Ẹvwọphia ri Jọn

14 Ọyena vwọ wan nu, me da mrẹ, nighere! Omogodẹ na ro mudia Ugbenu ri Zayọn, ọ vẹ ihwo 144,000 re si odẹ rọyen kugbe odẹ rẹ Ọsẹ rọyen phiyọ arhare rayen. 2 Mi de nyo edo ọvo ro nẹ obodjuvwu cha kerẹ edo rẹ ame buebun kugbe edo rẹ agbraran rọ vanre gangan; edo ri mi nyori na họhọ edo rẹ ihwo re sua ine ri hworo isorogun rayen. 3 Ayen sua une ọvo rọ họhọ une kpokpọ vwẹ obaro rẹ ekete na kugbe vwẹ obaro rẹ emama ekpokpọ ẹne na kugbe ekpako na, o vwo ohwo vuọvo rọ sa riẹn une yena-a, jokparẹ ihwo 144,000 na ra dẹre vwo nẹ akpọ na. 4 Enana yen ihwo re vwẹ eya vwo gbe oma rayen ẹgua-a; vwọrẹ uyota, ayen emetobẹ.* Enana yen ihwo ri nene Omogodẹ na ọkieje o toro asan rọ rare-e. A dẹ ayen vwo nẹ ohri rẹ ihworakpọ kerẹ emamọ rẹsosuọ vwọ kẹ Ọghẹnẹ kugbe Omogodẹ na, 5 a mrẹ ophiẹnvwe vuọvo vwẹ unu raye-en; ayen vwo upe-e.

6 Me da mrẹ amakashe ọfa rọ rhan vwẹ uherevie rẹ odjuvwu,* o vwo iyẹnrẹn esiri ri bẹdẹ ro che ghwoghwo kẹ ihwo re dia akpọ na, vwọ kẹ kẹgborho kẹgborho kugbe uvwiẹ kugbe ẹrẹnvwe* kugbe ihwo. 7 Kọ ta vẹ urhuru ọgangan nẹ: “Djoshọ rẹ Ọghẹnẹ wọ vwẹ urinrin kẹ, kidie unọke rẹ ẹdjọeguo rọyen na te re, ọtiọyena vwẹ ẹga kẹ Ohwo rọ ma odjuvwu na kugbe akpọ na kugbe abadi na kugbe ogbugbu rẹ ame na.”

8 Amakashe ọfa, ọrivẹ, de nene, jẹ ọ tanẹ: “O she re! Babilọn Rode na she re, ohwo rọ nẹrhẹ ẹgborho na eje da vwẹ iwaini rẹ urhurusivwe* rẹ ọfanrhiẹn* rọyen!”

9 Amakashe ọfa, ọrerha, de nene ayen, jẹ ọ ta vẹ urhuru ọgangan nẹ: “Ọ da dianẹ ohwo ọvo vwẹ ẹga kẹ eranvwe rẹ aghwa na kugbe oma rọyen, o de ji vwo oka vwẹ arhare yẹrẹ obọ rọyen, 10 kọ je cha da vwẹ iwaini rẹ ophu rẹ Ọghẹnẹ ra guare-e, re ku phiyọ uko rẹ ophu ọgangan Rọyen, ka cha vwẹ erhanre vẹ isọfọ* vwo gboja kẹ vwẹ obaro rẹ emekashe efuanfon na kugbe vwẹ obaro rẹ Omogodẹ na. 11 Ivwirhi rẹ erhanre re vwo gboja kẹ ayen na de bru kpenu rhirin bẹdi bẹdẹ, te ason te uvo o rhe vwo omaerovwon vwọ kẹ ihwo re vwẹ ẹga vwọ kẹ eranvwe rẹ aghwa na kugbe oma rọyen kugbe kohwo kohwo ro vwo oka rẹ odẹ rọye-en. 12 Ẹdia nana yen a da guọnọ akoechiro vwo mie ihwo efuanfon na, ihwo re yọnrọn iji rẹ Ọghẹnẹ, re je yọnrọn esegbuyota kpahen* Jesu kokoroko.”

13 Mi de nyo urhuru ọvo ro nẹ obodjuvwu rhe rọ tanẹ, “Si: Omavwerhovwẹn dia vwọ kẹ ihwo ri ghwuru vwọrẹ okugbe vẹ Ọrovwori na nẹ ọke nana yanran. E, ọtiọyen ẹwẹn na tare, e jẹ ayen rovwoma vwo nẹ iruo rayen, kidie erọnvwọn rẹ ayen ruru nene ayen.”*

14 Ọyena vwọ wan nu, me da mrẹ, nighere! evwru ọfuanfon ọvo, ohwo ro chidia enu rẹ evwru na họhọ ọmọ rẹ ohwo, erhu rẹ ovie rẹ oro hẹ uyovwin rọyen, ọ da rha yọnrọn ubiakpa* ọvo rọ pha dandan.

15 Amakashe ọfa de nẹ evunrẹ asan ọfuanfon rẹ uwevwin rẹ ẹga na rhe, ọ da vwẹ urhuru ọgangan vwo kperi se ohwo ro chidia enu rẹ evwru na nẹ: “Reyọ ubiakpa* wẹn rhe rere wo vun, kidie unọke re che vwo vun orhọ na te re, orhọ rẹ akpọ na vware ku re.” 16 Ohwo ro chidia enu rẹ evwru na da riẹn ubiakpa* rọyen phiyọ akpọ na, e de vun akpọ na.

17 Amakashe ọfa de ji nẹ evunrẹ asan ọfuanfon rẹ uwevwin rẹ ẹga rọhẹ obodjuvwu na rhe, o ji vwo ubiakpa* rọ pha dandan.

18 Amakashe ọfa de nẹ evunrẹ agbada na rhe, o vwo ogangan vwẹ enu rẹ erhanre na. Ọ da vwẹ urhuru ọgangan vwo kperi se ọ ro vwo ubiakpa* rọ pha dandan na nẹ: “Reyọ ubiakpa* wẹn rọ pha dandan na rhe wo koko ekrun rẹ ivaini rẹ akpọ na, kidie igrepu rọyen vware re.” 19 Amakashe na da riẹn ubiakpa* rọyen phiyọ akpọ na, o de koko ivaini rẹ akpọ na, o de do phiyọ asan rode re de mie iwaini rẹ ophu rẹ Ọghẹnẹ. 20 E de chiyin ivaini na vwẹ otafe rẹ orere na, ọbara de nẹ asan re de chiyin ivaini na rhe, o kpenu te asan rẹ ifi ra vwọ gba unu rẹ iyesi na hepha, o ji sheri te istediọmu 1,600.*