Ẹyano
22 “Ohwo de cho erhuẹn yẹrẹ ogodẹ, o de hwe yẹrẹ shẹ, ọ cha vwẹ erhuẹn iyorin vwọ hwosa rẹ erhuẹn na, ọ me rha vwẹ igodẹ ẹne vwọ hwosa rẹ ogodẹ na.
2 (“E de mu oji ọke rọ vwọ kpanra ẹchẹ, a da ghwiẹ, o de ghwu, abe rẹ ọbara vuọvo herọ kẹẹ. 3 Ẹkẹvuọvo ọ da phia vwẹ aruphẹn, abe rẹ ọbara kọ dia vwọ kẹ.)
“Kọ hwosa rẹ obo ro chori na. O rhe vwo emu vuọvoo, ka shẹ vwọ hwosa rẹ obo ro chori na. 4 Ọ da dianẹ obo ro chori ra mrẹ vwẹ obọ rọyen na jehẹ akpọ, owenẹ ọ dia erhuẹn yẹrẹ ekẹkẹtẹ yẹrẹ ogodẹ, ọ cha hwosa rọyen ọhwọhwọ ivẹ.
5 “Ohwo de mu eranvwe rọyen phia rere ayen ra re odin vwẹ aghwa yẹrẹ ogba rẹ ivaini, ọ da nẹrhẹ ayen re odin vwẹ udju rẹ ohwo ọfa, ọ cha vwẹ aghwa rọyen ro me yovwin yẹrẹ ogba rẹ ivaini rọyen ro me yovwin vwọ hwosa rọyen.
6 “Erhanre da la, ọ da hrabọ ro imirhe ri vwo inwe, ọ da torhẹ ugbẹn rẹ ekankọn yẹrẹ eka re djẹ yẹrẹ udju, ọ rọ vwẹ erhanre na vwo mu na kọ hwosa rẹ obo re torhẹre na.
7 “Ọ da dianẹ ohwo vwẹ igho yẹrẹ erọnvwọn kẹ ọrivẹ rọyen yọnre, e de cho ayen vwo nẹ uwevwin rẹ ọrivẹ rọyen, e de mu oji na, kọ cha hwosa rayen ọhwọhwọ ivẹ. 8 E rhe mu oji naa, ka cha reyọ ohwo ro vwo uwevwin na rhe obaro rẹ Ọghẹnẹ rẹ uyota na rere a vwọ riẹn sẹ obọ rọyen te erọnvwọn rẹ ọrivẹ rọyen na. 9 Vwẹ ẹdia rẹ erọnvwọn re chori eje, te ọ dia erhuẹn, ekẹkẹtẹ, ogodẹ, ewun, yẹrẹ kemu kemu ro ghwruru rẹ ohwo da tanẹ, ‘ọnana ọmẹ!’ ihwo ivẹ na mi gun ẹkẹn unu rayen vwẹ obaro rẹ Ọghẹnẹ rẹ uyota na. Ohwo rẹ Ọghẹnẹ tare nẹ ọyen riabe kọ hwosa rọyen ọhwọhwọ ivẹ vwọ kẹ ọrivẹ rọyen na.
10 “Ọ da dianẹ ohwo vwẹ ekẹkẹtẹ yẹrẹ erhuẹn yẹrẹ ogodẹ yẹrẹ eranvwe rọ dia orere kẹ ọrivẹ rọyen yọnre, o de ghwu yẹrẹ a da wan oma yẹrẹ e de cho jẹ ohwo vuọvo soseri rọyeen, 11 ayen ihwo ivẹ na ki duvwun iyorin vwẹ obaro ri Jihova nẹ obọ rọyen te erọnvwọn rẹ ọrivẹ rọyen naa; ọ ro vwo erọnvwọn na kọ reyọ ọtiọyen. Ohwo ro chekọ na cha hwosa phiyọ obo ri ghwruru naa. 12 Ẹkẹvuọvo ọ da dianẹ e cho eranvwe na mie, kọ hwosa rọyen kẹ ọ ro vworo. 13 Ọ da dianẹ eranvwe rẹ aghwa yen hwere, ko muo rhe kerẹ oseri. Ọ cha hwosa rẹ oborẹ eranvwe rẹ aghwa hwerii.
14 “Ẹkẹvuọvo ohwo de momo eranvwe mie ọrivẹ rọyen, eranvwe na da wan oma yẹrẹ o de ghwu ọke rẹ ọ ro vworo rha hẹ etiyiin, ohwo ro momiro na kọ hwosa rẹ eranvwe na. 15 Ọ da dianẹ ohwo ro vworo na hẹ etiyin, ọ cha hwosa rọyeen. Ọ da dianẹ ọ hwosa vwo momo, igho rọ hwa vwo momo na kọyen cha dia osa rọyen.
16 “Asaọkiephana ọ da dianẹ ọshare riẹriẹ ọmọtobẹ ra je rhe sa phiyotọọ, o de nene vwerhẹn, ko che bremu rọyen rere ọ dia aye rọyen. 17 Ọsẹ rọyen da sen nẹ ọyen cha vwẹ ọmọtẹ na kẹẹ, kọ cha hwa uchunu rẹ igho rọ vẹ igho rẹ emuebro na gba dia abavo.
18 “Wọ vwẹ uphẹn kẹ aye rọ bọ epha nẹ ọ dia akpọọ.
19 “Kohwo kohwo ro nene eranvwe vwerhẹn, ka teyọn hwe.
20 “Kohwo kohwo ro ze izobo kẹ eghẹnẹ efa jokparẹ Jihova ọvo, ka ghwọrọ.
21 “Wo gboja kẹ ọrhorha yẹrẹ shenyẹẹ, kidie ovwan ka dia erhorha jovwo vwẹ otọ rẹ Ijipt.
22 “Wo gboja kẹ* ayeuku yẹrẹ ọmọ ro jẹ ọsẹ evwoo.* 23 Wo de gboja kẹ te ẹdia rọ da viẹ bru vwe rhe, o vwo obo rọ wanree, mi che nyo oviẹ rọyen na; 24 ophu mẹ kọ cha tua, ke me cha vwẹ ọlọkọ vwo hwe ovwan, eya rẹ ovwan ke dia eyauku, emọ rẹ ovwan ke dia emọ ri vwo esẹẹ.
25 “Wo de momo igho kẹ ohwo rọ dia ogbere* vwẹ usun rẹ ihwo mẹ, ohwo rọ dia kẹrẹ owẹ, wọ dia kerẹ omomigho kẹẹ. Wọ vwẹ igho vwo suoon.
26 “Wọ da reyọ ewun rẹ ọrivẹ wẹn ro vwo viẹnwan fikirẹ igho ro momo mie we, wọ me reyọ kẹ rhivwin tavwen ọke ki she. 27 Kidie ọyen ọvo yen o vwo rhurhẹ, amwa ro vwo phopho oma* rọyen; kẹ die yen o che vwo sherhẹn? Ọke rọ da viẹ bru vwe rhe, aphro herọọ, me cha kerhọ rọyen, kidie me ria ehrọre.*
28 “Wọ hanrha Ọghẹnẹẹ yẹrẹ wọ hanrha osun rọhẹ ohri rẹ ihwo wẹẹn.
29 “Wo siomauko wo vwo jẹ evo usun rẹ ekankọn ibuebun wẹn ẹvwọkpahotọ kẹ vwẹẹ, ọtiọyen ji te obo ri hwẹ nẹ asan wo de mie iwaini vẹ evwri. Wọ me vwẹ emekpako wẹn re dia emeshare kẹ vwẹ. 30 Ọnana yen oborẹ wọ cha vwẹ erhuẹn vẹ igodẹ wẹn vwo ru: Ọ vẹ oni rọyen cha dia ẹdẹ ighwrẹn. Vwẹ ẹdẹ rẹrenren rọyen, wọ me vwọ kẹ vwẹ.
31 “Ovwan dje oma rẹ ovwan phia kerẹ ihwo re fonro kẹ vwẹ, ovwan ria uvwo rẹ emu vuọvo rọhẹ evunrẹ aghwa rẹ eranvwe rẹ aghwa hwerii. Ovwan do kẹ eranko.