Diutaronomi

30 “Ọke rẹ eta nana eje, ebruphiyọ vẹ ekan ri mi phi phiyọ obaro rẹ ovwan na de rugba vwẹ enu rẹ ovwan re, ovwan da karophiyọ ayen* vwẹ ẹgborho na eje rẹ Jihova Ọghẹnẹ rẹ ovwan djẹ ovwan ra na, 2 ovwan de rhivwin bru Jihova Ọghẹnẹ rẹ ovwan rhe je kerhọ rẹ urhuru rọyen vwo nene iji na eje re me vwọ kẹ ovwan nonẹna, te ovwan te emọ rẹ ovwan, vẹ ubiudu rẹ ovwan eje kugbe erhi* rẹ ovwan eje, 3 Jihova Ọghẹnẹ rẹ ovwan kọ cha reyọ ovwan rhivwin rhe, gbe arodọnvwẹ kẹ ovwan, je rhoma koko ovwan vwo nẹ ohri rẹ ihwo eje rehẹ asan rẹ Jihova Ọghẹnẹ rẹ ovwan hra ovwan ra na. 4 Ọ da tobọ dianẹ ihwo rẹ ovwan hrabọ kpo oboba rẹ idjuvwu na, Jihova Ọghẹnẹ rẹ ovwan che koko ovwan je reyọ ovwan rhivwin nẹ oboyin rhe. 5 Jihova Ọghẹnẹ rẹ ovwan cha reyọ ovwan ro otọ rẹ esẹ rẹ ovwan reyọre na, kẹ ovwan cha re ughwẹ rọyen; kọ cha nẹrhẹ o yovwin kẹ ovwan je nẹrhẹ ovwan bunphiyọ vwọ vrẹ esẹ rẹ ovwan. 6 Jihova Ọghẹnẹ rẹ ovwan che ru ubiudu rẹ ovwan kugbe ubiudu rẹ emọ rẹ ovwan fon,* rere ovwan vwo vwo ẹguọnọ rẹ Jihova Ọghẹnẹ rẹ ovwan vẹ ubiudu rẹ ovwan eje kugbe erhi* rẹ ovwan eje rere ovwan sa vwọ rhọ. 7 Jihova Ọghẹnẹ rẹ ovwan kọ cha hwarhiẹ ekan nana eje rhe enu rẹ ivwighrẹn rẹ ovwan ri vwo utuoma kpahen ovwan ji mukpahen ovwan.

8 “Kẹ ovwan che rhivwin je kerhọ rẹ urhuru ri Jihova ji ru nene iji rọyen eje re me vwọ kẹ ovwan nonẹna. 9 Jihova Ọghẹnẹ rẹ ovwan cha nẹrhẹ iruo rẹ obọ rẹ ovwan eje bunphiyọ gbidiki, ọ cha nẹrhẹ emọ rẹ ovwan, ichuru rẹ ovwan, kugbe ekankọn rẹ otọ rẹ ovwan bunphiyọ, kidie Jihova cha rhoma vwo omavwerhovwẹn rọ vwọ nẹrhẹ o yovwin kẹ ovwan kirobo ro vwo omavwerhovwẹn kpahen esẹ rẹ ovwan ride. 10 Ọke yena kẹ ovwan cha kerhọ rẹ urhuru ri Jihova Ọghẹnẹ rẹ ovwan je sẹro rẹ iji rọyen kugbe irhi rọyen re si phiyọ ọbe rẹ Urhi nana, kẹ ovwan che rhivwin bru Jihova Ọghẹnẹ rẹ ovwan rhe vẹ ubiudu rẹ ovwan eje kugbe erhi* rẹ ovwan eje.

11 “Asaọkiephana iji nana re me vwọ kẹ ovwan nonẹna ghwa gan nọ kẹ ovwan yẹrẹ kọ bẹn ovwan enenee.* 12 Ọ dia idjuvwu na yen ọ hephaa, rẹ ovwan da tanẹ, ‘Kẹ ono yen che kpo idjuvwu na ra reyọ vwo rhe avwanre, rere avwanre vwo nyo ji ru nene?’ 13 Yẹrẹ kẹ ẹbẹre ro chekọ rẹ abadi na yen ọ hepha rẹ ovwan da tanẹ, ‘Kẹ ono yen cha shariẹ kpo ẹbẹre ro chekọ rẹ abadi na ra reyọ vwo rhe avwanre, rere avwanre nyo ji ru nene?’ 14 Kidie ota na kẹrẹ ovwan mamọ, ọ hẹ unu robọ rẹ ovwan kugbe ubiudu robọ rẹ ovwan, rere ovwan se vwo ruo.

15 “Nighere, nonẹna mi phi arhọ vẹ obo ri yovwirin, kugbe ughwu vẹ obo re brare phiyọ obaro rẹ ovwan. 16 Ovwan da kerhọ rẹ iji ri Jihova Ọghẹnẹ rẹ ovwan re me vwọ kẹ ovwan nonẹna, womarẹ ovwan vwo vwo ẹguọnọ rẹ Jihova Ọghẹnẹ rẹ ovwan, yan vwẹ idjerhe rọyen, je sẹro rẹ iji rọyen vẹ irhi rọyen kugbe orhiẹn-ebro rọyen, kẹ ovwan cha rhọ ji bunphiyọ, Jihova Ọghẹnẹ rẹ ovwan ko che bruba kẹ ovwan vwẹ otọ rẹ ovwan cha ra re ughwẹ rọyen na.

17 “Ẹkẹvuọvo ubiudu rẹ ovwan de bo jẹ Ọghẹnẹ vwo, ovwan rha kerhọọ, a da je riẹriẹ ovwan vwọ vwẹ uyovwin kpotọ vwọ kẹ eghẹnẹ efa je ga ayen, 18 vwọrẹ imuẹro, me vuẹ ovwan nonẹna nẹ ovwan che ghwu. Ovwan cha dia kri vwẹ otọ rẹ ovwan cha shariẹ Jọdan na vrẹ ra reyọ naa. 19 Me vwẹ idjuvwu na vẹ otọrakpọ na vwo soseri vwọso ovwan nonẹna, nẹ mi phi arhọ vẹ ughwu phiyọ obaro rẹ ovwan, ebruphiyọ vẹ ekan na; ovwan gba jẹ arhọ rere ovwan sa vwọ rhọ, te ovwan te emọ rẹ ovwan, 20 womarẹ ovwan vwo vwo ẹguọnọ rẹ Jihova Ọghẹnẹ rẹ ovwan, kerhọ rẹ urhuru rọyen, ji tinkamuo, kidie ọyen arhọ rẹ ovwan, wan oma rọyen ọyen ovwan cha vwọ dia ọke grongron vwẹ otọ rẹ Jihova duvwun iyorin nẹ ọyen cha vwọ kẹ esẹ rẹ ovwan ride, Ebraham, Aizik, kugbe Jekọp.”