Jẹnẹsis

19 Emekashe ivẹ na te Sọdọm vwẹ ovwọnvwọn, jẹ Lọt chidia anurhoro ri Sọdọm. Lọt vwọ mrẹ ayen, o de vrẹn ra vwa ayen, ọ da vwẹ uyovwin kpotọ jẹ ọ bọvwọn opharo rhuotọ. 2 Ọ da ta: “Biko irivwovwe, ovwan mọ, biko, ovwan rhe ro uwevwin rẹ odibo rẹ ovwan, ovwan dia hrọke, rere a hworhẹ awọ rẹ ovwan. Ovwan se vrẹn vwẹ edegburhiọke, ovwan kpo oborẹ ovwan ra.” Ọtiọyena ayen da ta: “Ẹjo, avwanre cha dia ọsuorere na hrọke.” 3 Ẹkẹvuọvo o de nene ayen si gangan, ọtiọyena ayen de nene kpo uwevwin rọyen. O de chere udemu kẹ ayen, o de ru ibrẹdi ro jephuo, ayen da re.

4 Tavwen ayen ki sherhẹn, eshare rẹ orere na—eshare ri Sọdọm, vwo nẹ omotete re te ọmare—ayen ihwo eje da gba riariẹ uwevwin na phiyọ. 5 Kẹ ayen kperẹ se Lọt, jẹ ayen ta: “Eshare ri bru we rhe vwẹ ason na rhọ? Reyọ ayen bru avwanre rhe rere avwanre nene ayen vwerhẹn.”

6 Ọtiọyena Lọt de bru ayen ra vwẹ anurhoro na, o de bi ẹchẹ na gbe. 7 Ọ da ta: “Biko iniọvo mẹ, ovwan ru emu ọbrabra nanaa. 8 Biko mi vwo emetẹ ivẹ ri ji rhi nene ọshare vwerhẹn dẹvoo. Biko juvwe reyọ ayen bru ovwan rhe rere ovwan ru ayen obo ri je ovwan eje. Ẹkẹvuọvo ovwan ru eshare nana emu vuọvoo, kidie ayen rhi won vwe ọrhorha vwẹ* uwevwin mẹ.” 9 Ọtiọyena ayen da ta: “Bioma!” Ayen da je ta: “Ọrhorha nana rẹ ọyen ọvo rhe etinẹ rhe dia na kọyen gbaudu reyọ avwanre vwo guẹdjọ? Asaọkiephana oborẹ avwanre che ru we cha bra vrẹ ọrayen.” Ayen da họrhọ ro Lọt, kẹ ayen jowọ rẹ ayen vwọ bẹrẹ ẹchẹ na. 10 Ọtiọyena eshare na da riẹn abọ rayen phia, ayen de si Lọt ro uwevwin bru ayen rhe, ayen de bi ẹchẹ na gbe. 11 Ẹkẹvuọvo ayen de rhuẹro rẹ eshare rehẹ anurhoro rẹ uwevwin na, vwo nẹ ọ rọ ma hanvwe re te ọ rọ ma rho, ọtiọyena oma da ghwọrọ ayen rẹ ayen vwọ davwẹngba rẹ ayen vwọ guọnọ anurhoro na mrẹ.

12 Eshare na da ta kẹ Lọt: “Wo vwo ohwo ọfa vwẹ etinẹ na? Eshare rẹ emọ wẹn,* emeshare wẹn, emetẹ wẹn, kugbe ihwo wẹn eje rehẹ evunrẹ orere na, reyọ ayen nẹ etinẹ na! 13 Avwanre cha ghwọrọ etinẹ na, kidie enuebro re brẹ kpahọn rhe gan mamọ vwẹ obaro ri Jihova re, kọyensorọ Jihova vwo ji avwanre rhe, rhe ghwọrọ orere na.” 14 Ọtiọyena Lọt da yanran, kọ ta ota kẹ eshare re cha rọvwọn emetẹ rọyen, kọ ta: “Ovwan vrẹn! Ovwan vrẹn nẹ etinẹ na, kidie Jihova cha ghwọrọ orere na!” Ẹkẹvuọvo vwọ kẹ eshare nana, ọ họhọ ohwo rọ ta eta rẹ ehwẹjẹ.

15 Ọke vwo rhie cha re, emekashe na ki brẹ Lọt okpakpa nẹ: “Vrẹn! Reyọ aye wẹn vẹ emetẹ wẹn ivẹ re vẹ owẹ gba hẹ etinẹ na, rere e vwo juwe ẹghwọrọ ọke ra da ghwọrọ orere na fikirẹ orukuruku rọyen!” 16 Ọke ro vwo gbeghẹrẹ, fikirẹ arodọnvwẹ rẹ Jihova gbe kẹ, eshare na da yọnrọn obọ rọyen vẹ obọ rẹ aye rọyen kugbe abọ rẹ emetẹ rọyen ivẹ, ayen da reyọ ayen kpo otafe rẹ orere na. 17 Ugege rẹ ayen vwọ reyọ ayen te ughere rẹ orere na, ọ* da ta: “Djẹ kẹ arhọ* wẹn! Wo nẹ obukoo, wo muẹdia asan vuọvo vwẹ ubrakpọ naa! Djẹ kpo ekogho rẹ igbenu na rere e vwo juwe ẹghwọrọ!”

18 Ọtiọyena Lọt da ta kẹ ayen: “Biko Jihova, ọ dia oboyiin! 19 Asaọkiephana biko, odibo wẹn mrẹ ẹroesiri wẹn re, wo ji gbe arodọnvwẹ* kẹ vwẹ mamọ re, ru wọ vwọ sẹro rẹ arhọ mẹ,* ẹkẹvuọvo me cha sa djẹ kpo ekogho rẹ igbenu naa, kidie oshọ mu vwe nẹ oghwọrọ na sa vwa vwẹ, mi mi ghwu. 20 Biko, asaọkiephana orere nana kẹrẹ ovwẹ, me sa djẹ kpo etiyin; ọyen amasan tutuno. Biko, me sa djẹ kpo oboyin? Asan na rhoroo. Ki mi se sivwin rhọ.”* 21 Ọtiọyena ọ da ta kẹ: “Oyoma, mi ji che dje erorokẹ vwọ kẹ wẹ, ri mi vwo jẹ orere ru wọ ta ota kpahan na ẹghwọrọ. 22 Brokpakpa! Djẹ kpo etiyin, kidie mi che se ru emu vuọvoo bẹsiẹ wo vwo te etiyin!” Kọyensorọ o vwo se orere na Zoa.*

23 Ọke rẹ Lọt vwo te Zoa, jẹ uvo rhovwan vwẹ otọ na re. 24 Ọtiọyena Jihova da nẹrhẹ osio rẹ isọfọ kugbe ọ rẹ erhanre rhọ ku Sọdọm vẹ Gomora—obọ ri Jihova yen o nurhe, o nẹ idjuvwu na rhe. 25 Ọtiọyena ọ da ghwọrọ irere nana, e, ubrakpọ na eje, ọtiọyen ji te ihwo eje re dia irere na vẹ ekankọn rẹ otọ na. 26 Ẹkẹvuọvo aye ri Lọt rọhẹ obuko rọyen, ko nẹ obuko, o de hirhephiyọ ẹrhẹnre rẹ ughwanka.

27 Asaọkiephana Ebraham de vrẹn vwẹ edegburhiọke, o de kpo asan ro de mudia obaro ri Jihova jovwo na. 28 Ọke ro vwo ni kpo ẹbẹre ri Sọdọm vẹ Gomora kugbe etọ na eje rehẹ ubrakpọ na, ọ da mrẹ obo ri gbere unu. Ivwirhi ọgangan brẹ kpenu vwo nẹ otọ na, kerẹ ivwirhi ọgangan ro brẹ nẹ ovunu ra vwọ torhẹ ibriki cha! 29 Ọtiọyena ọke rẹ Ọghẹnẹ vwọ ghwọrọ irere rẹ ubrakpọ na, Ọghẹnẹ karophiyọ Ebraham, ọ da reyọ Lọt nẹ irere rọ ghwọrọre na, irere rẹ Lọt dia jovwo na.

30 Ọke vwọ yanran na, Lọt vẹ emetẹ rọyen ivẹ na de vrẹn nẹ Zoa, kẹ ayen dia ekogho rẹ igbenu na, kidie oshọ rọ vwọ dia Zoa muo. Ọtiọyena ọ vẹ emetẹ rọyen ivẹ na ke dia evunrẹ unu rẹ ukuta. 31 Ọ rẹ ọkpako na da ta kẹ ọ rẹ otete na: “Ọsẹ rẹ avwanre ghwore, jẹ o vwo ọshare vuọvo vwevunrẹ otọ na ro che nene avwanre vwerhẹn vwo nene ẹkuruemu rẹ akpọ na ejee. 32 Yanrhe, e jẹ avwanre vwẹ iwaini kẹ ọsẹ rẹ avwanre da, rere avwanre nene vwerhẹn, avwanre sa vwọ sẹro rẹ urhiẹ rẹ ọsẹ rẹ avwanre.”*

33 Ọtiọyena vwẹ ason yena kẹ ayen vwẹ iwaini kẹ ọsẹ rayen da; ọ rẹ ọkpako na da yanran, o de nene ọsẹ rọyen vwerhẹn, ẹkẹvuọvo ọsẹ rọyen riẹn ọke ro vwo sherhẹn vẹ ọke ro vwo vrẹẹn. 34 Vwẹ ẹdẹ rọ vwọ kpahọn, ọ rẹ ọkpako na da ta kẹ ọ rẹ otete na: “Me vẹ ọsẹ mẹ vwerhẹnre vwẹ ason rọ wanre na. E jẹ a je vwẹ iwaini kẹ da vwẹ ason na. Wo mi bro ra wẹ vẹ ọyen vwerhẹn rere a sa vwọ sẹro rẹ urhiẹ rẹ ọsẹ rẹ avwanre.” 35 Ọtiọyena vwẹ ason yena, ayen da je vwẹ iwaini buebun kẹ ọsẹ rayen da; ọ rẹ otete na de bro ra, o de nene vwerhẹn, ẹkẹvuọvo ọ riẹn ọke ro vwo sherhẹn vẹ ọke ro vwo vrẹẹn. 36 Ọtiọyena emetẹ ri Lọt ivẹ na da mrevun kẹ ọsẹ rayen. 37 Ọ rẹ ọkpako na de vwiẹ ọmọshare, o de se Moab. Ọyen ọsẹ rẹ ihwo ri Moab ri nonẹna. 38 Ọ rẹ otete na de ji vwiẹ ọmọshare, o de se Bẹn-ami. Ọyen ọsẹ rẹ ihwo rẹ Amọn ri nonẹna.