Jẹnẹsis
34 Asaọkiephana Daina ọmọtẹ ri Jekọp rẹ Lia vwiẹ kẹ, vwo ẹkuruemu rọ vwọ kọn brẹ emetẹ rẹ otọ na ra* ra ghwọrọ ọke kugbe. 2 Ọke rẹ Shikẹm ọmọ ri Hemọ, ohwo ri Haiv, osun rẹ otọ na vwọ mrẹ, ọ da reyọ, o de nene vwerhẹn, o de gbe ẹgua. 3 Ọkieje kọyen o* vwo roro kpahan Daina ọmọtẹ ri Jekọp, o de rhi vwo ẹguọnọ rẹ eghene aye na, kọ ta eta evwevwerhen kẹ.* 4 Ukuotọ rọyen, Shikẹm da ta kẹ ọsẹ rọyen Hemọ: “Reyọ eghene aye nana kẹ vwẹ rere ọ dia aye mẹ.”
5 Ọke rẹ Jekọp vwo nyo nẹ o gbe ọmọtẹ rọyen Daina ẹgua, jẹ emọ rọyen emeshare vẹ ichuru rọyen hẹ evunrẹ aghwa. Ọtiọyena Jekọp de fotovwin bẹsiẹ rẹ ayen vwo rhivwin rhe. 6 Ọke vwọ yanran, Hemọ ọsẹ ri Shikẹm da yanran re nene Jekọp ta ota. 7 Ẹkẹvuọvo emọ ri Jekọp de nyo kpahọn, ugege yena ayen de rhivwin nẹ aghwa rhe. Ophu de mu ayen gangan kidie ọ phọphọ Izrẹl ro vwo nene ọmọtẹ ri Jekọp vwerhẹn, obo ro fori nẹ e ruu.
8 Hemọ da ta kẹ ayen: “Ọmọ mẹ Shikẹm vwo ẹguọnọ rẹ* ọmọtẹ rẹ ovwan. Biko ovwan reyọ vwọ kẹ kerẹ aye, 9 rere avwanre vẹ ovwan vwo vwo obọechuro rẹ orọnvwe.* Ovwan kẹ avwanre emetẹ rẹ ovwan, ovwan je reyọ emetẹ rẹ avwanre vwọ kẹ oma rẹ ovwan. 10 Ovwan se nene avwanre dia, otọ na ko rhiephiyọ kẹ ovwan. Ovwan dia rere ovwan chueki vwọ je dia evun rọyen.” 11 Ọtiọyena Shikẹm da ta kẹ ọsẹ ri Daina kugbe iniọvo rọyen: “Juvwe mrẹ ẹroesiri rẹ ovwan, ke me kẹ ovwan kemu kemu rẹ ovwan nokpẹn rọyen mie vwe. 12 Ovwan se bru igho na gegerege je nokpẹn rẹ okẹ mie vwe. Me choma re me vwọ kẹ ovwan kemu kemu rẹ ovwan tare. Takpe nẹ ovwan kẹ vwẹ ọmọtẹ na kerẹ aye.”
13 Emọ ri Jekọp da kpahen kẹ Shikẹm vẹ Hemọ ọsẹ rọyen vwọrẹ ophiẹnvwe, kidie o gbe Daina oniọvo rayen ẹgua. 14 Ayen da ta kẹ ayen: “Avwanre che se ru emu tiọyeen, rẹ avwanre vwọ vwẹ oniọvo rẹ avwanre ọmọtẹ kẹ ọshare rọ je rhe yanvwee,* kidie ọyen emu rẹ ophọphọvwe kẹ avwanre. 15 Ọnana ọvo yen sa nẹrhẹ avwanre rhọnvwe: ovwan me dia kerẹ avwanre rere eshare rẹ ovwan eje yanvwe. 16 Ọke yena kẹ avwanre vwẹ emetẹ rẹ avwanre kẹ ovwan, avwanre me je reyọ emetẹ rẹ ovwan kẹ oma rẹ avwanre, kẹ avwanre nene ovwan dia, avwanre me dia ihwo ọvuọvo. 17 Ẹkẹvuọvo ovwan rha kerhọ rẹ avwanre rẹ ovwan da yanvwee, kẹ avwanre reyọ ọmọtẹ rẹ avwanre yanran.”
18 Eta rayen na vwerhen Hemọ kugbe Shikẹm ọmọ ri Hemọ oma. 19 Eghene ọshare na rhe hwọke ro vwo ru oborẹ ayen tare naa, kidie o vwo ẹguọnọ rẹ ọmọtẹ ri Jekọp na mamọ, vwọba, ọyen ohwo re me muọghọ kẹ vwẹ uwevwin rẹ ọsẹ rọyen eje.
20 Ọtiọyena Hemọ vẹ ọmọ rọyen Shikẹm de kpo anurhoro rẹ orere na, kẹ ayen ta kẹ eshare rẹ orere rayen nẹ: 21 “Eshare nana guọnọ nene avwanre dia vwọrẹ ufuoma. E jẹ ayen dia otọ rẹ avwanre, ayen je chueki vwọ, kidie otọ na rho te asan rọ da gba ayen. Avwanre sa reyọ emetẹ rayen vwo ru eya, avwanre je sa vwẹ emetẹ rẹ avwanre vwọ kẹ ayen. 22 Ọnana ọvo yen oborẹ ayen guọnọre tavwen eshare nana ke rhọnvwe nẹ avwanre vẹ ayen dia kugbe rere avwanre vẹ ayen dia ihwo ọvo: kọshare kọshare rọhẹ ohri rẹ avwanre me yanvwe kirobo rẹ ayen yanvwere. 23 E de ru ọtiọyen, ekuakua rayen, efe rayen, kugbe ichuru rayen eje rha dia e rẹ avwanre? Ọtiọyena e jẹ a rhọnvwe kẹ ayen rere ayen nene avwanre dia.” 24 Ihwo eje re wan anurhoro rẹ orere rọyen rua otafe da kerhọ rẹ Hemọ vẹ ọmọ rọyen Shikẹm, eshare na eje da yanvwe, ihwo eje re wan anurhoro rẹ orere na rua otafe.
25 Ẹkẹvuọvo vwẹ ẹdẹ rerha rẹ asan na je vwọ miavwa ayen, emeshare ri Jekọp ivẹ Simiọn vẹ Livae, iniọvo ri Daina, ayen ọvuọvo da reyọ ọlọkọ rọyen, ayen da ro orere na ọrhan, ayen de hwe eshare na eje. 26 Ayen da vwẹ ọlọkọ vwo hwe Hemọ vẹ ọmọ rọyen Shikẹm, ayen da reyọ Daina vwo nẹ uwevwin ri Shikẹm, ayen da yanran. 27 Emeshare ri Jekọp ri chekọ da ro ohri rẹ eshare re hweri na, ayen de gborho orere na kidie ayen gbe oniọvo rayen ọmọtẹ ẹgua. 28 Ayen da reyọ igodẹ vẹ ẹvwe rayen, erhuẹn rayen, ekẹkẹtẹ rayen, kugbe kemu kemu rọhẹ evunrẹ orere na kugbe aghwa. 29 Ayen ji mu ekuakua rayen eje, emọ rayen itete vẹ eya rayen eje reyọ, ji gborho kemu kemu rehẹ evunrẹ iwevwin na.
30 Ọtiọyena Jekọp da ta kẹ Simiọn vẹ Livae: “Ovwan hwarhiẹ okpetu rode bru vwe rhire, rẹ ovwan vwọ nẹrhẹ me dia obo ri gbon hwe ihwo rẹ otọ na, ihwo ri Kenan kugbe ihwo ri Pẹriz. Mi bunruu, vwọrẹ imuẹro ayen che koko vwọ họnre ovwẹ, ayen me ghwọrọ ovwẹ, te omẹvwẹ te uwevwin mẹ.” 31 Ẹkẹvuọvo ayen da ta: “Kẹ ofori nẹ e ru oniọvo rẹ avwanre ọmọtẹ kerẹ igberadja?”