Ẹyano

28 “Wo mi se oniọvo wẹn Erọn vẹ emeshare rọyen vwo nẹ ohri rẹ ihwo rẹ Izrẹl, rere ọ ga kerẹ orherẹn kẹ vwẹ—Erọn, ọ vẹ Nedab kugbe Abaihu, Ẹlieza kugbe Itama, emeshare rẹ Erọn. 2 Wo mi ru iwun rẹ orherẹn* vwọ kẹ oniọvo wẹn Erọn, vwọ kẹ urinrin vẹ erhuvwu. 3 Wọ me ta ota kẹ ihwo eje re tẹn ona,* ihwo ri mi ku ẹwẹn rẹ aghwanre ku, ayen mi ru iwun rẹ Erọn vwọ kẹ orufon rọyen, rere ọ sa vwọ ga kerẹ orherẹn kẹ vwẹ.

4 “Enana yen iwun rẹ ayen che ru: orhurhudu, ẹfọd, ikotu ro jẹ abọ evwo, ewun ogrongron rẹ ishẹki, ọpharuyovwin rẹ oghẹresan, kugbe umuehun; ayen che ru iwun rẹ orherẹn nana vwọ kẹ oniọvo wẹn Erọn kugbe emeshare rọyen, rere ọ sa vwọ ga kerẹ orherẹn kẹ vwẹ. 5 Ewena na cha vwẹ oro, oruru rẹ iblu, ẹton rẹ ogodẹ rẹ ipọpo, amwa ọvwavware, kugbe amwa oyoyovwin na vwo ruiruo.

6 “Ayen me vwẹ oruru rẹ oro, oruru rẹ iblu, ẹton rẹ ogodẹ rẹ ipọpo, amwa ọvwavware, kugbe amwa oyoyovwin re meri vwo ru ẹfọd na, ayen mi rhuon. 7 O che vwo abọ ivẹ re ku kugbe vwẹ obenu rẹ igabọ na. 8 Umuehun re rhuonri re ru phiyọ ẹfọd na ra vwọ nabọ churo kokoroko na me dia obo ra je vwẹ erọnvwọn vuọvo nana vwo ru: oruru rẹ oro, oruru rẹ iblu, ẹton rẹ ogodẹ rẹ ipọpo, amwa ọvwavware, kugbe amwa oyoyovwin re meri.

9 “Wọ me reyọ ibiukuta rẹ ọniks ivẹ rere wọ kare edẹ rẹ emọ rẹ Izrẹl phiyọ ayen, 10 edẹ esan me dia ubiukuta ọvo, edẹ esan ri chekọ na me rha dia ubiukuta ro chekọ na, vwo nene obo re vwiẹ ayen wan. 11 Ohwo rọ kara erọnvwọn phiyọ ukuta me kare edẹ rẹ emọ rẹ Izrẹl phiyọ ibiukuta ivẹ na, kirobo rọ kara erọnvwọn phiyọ utẹ. Wo de ru ọyena nu, wo mi phi ayen phiyọ erọnvwọn ra vwẹ oro vwo ru. 12 Wo mi phi ibiukuta ivẹ na phiyọ igabọ rẹ ẹfọd na kerẹ ibiukuta rẹ ẹkarophiyọ vwọ kẹ emọ rẹ Izrẹl, Erọn mi mu edẹ rayen vwẹ obaro ri Jihova vwẹ igabọ rọyen ivẹ na kerẹ ẹkarophiyọ. 13 Wọ me vwẹ oro vwo ru erọnvwọn re che phi ibiukuta na phiyọ 14 kugbe ejọnrọn ivẹ ra vwẹ uvi rẹ oro vwo ru, kerẹ ufi re meri, wo mi churu ejọnrọn na si erọnvwọn ra vwẹ oro vwo ru na.

15 “Wọ me vwẹ ohwo ro rhuon emwa vwo ru orhurhudu rẹ ẹdjọeguo na. A me vwẹ oruru rẹ oro, oruru rẹ iblu, ẹton rẹ ogodẹ rẹ ipọpo, amwa ọvwavware, kugbe amwa oyoyovwin re meri vwo rhuon kerẹ ẹfọd na. 16 Ẹbẹre ẹne rọyen me dia abavo siẹrẹ e de kpirhon obọ ovo, ugrongron rọyen me dia omarẹ isẹntimita 22,* ohẹhẹre rọyen me je dia ọtiọyen. 17 Wọ me rhuẹrẹ ibiukuta phiyọ, irhiẹ ẹne rẹ ibiukuta. Rubi, topaz, kugbe ẹmerad yen cha dia urhiẹ rẹsosuọ na. 18 Tọkuẹs, safaya, kugbe jaspa yen cha dia urhiẹ rivẹ na. 19 Ubiukuta ri lẹshẹm,* aget, kugbe ametist yen cha dia urhiẹ rerha na. 20 Krisolait, ọniks, kugbe jed keyen rha dia urhiẹ rẹne na. A me rhuẹrẹ ayen phiyọ erọnvwọn ra vwẹ oro vwo ru na. 21 Ibiukuta na mi shephiyọ vẹ edẹ rẹ emọ 12 rẹ Izrẹl. A me kare odẹ phiyọ ayen ọvuọvo kerẹ utẹ. Odẹ ọvuọvo mudiaphiyọ ọvo vwẹ usun rẹ uvwiẹ 12 na.

22 “Wo mi ru ejọnrọn re meri phiyọ orhurhudu na kerẹ ifi rẹ uvi rẹ oro. 23 Wọ me vwẹ oro vwo ru isa ivẹ vwọ kẹ orhurhudu na, rere wo phi ayen phiyọ ọkọkọ ivẹ rẹ obenu rẹ orhurhudu na. 24 Wo mi duvwun ifi rẹ oro ivẹ na wan isa ivẹ rehẹ ọkọkọ rẹ orhurhudu na. 25 Wo mi duvwun ẹbẹre ivẹ ri chekọ vwẹ ifi ivẹ na wan erọnvwọn ivẹ ra vwẹ oro vwo ru na, wo mi ku ayen kugbe abọ rẹ ẹfọd na vwẹ obaro. 26 Wọ me vwẹ oro vwo ru isa ivẹ, wo mi phi ayen phiyọ oberivwin rẹ orhurhudu na, vwẹ erhọ ivẹ rẹ obotọ rọyen, isa na mi hirharoku ẹfọd na. 27 Wọ me vwẹ oro vwo ru isa ivẹ efa phiyọ obaro rẹ ẹfọd na, vwẹ obotọ rẹ obaro rẹ ẹfọd na, kẹrẹ asan re de ku ayen kugbe vwẹ obenu rẹ umuehun rẹ ẹfọd na re rhuonri. 28 Wọ me vwẹ ufi rẹ iblu vwọ yọnrọn orhurhudu na phiyọ ẹdia, wọ me reyọ vwọ gba isa rẹ orhurhudu na si isa rẹ ẹfọd na. Ọnana cha nẹrhẹ orhurhudu na daji asan ọvo vwẹ enu rẹ ẹfọd na, vwẹ obenu rẹ umuehun re rhuonri na.

29 “Erọn mi mu edẹ rẹ emọ rẹ Izrẹl rehẹ orhurhudu rẹ ẹdjọeguo na phiyọ udu rọyen ọke rọ da rhe Asan Ọfuanfon na, kerẹ ẹkarophiyọ vwẹ obaro ri Jihova ọkieje. 30 Wo mi phi Yurim vẹ Tọmim* na phiyọ evunrẹ orhurhudu rẹ ẹdjọeguo na, ayen me dia enu rẹ udu rẹ Erọn ọke rọ da rhe obaro ri Jihova, Erọn mi mu obo re vwo brorhiẹn rẹ ihwo rẹ Izrẹl kpahen udu rọyen vwẹ obaro ri Jihova ọkieje.

31 “Wọ me vwẹ oruru rẹ iblu vwo rhuon ọsoso rẹ ikotu rẹ ẹfọd ro jẹ abọ evwo na. 32 O che vwo asan ro rhiephiyọ vwẹ uherevie rẹ obenu rọyen. Ohwo ro rhuon emwa mi rhuon asan ro rhiephiyọ na riariẹ.* Ọ me dia kerẹ asan ro rhiephiyọ vwẹ ewun rẹ isodje ro vwo itehru rere o vwo jẹ ẹbẹrẹ. 33 Wọ me vwẹ oruru rẹ iblu, ẹton rẹ ogodẹ rẹ ipọpo, kugbe amwa ọvwavware vwo ru ipọmigranẹti riariẹ ejọjọ rọyen phiyọ, ọ vẹ igogo rẹ iro vwẹ uvwre rayen. 34 Wo mi ru agogo rẹ oro vẹ ipọmigranẹti ọvo vwọ kpahen ohwohwo, agogo rẹ oro vẹ ipọmigranẹti ọfa vwọ kpahen ohwohwo, ọtiọtiọyen wo che ruo riariẹ ejọjọ rẹ ikotu ro jẹ abọ evwo na phiyọ. 35 Erọn mi kuophiyọ rere o se vwo gbodibo, e mi nyo edo ro nẹ evun rọyen cha ọke rọ da rua asan ọfuanfon na vwẹ obaro ri Jihova, kugbe ọke ro de nẹ evun rọyen cha rere o vwo jeghwo.

36 “Wo mi ru ophapha rẹ uvi rẹ oro ro lo, wọ me kare eta nana phiyọ kirobo rẹ ohwo kara erọnvwọn phiyọ utẹ: ‘Ofuanfon ọ ri Jihova.’ 37 Wọ me vwẹ ufi rẹ iblu vwo churo mu ọpharuyovwin rẹ oghẹresan na; ọ me dia obaro rẹ ọpharuyovwin rẹ oghẹresan na ọkieje. 38 Ọ me dia arhare rẹ Erọn, Erọn mi mu oghwa na ọke rẹ ohwo de ru umwemwu vwọso ekuakua efuanfon na rẹ ihwo Izrẹl ru fon ọke rẹ ayen vwọ vwẹ ayen kpahotọ kerẹ okẹ efuanfon. Ọ me dia arhare rọyen ọkieje rere ayen se vwo vwo ẹroesiri ri Jihova.

39 “Wo mi rhuon ewun ogrongron rẹ isheki ra vwẹ amwa oyoyovwin vwo ru, wọ me vwẹ amwa oyoyovwin vwo ru ọpharuyovwin rẹ oghẹresan, wo mi ji ru umuehun re rhuonri.

40 “Wo mi ji ru iwun igrongron, umuehun, kugbe ọpharuyovwin vwọ kẹ emeshare rẹ Erọn, fikirẹ urinrin vẹ erhuvwu. 41 Wo mi ku ayen phiyọ oniọvo wẹn Erọn vẹ emeshare rọyen, wo mi ku evwri ku ayen, vwẹ ayen mu,* ji ru ayen fon, rere ayen ga kerẹ irherẹn vwọ kẹ vwẹ. 42 Wọ me je vwẹ amwa oyoyovwin vwo ru iwun rẹ agada* vwọ kẹ ayen vwo rhurhu ẹban rayen. Enana mi nẹ ehun re te ekpoghawọ. 43 Erọn vẹ emeshare rọyen mi ku enana phiyọ ọke rẹ ayen da rhe utughẹ ra da vwoma na yẹrẹ ọke rẹ ayen de kpo asan agbada na re gbodibo vwẹ asan ọfuanfon na, rere ayen vwo jẹ abe ẹriọ, ayen de rhi ghwu. Ọnana urhi ri bẹdẹ vwọ kẹ Erọn vẹ emọ* rọyen re cha vwẹ obuko.