Mak

14 Asaọkiephana ẹdẹ ivẹ yen chekọ ke che ru Orẹ rẹ Ọwanvrẹ kugbe Orẹ rẹ Ibrẹdi ro Jephuo na. Irherẹn ride na vẹ isiẹbe na ke guọnọ idjerhe rẹ ayen se vwo shabọ phiyọ* womarẹ aghwanre rẹ ayen hworo rere ayen vwo hwe; 2 kidie ayen tanẹ: “Ọ dia ọke rẹ orẹ na-a; ọkiọvo ihwo na sa so edo.”

3 Ọke rọ vwọ hẹ Bẹtani rọ vwọ riemu vwẹ uwevwin ri Saimọn ọhọnvwoti na, aye ọvo da rhe vẹ ọgọ* rẹ ori ro gbon phanphanphan, uvi rẹ inadi rọ ghanre mamọ. O de rhie ọgọ na, ko kuo kuẹ uyovwin rọyen. 4 Ọtiọyena evo da ta kẹ ohwohwo vẹ ophu nẹ: “Diesorọ ọ vwọ ghwọrọ ori nana ro gbon phanphanphan na kuẹfia? 5 Mane a rha sa shẹ ori nana ro gbon phanphanphan na vrẹ idinari* 300, a me vwẹ igho na kẹ ivwiogbere! Kẹ ayen muophu kpahen aye na gangan.* 6 Ẹkẹvuọvo Jesu da tanẹ: “Ovwan yanjẹ aye na vwo. Diesorọ ovwan vwo kpokpo? O ru emu esiri kẹ vwẹ. 7 Kidie ovwan vẹ ivwiogbere na yen gba herọ ọkieje, ovwan se ru emu esiri kẹ ayen kọke kọke rẹ ovwan guọnọre, ẹkẹvuọvo ọ dia ọkieje yen me vẹ ovwan cha vwọ dia-a. 8 O ru obo ro se ru; o ku ori ro gbon phanphanphan na ku ugboma mẹ vwọ hẹrhẹ esho mẹ. 9 Uyota me ta kẹ ovwan nẹ, kasan kasan re de ghwoghwo iyẹnrẹn esiri na vwẹ akpọ na eje, a je cha ta oborẹ aye nana ruru na vwọ karophiyọ.”

10 Judas Iskariọt, ọvo vwẹ usun rẹ Ihwivẹ na de bru irherẹn ride na ra, rere ọ sa vwọ shẹ kẹ ayen. 11 Ayen vwo nyo ọnana, oma da vwerhen ayen, ayen de ve kẹ nẹ ayen cha vwẹ igho rẹ idọnọ ọfuanfon kẹ. Ọtiọyena kọ guọnọ uphẹn rọ sa vwọ shẹ kẹ ayen.

12 Asaọkiephana vwẹ ẹdẹ rẹsosuọ rẹ orẹ rẹ Ibrẹdi ro Jephuo na, rọ dia ọke rẹ ayen vwo ze izobo rẹ Ọwanvrẹ na, idibo rọyen da ta kẹ nẹ: “Tivọ yen wọ guọnọre nẹ avwanre ra re muegbe rọyen kẹ wẹ ru wọ da re Orẹ rẹ Ọwanvrẹ na?” 13 Ọtiọyena o de ji idibo rọyen ivẹ, ọ da ta kẹ ayen nẹ: “Ovwan kpo evunrẹ orere na, ọshare ọvo ro mu ochẹ rẹ ame cha vwa ovwan. Ovwan nene, 14 kasan kasan rọ roro, ovwan ta kẹ onini rẹ uwevwin na nẹ, ‘Oyono na tare nẹ: “Tivọ yen uvun rẹ orhorha na hepha, re me vẹ idibo mẹ da sa re Orẹ rẹ Ọwanvrẹ na?”’ 15 Ko che dje uvun rode ọvo kẹ ovwan vwẹ obenu, ra rhuẹrẹ fia ji muegbe rọyen. Ovwan muegbe rọyen kẹ avwanre vwẹ etiyin.” 16 Ọtiọyena idibo na da yanran, ayen da ro evunrẹ orere na, ayen da mrẹ kirobo rọ ghwa vuẹ ayen na, ayen de muegbe vwọ kẹ Orẹ rẹ Ọwanvrẹ na.

17 Ovwọnvwọn vwo te, ọ vẹ Ihwivẹ na da rhe. 18 Rẹ ayen vwo chidia imẹjẹ je riemu na, Jesu da tanẹ: “Uyota me ta kẹ ovwan nẹ, ọvo vwẹ usun rẹ ovwan re vẹ ovwẹ gba riemu na cha shẹ vwẹ.” 19 Ayen de muomaphiyọ, ayen ohwo ọvuọvo ke ta kẹ nẹ: “Ọ dia omẹvwẹ rẹ, gbanẹ omẹvwẹ?” 20 Ọ da ta kẹ ayen nẹ: “Ọvo vwẹ usun rẹ Ihwivẹ na, ohwo rọ vẹ ovwẹ gbe duvwun obọ phiyọ omoze na. 21 Kidie Ọmọ rẹ ohwo na yanran kirobo re siro kpahọn, ẹkẹvuọvo okpetu rode vwọ kẹ ohwo ra wan oma rọyen shẹ Ọmọ rẹ ohwo na! O rhe yovwin kẹ ohwo yena ọ da dianẹ e vwiẹrẹ-ẹ.”

22 Rẹ ayen je vwọ riemu na, ọ da reyọ ibrẹdi, ọ da nẹrhovwo, o de bro, ọ da vwọ kẹ ayen, ọ da tanẹ: “Ovwan mie; ọnana mudiaphiyọ ugboma mẹ.” 23 Ọ da reyọ uko, ọ da nẹrhovwo, ọ da vwọ kẹ ayen, ayen ejobi da da vwọ. 24 Ọ da ta kẹ ayen nẹ: “Ọnana mudiaphiyọ ‘ọbara mẹ rẹ ọphọ na,’ re che ku kuotọ fikirẹ ihwo buebun. 25 Uyota me ta kẹ ovwan nẹ, o vwo ọke vuọvo me cha vwọ rhoma da oka rẹ udi nana ra vwẹ ivaini vwo ru na-a, bẹsiẹ rẹ ẹdẹ yena che vwo te, re me cha vwọ da ọkpokpọ vwevunrẹ Uvie rẹ Ọghẹnẹ.” 26 Ukuotọ rọyen, ọke rẹ ayen vwọ so ine rẹ ejiro nu, ayen de kpo Ugbenu rẹ Oliv.

27 Jesu da ta kẹ ayen nẹ: “Ovwan eje cha kprowọ, kidie e siro nẹ: ‘Me cha ghwiẹ osuigodẹ na, igodẹ na ke cha hrabọ.’ 28 Jẹ ọke ra da kpare ovwẹ vrẹ nu, me cha kobaro kẹ ovwan kpo Galili.” 29 Ẹkẹvuọvo Pita da ta kẹ nẹ: “Ọ da tobọ dianẹ ihwo ri chekọ na eje kprowọ, mi che ru ọtiọye-en.” 30 Ọtiọyena Jesu da ta kẹ nẹ: “Uyota me ta kẹ wẹ nẹ, nonẹna, e, vwẹ ason nana, tavwen ọhọ* ki bo abọ ivẹ, wọ cha sen vwẹ abọ erha.” 31 Ẹkẹvuọvo kọ tanẹ: “Ọ da tobọ dianẹ me vẹ owẹ che ghwu, o vwo ọke vuọvo me cha vwọ sen wẹ-ẹ.” I ri chekọ na eje ke je ta ota vuọvo na.

32 Ọtiọyena ayen de rhi te asan ọvo re se Gẹtsimani, ọ da ta kẹ idibo rọyen nẹ: “Ovwan chidia etinẹ rere me ra nẹrhovwo.” 33 Ọ da reyọ Pita, Jems, kugbe Jọn nene oma, ofu ko dje gangan, ẹwẹn rọyen ko kpokpo gangan. 34 Ọ da ta kẹ ayen nẹ: “Mi* muomaphiyọ gangan tobọ te ẹdia rẹ ughwu. Ovwan daji etinẹ rere ovwan rha rhẹrẹ.” 35 Rọ vwọ yan kpo obaro emerha, o de she teyen otọ, kọ nẹrhovwo nẹ, ọ da dia obo re se ru, e jẹ unọke na wan ọyen vrẹ. 36 Ọ da tanẹ: “Abba,* Ọsẹ, wo se ru erọnvwọn eje; bi uko nana sheri kẹ vwẹ. Dedena ọ dia oborẹ me guọnọre-e, ẹkẹvuọvo oborẹ wọ guọnọre.” 37 O de rhivwin rhe, ọ da mrẹ ayen re vwerhẹn, ọ da ta kẹ Pita nẹ: “Saimọn, wọ vwerhẹn? Wo rhe vwo ẹgba ru wọ vwọ rhẹrẹ vwẹ unọke ọvo? 38 Ovwan rha rhẹrẹ rere ovwan je nẹrhovwo ọkieje, rere ovwan vwo jẹ ọdavwini ẹruọ. Vwọrẹ uyota, ẹwẹn na guọnọre, ẹkẹvuọvo ugboma na vwiẹrẹre.” 39 Ọ da rhoma yanran ra nẹrhovwo, ọ da vwanriẹn ota ọvuọvo na. 40 Ọ da rhoma rhivwin rhe, ọ da mrẹ ayen re vwerhẹn kidie ovwerhẹn vọn ẹro rayen, ọtiọyena ayen rha riẹn oborẹ ayen cha kpahen kẹ-ẹ. 41 O de rhivwin rhe obọ rerha, ọ da ta kẹ ayen nẹ: “Vwẹ oka rẹ ọke tiọnana ovwan vwerhẹn ji rovwoma! O te re! Unọke na te re! Nighere! A shẹ Ọmọ rẹ ohwo phiyọ obọ rẹ irumwemwu re. 42 Ovwan vrẹn rere a yanran. Nighere! ohwo rọ cha shẹ vwẹ na te etinẹ re.”

43 Ugege yena rọ je vwọ ta ota na, Judas, ọvo vwẹ usun rẹ Ihwivẹ na da rhe vẹ ihwo buebun rẹ irherẹn ride na kugbe isiẹbe na kugbe ekpako na jiri, re yọnrọn elọkọ kugbe ibiurhe. 44 Asaọkiephana ohwo rọ cha shẹ na vwẹ oka rẹ ayen rhọnvwephiyọ vwọ kẹ ayen jovwo re nẹ: “Kohwo kohwo re me fiọnfiọnre, ọyen yen ohwo na; we muo rere ovwan vwẹ ihwo vwọ rhẹrẹ ji suon yanran.” 45 Ọ da yanran phiọngun bro ra, ọ da tanẹ, “Rabbi!” ọ da fiọnfiọn. 46 Ọtiọyena ayen de shabọ phiyọ, ayen de muo yanran. 47 Ẹkẹvuọvo ọvo vwẹ usun rẹ ihwo ri mudia etiyin de yoro ọlọkọ rọyen phia, ọ da nyavwe orhọ rẹ odibo rẹ orherẹn rode na no. 48 Ẹkẹvuọvo Jesu da nọ ayen nẹ: “Ovwan rhere rhi mu vwe vẹ elọkọ kugbe ibiurhe kerẹ oji? 49 Kẹdi kẹdẹ yen me vẹ ovwan vwọ hẹ evunrẹ uwevwin rẹ ẹga na, ri mi vwo yono jẹ ovwan mu vwe-e. Ẹkẹvuọvo ọnana phiare rere Isiesi Ọfuanfon na se vwo rugba.”

50 Ayen eje da yan jovwo, ayen da djẹ. 51 Ẹkẹvuọvo eghene ọshare ọvo ro ku ewun oyoyovwin ọvo vwo rhurhu ẹban rọyen ko nene kpẹkpẹkpẹ, kẹ ayen guọnọ shabọ phiyọ, 52 ẹkẹvuọvo ọ da yanjẹ ewun rọyen na vwo, ọ da vwẹ ẹbẹban djẹ.*

53 Asaọkiephana ayen da reyọ Jesu bru orherẹn rode na ra, irherẹn ride na eje kugbe ekpako na vẹ isiẹbe na de siomakoko. 54 Ẹkẹvuọvo Pita de nene vwẹ ugboko re te egodo rẹ orherẹn rode na; ọ vẹ idibo re vwẹrote uwevwin na de chidia etiyin, kọ dia erhanre rọ la mamọ. 55 Asaọkiephana irherẹn ride na kugbe Sanhẹdrin na eje ke guọnọ ihwo ri che soseri hwe Jesu rere ayen se vwo hwe, ẹkẹvuọvo ayen mrẹ ohwo vuọvo-o. 56 Vwọrẹ uyota, ihwo buebun soseri rẹ efian hwe, ẹkẹvuọvo eta rayen rhọnvwephiyọ ohwohwo-o. 57 Vwọba, ihwo evo mudia rẹ ayen vwo soseri rẹ efian kpahọn, rẹ ayen vwọ tanẹ: 58 “Avwanre nyoro rọ vwọ tanẹ, ‘Me cha guọghọ uwevwin rẹ ẹga nana ra vwẹ obọ bọn na, me me vwẹ ẹdẹ erha vwọ bọn ọfa ra vwẹ obọ bọ-ọn.’” 59 Vwẹ ọnana dede, eta rayen je rhọnvwephiyọ ohwohwo-o.

60 Ọtiọyena orherẹn rode na de vrẹn mudia vwẹ ohri rayen, ọ da nọ Jesu nẹ: “Wọ cha kpahen ota vuọvo? Ọnana die yen eshare nana soseri rọyen kpahan owẹ na?” 61 Ẹkẹvuọvo ọ ta ota vuọvo-o, ọ kpahen ota vuọvo-o. Orherẹn rode na kọ rhoma nọ enọ, ọ da ta kẹ nẹ: “Wẹwẹ yen Kristi, Ọmọ rẹ Ọ re Bruba kẹ na?” 62 Jesu da ta: “E, mẹvwẹ; ovwan cha mrẹ Ọmọ rẹ ohwo na ro chidia obọrhen rẹ ogangan, rọ cha vẹ evwru rẹ odjuvwu na.” 63 Ọtiọyena orherẹn rode na da bẹrẹ iwun rọyen, ọ da tanẹ: “Diesorọ a rhoma vwọ guọnọ iseri? 64 Ovwan nyo eta rẹ ẹgua na. Die yen orhiẹn-ebro rẹ ovwan?”* Ayen ejobi de brorhiẹn hwe nẹ o fo ughwu. 65 Evo ki dje enya kuo, ayen de rhurhu opharo rọyen, ayen de dje ubi, ayen da ta kẹ nẹ: “Mraro!” Ayen vwọ ghwiẹ opharo nu, e re vwẹrote aguare na da reyọ yanran.

66 Asaọkiephana ri Pita vwọ hẹ obotọ vwẹ otegodo na, ọvo vwẹ usun rẹ idibo emetẹ rẹ orherẹn rode na da rhe. 67 Rọ vwọ mrẹ Pita rọ dia erhanre, ọ da tẹnrovio, ọ da tanẹ: “Wẹwẹ vẹ Jesu nana rọ dia ohwo ri Nazarẹt na jẹ usun.” 68 Ẹkẹvuọvo ọ da siọn, rọ vwọ tanẹ: “Me riẹnrẹ-ẹ, mi ji vwo ẹruọ rẹ oborẹ wọ ta ota kpahan na-a,” ọ da ro otafe kpo asan ra wan rua egodo na. 69 Odibo ọmọtẹ na da mrẹ vwẹ etiyin, kọ rhoma ta kẹ ihwo ri mudia etiyin nẹ: “Ọnana ọvo vwẹ usun rayen.” 70 Ọ da rhoma siọn. Ọmọke vwọ wan nu, ihwo ri mudia etiyin ke rhoma ta kẹ Pita nẹ: “Aphro herọ-ọ, wẹwẹ ọvo vwẹ usun rayen, kidie vwọrẹ uyota, wẹwẹ ohwo ri Galili.” 71 Ẹkẹvuọvo o de mu ekan vẹ iyorin eduvwon phiyọ nẹ: “Me riẹn ọshare nana rẹ ovwan ta ota kpahan na-a!” 72 Ugege yena ọhọ* de bo obọ rivẹ, Pita da karophiyọ oborẹ Jesu ta kẹ nẹ: “Tavwen ọhọ* ki bo abọ ivẹ, wọ cha sen vwẹ abọ erha.” O rhe se chiro-o, kọ viẹ.