Diutaronomi
10 “Ọke yena Jihova da ta kẹ vwẹ: ‘Kare ephapha rẹ ukuta ivẹ re họhọ erẹsosuọ na kẹ oma wẹn, rere wo bru vwe rhe obenu rẹ ugbenu na; wọ me je vwẹ urhe vwọ kare ekpeti vwọ kẹ oma wẹn. 2 Ki mi che si eta rehẹ ephapha rẹsosuọ ru wọ guọghọre na phiyọ ayen, ku wo phi ayen phiyọ evunrẹ ekpeti na.’ 3 Me da vwẹ urhe rẹ akesha vwo ru ekpeti, me da kare ephapha rẹ ukuta ivẹ kerẹ erẹsosuọ na, mi de yerin kpo obenu rẹ ugbenu na vẹ ephapha ivẹ na vwẹ obọ mẹ. 4 O de si eta ro siri jovwo na phiyọ ephapha na, Irhi Ihwe na* rẹ Jihova vwọ phia kẹ ovwan vwẹ ugbenu na, vwo nẹ evunrẹ erhanre na rhe vwẹ ẹdẹ rẹ ọghwẹgbe na vwo koko; Jihova da vwẹ ayen kẹ vwẹ. 5 Mi de kuomarhẹriẹ, mi de wontọ nẹ ugbenu na rhe, mi de phi ephapha na phiyọ evunrẹ ekpeti ri mi ruru na, asan rẹ ayen je hepha na kirobo rẹ Jihova ji iji rọyen kẹ vwẹ.
6 “Ihwo rẹ Izrẹl de vrẹn nẹ Biẹrọt Bẹnẹ-jeakan vwo kpo Mosira. Etiyin yen Erọn de ghwu, ọyen e de ji sho, ọmọ rọyen Ẹlieza kọ ga kerẹ orherẹn vwẹ ẹdia rọyen. 7 Ayen de vrẹn nẹ etiyin vwo kpo Gọdguda, ayen de vrẹn nẹ Gọdguda vwo kpo Jọtbata, otọ rẹ ivwori re djẹ ọkẹre rẹ ame.*
8 “Ọke yena, Jihova da hẹriẹ uvwiẹ ri Livae rere ayen mu ekpeti rẹ ọphọ ri Jihova na, mudia obaro ri Jihova vwo gbodibo kẹ, ji bruba kẹ ihwo vwẹ odẹ rọyen kirobo rẹ ayen ruẹ rhi te nonẹna. 9 Ọyensorọ Livae vwo jẹ ẹkẹn yẹrẹ uku evwo vwẹ ohri rẹ iniọvo rọyen. Jihova yen uku rọyen, kirobo rẹ Jihova Ọghẹnẹ rẹ ovwan vuẹrẹ jovwo. 10 Mẹvwẹ komobọ dia enu rẹ ugbenu na kirobo ri mi ruru vwẹ ọke rẹsosuọ ye, ẹdẹ 40 kugbe ason 40, Jihova je kerhọ mẹ vwẹ ọke yena. Jihova guọnọ ghwọrọ ovwaan. 11 Ọtiọyena Jihova da ta kẹ vwẹ, ‘Kobaro kẹ ihwo na, muegbe wo vwo vrẹn rere ayen sa vwọ yanran ra re ughwẹ rẹ otọ ri mi duvwun iyorin kẹ esẹ rayen ride nẹ me cha vwọ kẹ ayen.’
12 “Asaọkiephana E Izrẹl, die yen Jihova Ọghẹnẹ rẹ ovwan nokpẹn rọyen mie ovwan? Ọnana ọvo: rẹ ovwan vwọ djoshọ ri Jihova Ọghẹnẹ rẹ ovwan, yan vwẹ idjerhe rọyen eje, vwo ẹguọnọ rọyen, ga Jihova Ọghẹnẹ rẹ ovwan vẹ ubiudu rẹ ovwan eje kugbe erhi* rẹ ovwan eje, 13 ovwan me je yọnrọn irhi kugbe iji ri Jihova re me vwọ phia kẹ ovwan nonẹna vwọ kẹ erhuvwu romobọ rẹ ovwan. 14 Nighere, Jihova Ọghẹnẹ rẹ ovwan yen vwo idjuvwu na, tobọ te idjuvwu rẹ idjuvwu na,* kugbe otọrakpọ na vẹ erọnvwọn eje rehẹ evun rọyen. 15 Ẹkẹvuọvo, esẹ rẹ ovwan ride ọvo yen Jihova sikẹre ji dje ẹguọnọ rọyen vwọ kẹ, ọ da sane ovwan re dia emọ rayen reyọ vwo nẹ ohri rẹ ihwo na eje, kirobo rẹ ovwan hepha nonẹna. 16 E gbe jẹ ovwan ru ubiudu rẹ ovwan fon* asaọkiephana, ovwan rhe ruẹ uyovwin gangaan.* 17 Kidie Jihova Ọghẹnẹ rẹ ovwan ọyen Ọghẹnẹ rẹ eghẹnẹ kugbe Ọrovwori rẹ irivwori, Ọghẹnẹ rọ rhoro, ro vwo ẹgba, rọ je vọn vẹ udidi, o nẹ ohwo ruẹẹ, a je sa jẹ udi kẹẹ. 18 O brorhiẹn ọsoso vwọ kẹ ọmọ ro jẹ ọsẹ evwo* kugbe ayeuku, o ji vwo ẹguọnọ rẹ ọrhorha, ọ kẹ emuọre vẹ iwun. 19 Ovwan mi ji vwo ẹguọnọ rẹ erhorha, kidie ovwan je dia erhorha vwẹ otọ rẹ Ijipt jovwo.
20 “Jihova Ọghẹnẹ rẹ ovwan yen ovwan cha djoshọ rọyen, ọyen ovwan cha ga, ọyen ovwan che churu mu, odẹ rọyen ovwan ji che vwo duvwun iyorin. 21 Ọyen Ohwo rẹ ovwan che jiri. Ọyen Ọghẹnẹ rẹ ovwan, ro ru erọnvwọn ride nana eje ri ji gbe ohwo unu na vwọ kẹ ovwan, erọnvwọn rẹ ovwan vwẹ ẹro robọ rẹ ovwan vwọ mrẹ. 22 Ihwo* 70 yen esẹ rẹ ovwan ride reyọ kpo Ijipt, asaọkiephana Jihova Ọghẹnẹ rẹ ovwan nẹrhẹ ovwan dia buebun kerẹ isio rẹ idjuvwu na.