Ọbe Rivẹ rẹ Ivie
11 Asaọkiephana, ọke rẹ Atalaya, oni rẹ Ehazaya vwọ mrẹ nẹ ọmọ rọyen ghwure, o de vrẹn, ọ da ghwọrọ urhiẹ rẹ ovie na ejobi.* 2 Ẹkẹvuọvo, Jẹhọshiba ọmọtẹ rẹ Ovie Jehoram, oniọvo rẹ Ehazaya rẹ ọmọtẹ da bẹbẹ mu* Jehoash ọmọ rẹ Ehazaya vwo nẹ ohri rẹ emọ rẹ ovie ra cha teyen hwe na, o de sionu vẹ ohwo rọ vwẹrote vwẹ uvun ọvo. Ayen siro nu kẹ Atalaya, ọtiọyena a rha teyọn hwee. 3 O de nene aye na dia vwẹ ẹgbukpe esan, o siomanu vwẹ uwevwin ri Jihova, jẹ Atalaya suẹn otọ na.
4 Vwẹ ukpe righwrẹn, Jehoyada de ji ohwo re se inotu rẹ ujorin rẹ ihwo ri Keria re rhẹrẹ evwruwevwin rẹ ovie na* kugbe ihwo re rhẹrẹ ọguan na,* nẹ ayen bru ọyen rhe vwẹ uwevwin ri Jihova. Ọ vẹ ayen de vwo ọrhọnvwekugbe,* ọ da nẹrhẹ ayen duvwun iyorin kpahọn vwẹ uwevwin ri Jihova, ayen vwo ru ọyena nu, o de dje ọmọ rẹ ovie na vwọ kẹ ayen. 5 Ọ da vwẹ iji kẹ ayen nẹ: “Ọnana yen oborẹ ovwan che ru: Ẹkẹn ọvo rẹ ẹkẹn erha rẹ ovwan che ruiruo vwẹ Ẹdẹ Urovwoma na je nabọ rhẹrẹ uwevwin* rẹ ovie na, 6 ẹkẹn ọvo rẹ ẹkẹn erha ọfa cha dia asan Anurhoro rẹ Uchivwo Na, ẹkẹn ọvo rẹ ẹkẹn erha ro chekọ me rha dia asan anurhoro rọhẹ obuko rẹ ihwo re rhẹrẹ ọguan na. Ovwan che rhe wene ohwohwo rẹ ovwan vwọ rhẹrẹ uwevwin na. 7 Ẹko ivẹ rẹ ovwan ro fori nẹ e wian vwẹ Ẹdẹ Urovwoma naa me nabọ rhẹrẹ uwevwin ri Jihova na rere a sẹro rẹ ovie na. 8 Ovwan me riariẹ ovie na phiyọ vwẹ kẹbẹre kẹbẹre, ohwo ọvuọvo me yọnrọn ekuakua ofovwin rọyen vwẹ obọ. Kohwo kohwo rọ davwẹngba rọ vwọ wan ohri rẹ isodje na vrẹ, ka teyọn hwe. Ovwan nene ovie na vwẹ kasan kasan rọ ra.”*
9 Inotu rẹ ujorin na de ru oborẹ Jehoyada orherẹn na ghwe ji iji rọyen. Ọtiọyena ayen ọvuọvo da reyọ eshare rọyen ri ruiruo vwẹ Ẹdẹ Urovwoma na kugbe i ri ruiruo vwẹ Ẹdẹ Urovwoma naa, ayen da ro uwevwin bru Jehoyada orherẹn na rhe. 10 Etiyin orherẹn na da vwẹ oshuẹ vẹ ekpọfia re pha ghorien ghorien rẹ Ovie Devid rehẹ uwevwin ri Jihova na kẹ inotu rẹ ujorin na. 11 Ihwo re rhẹrẹ ọguan na de mudia ẹdia rayen, ọvuọvo vẹ ekuakua ofovwin rọyen vwẹ obọ vwo nẹ obọrhen rẹ uwevwin na re te obohwẹre rẹ uwevwin na, vwẹ ọkọkọ rẹ agbada na vẹ ọkọkọ rẹ uwevwin na, ayen eje riariẹ ovie na phiyọ. 12 Jehoyada da reyọ ọmọ rẹ ovie na rhe otafe, o de ku erhu rẹ ovie* phiyọ je vwẹ Oseri* na kẹ, ayen de vwo mu ovie ji ku evwri kuo vwọ jẹreyọ. Ayen ke teyan abọ rayen je tanẹ: “E jẹ ovie sun tọn!”
13 Ọke rẹ Atalaya vwo nyo edo rẹ ihwo re djẹ, o de brokpakpa bru ihwo na rhe vwẹ uwevwin ri Jihova. 14 Ọ da mrẹ ovie na ro mudia kẹrẹ uchivwo na vwo nene ẹkuruemu na. Inotu na kugbe ihwo ri hworo ewanre na mudia kẹrẹ ovie na, ihwo rẹ otọ na eje ghọghọ jẹ ayen hworo ewanre na. Etiyin Atalaya da bẹrẹ iwun rọyen, o de kperi phia nẹ: “Ọnana ero! Ọnana ero!” 15 Ẹkẹvuọvo Jehoyada orherẹn na da vwẹ iji kẹ inotu rẹ ujorin na, ihwo re vwo mu vwẹ enu rẹ otuofovwin na, ọ da ta kẹ ayen nẹ: “Ovwan reyọ nẹ ohri rẹ isodje na, kohwo kohwo ro nenire, ovwan vwẹ ọlọkọ vwọ teyọn hwe!” Kidie orherẹn na tarọ jovwo nẹ: “Ovwan teyọn hwe vwẹ uwevwin ri Jihovaa.” 16 Ọtiọyena ayen de shabọ phiyọ, ọke rẹ ayen vwọ reyọ te asan rẹ iyesi wan rua uwevwin* rẹ ovie na, a da teyọn hwe vwẹ etiyin.
17 Ọyena vwọ wan nu, Jehoyada de nene Jihova, ovie na, kugbe ihwo na re ọphọ, nẹ ayen cha dia ihwo ri Jihova ọkieje, Jehoyada ji nene ovie na kugbe ihwo na re ọphọ. 18 Ọyena vwọ wan nu, ihwo rẹ otọ na eje da rhe uwevwin* ri Bel, ayen de kporon egbada rọyen she, guọghọ ema rọyen chẹghẹchẹghẹ, ji hwe Mattan orherẹn ri Bel vwẹ obaro rẹ egbada na.
Etiyin orherẹn na da vwẹ iniruo vwo mu vwẹ enu rẹ uwevwin ri Jihova. 19 Vwọba, ọ da reyọ inotu rẹ ujorin na, Keria re rhẹrẹ na, ihwo re rhẹrẹ ọguan na, kugbe ihwo rẹ otọ na eje, rẹ ayen vwo sun ovie na vwo nẹ uwevwin ri Jihova, ayen da wan idjerhe rẹ anurhoro rẹ erhẹrotọ rẹ ọguan na ro uwevwin* rẹ ovie na. Etiyin Jehoash de chidia ekete rẹ ivie na. 20 Ọtiọyena ihwo rẹ otọ na eje da ghọghọ, orere na de vwo ufuoma, kidie ayen vwẹ ọlọkọ vwọ teyen Atalaya hwe vwẹ uwevwin ovie na.
21 Jehoash hẹ ẹgbukpe ighwrẹn ọke rọ vwọ dia ovie.