Ẹvwọphia ri Jọn
21 Me da mrẹ odjuvwu kpokpọ kugbe akpọ kpokpọ; kidie odjuvwu awanre na kugbe akpọ awanre na wanvrẹ re, abadi na rha herọ-ọ. 2 Me da je mrẹ orere ọfuanfon na Jerusalẹm Kpokpọ ro wontọ nẹ obodjuvwu cha, nẹ obọ rẹ Ọghẹnẹ cha, e muegbe rọyen kerẹ ọpha rọ sẹn fia rọ hẹrhẹ ọshare rọyen. 3 Ọtiọyena mi de nyo urhuru ọgangan ọvo ro nẹ ekete na rhe rọ tanẹ: “Nighere! Utughẹ* rẹ Ọghẹnẹ vẹ ihworakpọ herọ, ko che nene ayen dia, kẹ ayen cha dia ihwo rọyen. Ọghẹnẹ komobọ ko nene ayen dia. 4 Ko che rien ameoviẹ eje vwo nẹ ẹro rayen, ughwu rha cha dia ọfa-a, uvweri yẹrẹ oviẹ yẹrẹ ọmiaovwẹ rha cha dia ọfa-a. Erọnvwọn awanre na wanvrẹ re.”
5 Ohwo ro chidia ekete na da tanẹ: “Nighere! Mi ruẹ erọnvwọn eje phiyọ ekpokpọ.” Ọ da je tanẹ: “Si, kidie eta nana uyota, a sa vwẹroso ayen.” 6 Ọ da ta kẹ vwẹ nẹ: “E phia re! Mẹvwẹ yen Alfa kugbe Omẹga na,* ọtonphiyọ kugbe oba na. Vwọ kẹ kohwo kohwo rẹ urhuru rẹ ame siẹ, me cha vwẹ ame kẹ vwo nẹ ogbugbu rẹ ame rẹ arhọ na ọphẹ. 7 Kohwo kohwo ro phikparobọ cha riuku rẹ erọnvwọn nana, me cha dia Ọghẹnẹ rọyen, kọ cha dia ọmọ mẹ. 8 Ẹkẹvuọvo, vwọ kẹ evwoshọ na kugbe ihwo ri jẹ esegbuyota evwo kugbe ihwo ri jẹfuọn ri tun ohwo oma kugbe izighẹ kugbe evwọfanrhiẹn* na kugbe ihwo ri nene emekashe rẹ Idẹbono ruẹ kuẹgbe kugbe egọedjọ kugbe ihwo eje re vwọrọ efian, ẹkẹn rayen cha dia ẹtẹrhe rọ torhẹ vẹ erhanre kugbe isọfọ* na. Ọnana mudiaphiyọ ughwu rivẹ na.”
9 Ọvo vwẹ usun rẹ emekashe ighwrẹn na ri vwo imize ighwrẹn re vọnre vẹ etiekọ ighwrẹn re kuko na da rhe, ọ da ta kẹ vwẹ nẹ: “Yanrhe, mi che dje ọpha na kẹ wẹ, aye rẹ Omogodẹ na.” 10 Ọtiọyena, ọ da vwẹ ẹgba rẹ ẹwẹn na vwo mu vwe kpo ugbenu rode ọvo ro kpenu mamọ, o de dje orere ọfuanfon na kẹ vwẹ, Jerusalẹm ro wontọ nẹ odjuvwu cha, nẹ obọ rẹ Ọghẹnẹ cha 11 ro vwo urinrin rẹ Ọghẹnẹ na. Elo rọyen pha kerẹ ọ rẹ ukuta ọvo rọ pha ghanghanre mamọ, kerẹ ukuta re se jaspa ro lo wrowro kerẹ krista. 12 O vwo igbẹhẹ rode ro kpenu mamọ kugbe anurhoro 12 vẹ emekashe 12 rehẹ anurhoro na, e si edẹ rẹ uvwiẹ 12 rẹ emọ rẹ Izrẹl phiyọ anurhoro na. 13 Anurhoro erha hẹ ẹbẹre ọnre va nẹcha, anurhoro erha hẹ obohwẹre ọnre, anurhoro erha hẹ obọrhen ọnre, anurhoro erha hẹ ẹbẹre ọnre shera. 14 Igbẹhẹ rẹ orere na ji vwo ichivwo rẹ ikuta 12, edẹ 12 rẹ iyinkọn 12 rẹ Omogodẹ na hẹ enu rayen.
15 Ohwo ro nene uvwe ta ota na yọnrọn ubiurhe rẹ oro kerẹ ovwanvwọ rere ọ sa vwọ vwanvwe orere na kugbe anurhoro rọyen kugbe igbẹhẹ rọyen. 16 Orere na vwo igogo ẹne, ugrongron rọyen vẹ ohẹhẹre rọyen abavo. Ọ da vwẹ ubiurhe na vwọ vwanvwe orere na, ọ da dia istediọmu 12,000;* ugrongron rọyen kugbe ohẹhẹre rọyen kugbe obo ro kpenu te abavo. 17 Ọ da je vwanvwe igbẹhẹ rọyen, kubit 144* vwo nene ovwanvwọ rẹ ohworakpọ, vwẹ ọke vuọvo na jẹ ovwanvwọ rẹ amakashe. 18 Asaọkiephana ukuta re se jaspa yen a vwọ bọn igbẹhẹ na, a da rha vwẹ omamọ rẹ oro ro fiotọ kerẹ ughegbe vwọ bọn orere na. 19 Koka koka rẹ ikuta eghanghanre yen e vwo ru igbẹhẹ rẹ orere na rọ pha yoyovwin na: ukuta re se jaspa yen e vwo ru uchivwo rẹsosuọ na, ọrivẹ safaira, ọrerha kasidoni, ọrẹne ẹmerad, 20 ọriyorin sadonis, ọresan sadiọs, ọrighwrẹn krisolait, ọrẹrenren bẹril, ọrirhirin topaz, ọrihwe krisopres, ọruhwọvo hayasint, ọrihwivẹ ametist. 21 Vwọba, anurhoro 12 rẹ orere na ivie eghanghanre* 12; ivie ọghanghanre ọvo yen e vwo ru anurhoro ọvuọvo. Omamọ rẹ oro rọ pha kerẹ ughegbe ra mrẹ fiẹ yen e vwo ru urhuvwun rode rẹ orere na.
22 Me mrẹ uwevwin rẹ ẹga vuọvo vwẹ evun rọye-en, kidie Jihova* Ọghẹnẹ, Ọromevwẹgba na yen uwevwin rẹ ẹga rọyen, ọtiọyen ji te Omogodẹ na. 23 Orere na guọnọ elo rẹ ọnre na yẹrẹ ọ rẹ emeranvwe na-a, kidie urinrin rẹ Ọghẹnẹ lo muo, Omogodẹ na yen urhukpẹ rọyen. 24 Ẹgborho na cha yan womarẹ elo rọyen, ivie rẹ akpọ na cha ghwa urinrin rayen ro evun rọyen. 25 A cha kanre ẹchẹ rẹ anurhoro rọyen kakaka vwẹ oghẹruvo-o, kidie ason cha dia etiyi-in. 26 Kẹ ayen cha ghwẹ urinrin kugbe ọghọ rẹ ẹgborho na ro evun rọyen. 27 Ẹkẹvuọvo, kemu kemu ro jẹfuọn kugbe kohwo kohwo ro ruẹ obo ri tun ohwo oma rọ je phiẹn ihwo cha sa ro evun rọye-en; ihwo re si edẹ rayen phiyọ ukpirhin ọbe rẹ arhọ rẹ Omogodẹ na ọvo yen cha ruọ.