, kugbe Azazaya hworo ihapu ra chahen kpo ẹdia rọ da vwẹ edo ro kpotọ vwọ phia,* rẹ ayen vwọ dia kerẹ ihwo re vwẹrote. 22 Kenanaya onotu rẹ ihwo ri Livae na yen vwẹrote emuo na, kidie ọ nabọ riẹn obo re muo wan, 23 Berakaya kugbe Ẹlkena yen muẹdia anurhoro rẹ Ekpeti rẹ Ọphọ na. 24 Irherẹn Shẹbanaya, Jọshafat, Nẹtanẹl, Amesai, Zẹkaraya, Bẹnaya, kugbe Ẹlihiza hworo ewanre gangan vwẹ obaro rẹ Ekpeti rẹ Ọphọ rẹ Ọghẹnẹ rẹ uyota na, Obẹd-idọm kugbe Jehaya je ga kerẹ ihwo ri muẹdia anurhoro rẹ Ekpeti rẹ Ọphọ na.

25 Etiyin Devid kugbe ekpako rẹ Izrẹl kugbe inotu rẹ uriorin na da yanran re mu ekpeti rẹ ọphọ ri Jihova na nẹ uwevwin rẹ Obẹd-idọm rhe vẹ aghọghọ. 26 Kidie nẹ Ọghẹnẹ rẹ uyota na vwẹ ukẹcha kẹ ihwo ri Livae ri muẹ ekpeti rẹ ọphọ ri Jihova na, ayen da vwẹ emọ rẹ erhuẹn ighwrẹn kugbe egbon ighwrẹn vwo ze izobo. 27 Devid ku ewun ro jẹ abọ evwo ra vwẹ omamọ rẹ amwa vwo ru phiyọ, ọtiọyen ji te ihwo ri Livae na eje ri muẹ Ekpeti rẹ Ọphọ na, ibuine na, kugbe Kenanaya onotu rẹ ihwo ri mu Ekpeti rẹ Ọphọ na kugbe ibuine na; Devid ji ku ẹfọd ra vwẹ amwa* ko phiyọ. 28 Ihwo rẹ Izrẹl eje ki muẹ ekpeti rẹ ọphọ ri Jihova na cha vẹ ukperi rẹ aghọghọ vẹ edo rẹ ọgban, ewanre, isimba, jẹ ayen hworo ekuakua rẹ uhworo ri vwo ifi tẹnrẹnrẹn gangan kugbe ihapu.

29 Ẹkẹvuọvo ọke re vwo mu ekpeti rẹ ọphọ ri Jihova na rhe Orere ri Devid, Maikal ọmọtẹ ri Sọl da dia ovakpo de ni, ọ da mrẹ Ovie Devid ro pho cha pho kpo, jọ ghọghọ; Maikal kọ jẹfia vwẹ ubiudu rọyen.