Iguẹdjọ

16 Vwẹ ọke ọvo Samsin de kpo Gaza, ọ da mrẹ igberadja ọvo vwẹ etiyin, ọ da ro uwevwin bro ra. 2 A da ta kẹ ihwo ri Gaza na nẹ: “Samsin rhe obonẹ.” Ọtiọyena ayen da riariẹ phiyọ je hwa phiyọ hẹrhẹ vwẹ asan anurhoro rẹ orere na vwẹ ason na eje. Ayen hwomamu vwẹ ason na eje jẹ ayen ta kẹ omoma rayen nẹ: “Ọke de rhie, avwanre cha teyọn hwe.”

3 Ẹkẹvuọvo Samsin de sherhẹn etiyin rhirin re te uherevie ason. O de vrẹn vwẹ uherevie ason na, ọ da yọnrọn ẹchẹ rẹ anurhoro rẹ orere na kugbe ichivwo ivẹ rehẹ te obonẹ te obonẹ rọyen, o de ghwie ayen vẹ orọnvwọn ra vwọ kanrọ na. O de mu ayen phiyọ igabọ rọyen, o de mu ayen kpo enu rẹ ugbenu ro hirharoku Hẹbrọn.

4 Ọyena vwọ wan nu, o de rhi vwo ẹguọnọ rẹ aye ọvo vwẹ Iyara* ri Sorẹk rẹ odẹ rọyen dia Delaila. 5 Ọtiọyena isun rẹ ihwo ri Filistia na de bro rhe, ayen da ta kẹ nẹ: “Phiẹn* rere wọ riẹn obo re kẹ ogangan rode tiọyena kugbe oborẹ avwanre sa wan muo, gba, ji phio kparobọ. Avwanre ọvuọvo cha kẹ wẹ idọnọ efuanfon 1,100 fikirẹ ọnana.”

6 Ọke vwọ yan obaro Delaila da ta kẹ Samsin nẹ: “Biko vuẹ vwẹ asan rẹ ogangan wẹn rode na nurhe vẹ obo ra sa reyọ vwọ gba wẹ ji phi we kparobọ.” 7 Samsin da ta kẹ nẹ: “Ayen da vwẹ ifi rẹ umurhabọ* ighwrẹn kpokpọ re je rhe yaa vwọ gba vwẹ, oma cha ghwọrọ ovwẹ kerẹ ohwo ghevweghe.” 8 Ọtiọyena isun rẹ ihwo ri Filistia na da reyọ ifi rẹ umurhabọ ighwrẹn kpokpọ re je rhe yaa vwo rhe, ọ da reyọ ayen vwọ gba. 9 Asaọkiephana ayen hwa phiyọ hẹrhẹ vwẹ uvun rọhẹ obevun na, aye na de kperi se nẹ: “Ihwo ri Filistia na etinẹ Samsin!” Ọtiọyena ọ da sanvwe ifi rẹ umurhabọ na kirobo rẹ oruru ra vwẹ okankọn re se iflasi vwo ru fobọ vwrẹ ọke ro de te erhanre. A je rhe riẹn odjahọn rẹ ogangan rọyen naa.

10 Ọyena vwọ wan nu, Delaila da ta kẹ Samsin nẹ: “Nighere! Wọ phiẹn vwẹ* wo de gun efian kẹ vwẹ. Asaọkiephana biko, vuẹ vwẹ obo ra sa vwọ gba wẹ.” 11 Ọtiọyena ọ da ta kẹ nẹ: “A da vwẹ ifi kpokpọ re ji rhi vwo ruiruoo vwọ gba vwẹ, oma cha ghwọrọ ovwẹ kerẹ ohwo ghevweghe.” 12 Ọtiọyena Delaila da reyọ ifi kpokpọ, ọ da vwẹ ayen gba, o de kperi se nẹ: “Ihwo ri Filistia na etinẹ Samsin!” (Vwẹ ọke nana eje jẹ a hwa phiyọ hẹrhẹ vwẹ uvun rẹ obevun na.) Ọtiọyena ọ da sanvwe ayen nẹ abọ rọyen kerẹ oruru.

13 Ọyena vwọ wan nu Delaila da ta kẹ Samsin nẹ: “Rhi te ọke na wọ phiẹn vwẹ ji gun efian kẹ vwẹ. Vuẹ vwẹ obo ra sa vwọ gba wẹ.” Ọ da ta kẹ nẹ: “Wọ da vwẹ oruru re vwo ruẹ amwa vwo me ẹton uyovwin mẹ ri gbe erhagha ighwrẹn na, ogangan mẹ ko che nuvwe oma.” 14 Ọtiọyena ọ da vwẹ egbede vwo me ayen, o de kperi se nẹ: “Ihwo ri Filistia na etinẹ Samsin!” Ọtiọyena o de vrẹn nẹ ovwerhẹn, ọ da sanvwe egbede na vẹ oruru re vwo ruẹ amwa na.

15 Aye na da ta kẹ nẹ: “Mavọ wọ sa vwọ tanẹ, ‘mi vwo ẹguọnọ wẹn’ jẹ ubiudu wẹn vẹ ovwẹ herọọ? Abọ erha nana yen wọ phiẹn vwẹ, wọ je rhe vuẹ vwẹ esiri rẹ ogangan wẹn rode naa.” 16 Kidie nẹ kẹdi kẹdẹ kọyen ọ vwọ viẹ kẹ ji kpokpo, oma* da rhe ghwọrọ te ẹdia rẹ ughwu. 17 Ukuotọ rọyen, o de rhievun kẹ, ọ da tanẹ: “A je rhe vwẹ anre* te uyovwin mẹ dẹvoo, kidie mẹvwẹ Nazarait rẹ Ọghẹnẹ nẹ evun rhe.* A da wanre ẹton mẹ, ogangan mẹ ko che nuvwe oma, ke me cha rhe vwiẹrẹ je dia kerẹ ihwo ri chekọ eje.”

18 Ọke rẹ Delaila vwọ mrẹ nẹ o rhievun kẹ ọyen re, o de se isun rẹ ihwo ri Filistia na ugege yena, ọ da ta kẹ ayen nẹ: “Ovwan yanrhe udje na, kidie o rhievun kẹ vwẹ re.” Ọtiọyena isun rẹ ihwo ri Filistia na de bro rhe vẹ igho na rẹ ayen ghwa nene oma. 19 Ọ da nẹrhẹ phiyọ ovwerhẹn vwẹ awọ rọyen; ọyena vwọ wan nu, o de se ọshare na, ọ da vuẹ nẹ o bru erhagha ẹton ighwrẹn rehẹ uyovwin rọyen na. Ọyena vwọ wan nu aye na ko vwo ogangan vwẹ enu rọyen kidie ẹgba rọyen rhe nẹ oma rọyen. 20 Asaọkiephana aye na de kperi se nẹ: “Ihwo ri Filistia na etinẹ Samsin!” O de vrẹn nẹ ovwerhẹn ọ da ta: “Me cha yanran kerẹ obo ri jovwo rere mi kpogho oma mẹ vabọ.” Ẹkẹvuọvo ọ riẹnre nẹ Jihova yanjẹ ọyen vwo ree. 21 Ọtiọyena ihwo ri Filistia na de shabọ phiyọ ayen de yoghro ẹro rọyen ivẹ no, ayen de muo kpo Gaza, ayen da vwẹ igoni rẹ ẹrovwo ivẹ vwọ kanrọ, ọ da rhe dia ohwo rọ lọ eka vwẹ uwodi. 22 Ẹkẹvuọvo ẹton rẹ uyovwin rọyen na da rhoma ton edion phiyọ ọke ra vwọ wanrọ nu.

23 Isun rẹ ihwo ri Filistia na da ghwomakoko rere ayen ze izobo rode kẹ Degọn ọghẹnẹ rayen rere ayen ji ru orẹ, kidie ayen rha ta: “Ọghẹnẹ rẹ avwanre phi Samsin ọvweghrẹn rẹ avwanre phiyọ obọ rẹ avwanre re.” 24 Ọke rẹ ihwo na vwọ mrẹ, ayen de jiri ọghẹnẹ rayen, ayen da ta: “Ọghẹnẹ rẹ avwanre phi ọvweghrẹn rẹ avwanre phiyọ obọ rẹ avwanre re, ohwo rọ ghwọrọ otọ rẹ avwanre, ro ji hwe buebun rẹ avwanre.”

25 Kidie nẹ ubiudu rayen vọnre vẹ omavwerhovwẹn, ayen da ta: “Ovwan se Samsin rhe rere o rhi fovwon avwanre phiyọ ehwẹ emerha.” Ọtiọyena ayen de si Samsin nẹ evunrẹ uwodi na rhe rere o fovwon ayen phiyọ ehwẹ, ayen de vwo mudia vwẹ uvwre rẹ ichivwo na. 26 Ọtiọyena Samsin da ta kẹ ọmọshare rọ yọnrọn obọ rọyen na nẹ: “Juvwe vwẹ obọ mẹ te ichivwo re yọnrọn uwevwin na, rere me sa vwọ vwẹ oma rẹrẹ ayen.” 27 (Vwẹ ọke nana te eya te eshare vọn evunrẹ uwevwin na. Isun rẹ ihwo ri Filistia eje hẹ etiyin, omarẹ eshare vẹ eya 3,000 hẹ enu rẹ uwevwin na, ri nẹ Samsin ọke ro vwo fovwon ayen phiyọ ehwẹ na.)

28 Samsin de kperi se Jihova nẹ: “Ọrovwori ro Me Kpenu Jihova, biko karophiyọ ovwẹ, kẹ vwẹ ogangan biko, obọ nana ọvo, E Ọghẹnẹ, juvwe reihri kpahen ihwo ri Filistia na fikirẹ ẹro mẹ ọvo vwẹ usun rẹ ẹro mẹ ivẹ na.”

29 Ọtiọyena Samsin da yọnrọn ichivwo ivẹ rehẹ uherevie re yọnrọn uwevwin na, ọ da ghwẹ obọrhen rọyen kpahen ọvo, ọ da rha ghwẹ obohwẹre rọyen kpahen ọ ro chekọ. 30 Samsin de kperi phia: “Jẹ me* vẹ ihwo ri Filistia na ghwu!” Ọtiọyena ọ da vwẹ ogangan rọyen eje vwo genre ichivwo na, uwevwin na de shenyẹ isun kugbe ihwo eje rehẹ evun rọyen. Ọtiọyena o de hwe ihwo buebun vwẹ ọke ughwu rọyen vrẹ ọke rọ vwọ hẹ akpọ.

31 Ọke vwọ yanran na, iniọvo rọyen vẹ orua rẹ ọsẹ rọyen eje da rhe rhi muo rhivwin. Ayen de muo re shi phiyọ uvwre ri Zora kugbe Ẹshtaọl vwẹ ushi ri Manoa ọsẹ rọyen. Ẹgbukpe 20 ọyen o guẹdjọ rẹ Izrẹl.