Iguẹdjọ

8 Ọyena vwọ wan nu, eshare rẹ Ifrem da ta kẹ nẹ: “Die yen wo ru avwanre na? Diesorọ wo rhe se avwanre ọke ru wọ vwọ yanran re nene Midian họnree?” Ayen da ghwọkuo gangan. 2 Ẹkẹvuọvo ọ da ta kẹ ayen nẹ: “Die yen mi ruru re se vwo dje ọ rẹ ovwan ruru? Ugbon rẹ Ifrem rhe yovwin nọ orhọ rẹ igrepu rẹ Abi-iza? 3 Obọ rẹ ovwan yen Ọghẹnẹ phi Orẹb vẹ Ziẹb isun ri Midian phiyọ, die yen mi ruru re se vwo dje ọ rẹ ovwan ruru?” Ọke rọ vwọ ta ota vwẹ idjerhe ọtiọna nu, ẹwẹn rayen de shekpotọ.*

4 Gidiọn de rhi te Jọdan na, ọ da shariẹ vrẹ. Oma ghwọrerọ vẹ eshare 300 re vẹ ọyen gba herọ na, ẹkẹvuọvo jẹ ayen je vwọtua ihwo na. 5 Ọtiọyena ọ da ta kẹ eshare ri Sọkọt: “Biko ovwan vwẹ ibrẹdi kẹ ihwo ri nene uvwe na kidie oma ghwọrọ ayen re, jẹ me vwọtua Ziba vẹ Zalmuna, ivie ri Midian.” 6 Ẹkẹvuọvo isun ri Sọkọt da tanẹ: “Diesorọ avwanre vwọ vwẹ ibrẹdi kẹ otuofovwin wẹn, wo phi Ziba vẹ Zalmuna kparobọ re?” 7 Ọtiọyena Gidiọn da tanẹ: “Fikirẹ ọnana, ọke rẹ Jihova de phi Ziba vẹ Zalmuna phiyọ obọ mẹ, me cha vwẹ idjigbẹn vẹ irhe rẹ inwe rẹ aton vwọ fa ovwan.” 8 O de nẹ etiyin kpo Pẹnuẹl, ọ da yare oyare vuọvo na, ẹkẹvuọvo eshare ri Pẹnuẹl da je kẹ ẹkpahọnphiyọ vuọvo rẹ eshare ri Sọkọt vwọ kẹ na. 9 Ọtiọyena ọ da je ta kẹ eshare ri Pẹnuẹl nẹ: “Ọke ri mi de rhivwin rhe vwọrẹ ufuoma, mi che kporon uwevwin nana ro kpenu na totọ.”

10 Asaọkiephana Ziba kugbe Zalmuna hẹ Kakọ vẹ ituofovwin rayen, omarẹ eshare 15,000. Enana yen ihwo ri chekọ vwẹ usun rẹ otuofovwin rẹ ihwo rehẹ Ẹbẹre Ọnre Va Nẹcha na eje, kidie eshare 120,000 re vwẹ ọlọkọ choma kẹ ofovwin she re. 11 Gidiọn da wan idjerhe rẹ ihwo re dia itughẹ vwẹ ẹbẹre ọnre va nẹcha ri Noba kugbe Jọgbẹha yerin kpenu, ọ da ro ihwo na ọrhan vwẹ asan rẹ ayen wonphiyọ* na ji nene ayen họnre. 12 Ọke rẹ Ziba vẹ Zalmuna vwọ djẹ, ọ da vwọtua ayen, o de mu ivie ivẹ rẹ ihwo ri Midian na Ziba kugbe Zalmuna, ọ da nẹrhẹ uguegue ro ihwo eje ri wonphiyọ etiyin oma.

13 Gidiọn ọmọ ri Joash da wan idjerhe ro kpo Hirẹs nẹ ofovwin na rhe. 14 Ọ vwọ hẹ idjerhe na, o de mu eghene ọshare ọvo ro nẹ Sọkọt rhe, ọ da nọ enọ. Ọtiọyena eghene ọshare na de si edẹ rẹ isun vẹ ekpako ri Sọkọt kẹ, eshare 77. 15 Ọtiọyena o de bru eshare ri Sọkọt na ra, ọ da tanẹ: “Ziba vẹ Zalmuna na, ihwo rẹ ovwan vwẹ fiki rọyen vwọ vwẹ ovwẹ jehwẹ na, rẹ ovwan vwọ tanẹ, ‘Diesorọ avwanre vwọ vwẹ ibrẹdi kẹ eshare wẹn rẹ oma bruku, wo phi Ziba vẹ Zalmuna kparobọ re?’” 16 Ọ da reyọ ekpako rẹ orere na, ọ da vwẹ idjigbẹn vẹ irhe rẹ inwe rẹ aton na vwọ fa eshare ri Sọkọt. 17 O de kporon uwevwin ro kpenu ri Pẹnuẹl na totọ je teyen eshare rẹ orere na hwe.

18 Ọ da nọ Ziba vẹ Zalmuna: “Oka rẹ eshare vọ yen ovwan hweri vwẹ Tebọ?” Ayen da ta kẹ nẹ: “Ayen họhọ owẹ, ayen ohwo vuọvo pha kerẹ ọmọ rẹ ovie.” 19 Ọtiọyena ọ da ta: “Ayen iniọvo mẹ, emọ rẹ oni mẹ. Jihova vwọ herọ na, ọ da dianẹ ovwan hwe ayen jovwoo, mi rhe hwe ovwaan.” 20 Ọtiọyena ọ da ta kẹ Jita ọmọ rọyen ọkpako nẹ: “Vrẹn, rere wo hwe ayen.” Ẹkẹvuọvo eghene ọshare na yoro ọlọkọ rọyen phiaa; oshọ muo, kidie eghene yen o ruẹ. 21 Ọtiọyena Ziba vẹ Zalmuna da tanẹ: “Wẹ komobọ vrẹn, rere wo teyen avwanre hwe, kidie oborẹ ohwo hepha, ọtiọyen yen ogangan rọyen je dia.”* Ọtiọyena Gidiọn de vrẹn, o de hwe Ziba vẹ Zalmuna, ọ da reyọ ekuakua rẹ osẹnvwe re họhọ emeranvwe kpokpọ rọ vwomaphia rehẹ ohọre rẹ ikamẹl rayen.

22 Ọke vwọ yan obaro eshare rẹ Izrẹl da ta kẹ Gidiọn nẹ: “Sun avwanre, wẹwẹ vẹ ọmọ wẹn kugbe uvwrọmọ wẹn, kidie wo sivwin avwanre vwo nẹ obọ ri Midian.” 23 Ẹkẹvuọvo Gidiọn da ta kẹ ayen nẹ: “Mi che sun ovwaan, ọmọ mẹ ji che sun ovwaan. Jihova yen ohwo ro che sun ovwan.” 24 Gidiọn da je ta: “Juvwe nokpẹn rẹ orọnvwọn ọvo mie ovwan: nẹ ohwo ọvuọvo kẹ vwẹ ubiosa rẹ uwen vwo nẹ ekuakua ro gborhori.” (Kidie ayen vwo ubiosa rẹ uwen rẹ oro, rọ vwọ dianẹ ayen ihwo rẹ Ishmẹl na.) 25 Ayen da kpahen nẹ: “Avwanre cha vwẹ ayen kẹ wẹ.” Ọtiọyena ayen da vwẹ ewun hwa otọ, ọshare ọvuọvo de do ubiosa rẹ uwen phiyọ vwo nẹ ekuakua ro gborhori. 26 Ọnyẹ rẹ ibiosa rẹ oro rọ nokpẹn rọyen na da dia shẹkẹl* rẹ oro 1,700, e kere ekuakua rẹ osẹnvwe re họhọ emeranvwe kpokpọ rọ vwomaphia, ilọkẹti rẹ orọnvwọn ohọre, iwun ra vwẹ ẹton rẹ ipọpo ru rẹ ivie ri Midian kuẹphiyọ, kugbe erọnvwọn ohọre re ku nẹ ikamẹl na vwọ baa.

27 Gidiọn da reyọ vwo ru ẹfọd,* o de dje phiyọ Ọfra orere rọyen; Izrẹl eje de nene gbe ọfanrhiẹn* vwẹ etiyin, ọ da rhe dia ufi vwọ kẹ Gidiọn vẹ evwruwevwin rọyen.

28 Ihwo rẹ Izrẹl de phi Midian kparobọ, ayen rha reyọ vwọso ayen* ọfaa; otọ na de vwo urovwoma* ẹgbukpe 40 vwẹ ọke ri Gidiọn.

29 Ọtiọyena Jerubel ọmọ ri Joash de rhivwin kpo uwevwin rọyen, ọ da dia oboyin.

30 Gidiọn da rhe dia ọsẹ rẹ emeshare 70,* kidie o vwo eya buebun. 31 Ọsen rọyen rọhẹ Shikẹm ji vwiẹ ọmọshare kẹ, o de se Abimẹlẹk. 32 Gidiọn ọmọ ri Joash de ghwu ọke rọ vwọ nabọ ghwore, e de sho phiyọ ushi ri Joash ọsẹ rọyen vwẹ Ọfra rẹ uvwiẹ rẹ Abi-iza.

33 Ugege rẹ Gidiọn ghwe vwo ghwu nu, ihwo rẹ Izrẹl na da rhoma nene Bel gbe ọfanrhiẹn,* ayen da vwẹ Bel-birẹt vwo mu kerẹ ọghẹnẹ rayen. 34 Ihwo rẹ Izrẹl rha karophiyọ Jihova Ọghẹnẹ rayeen, ohwo ro sivwin ayen nẹ obọ rẹ ivwighrẹn rayen eje re riariẹ ayen phiyọ; 35 ayen ji dje ẹguọnọ ro jẹ rhẹriẹ kẹ evwruwevwin ri Jerubel naa, kọyen Gidiọn, fikirẹ erọnvwọn esiri eje ro ru vwọ kẹ Izrẹl.