Jẹnẹsis
35 Ọyena vwọ wan nu, Ọghẹnẹ da ta kẹ Jekọp: “Vrẹn wo kpo Bẹtẹl rere wọ dia etiyin, wọ me so agbada ọvo vwẹ etiyin vwọ kẹ Ọghẹnẹ rẹ uyota na rọ vwomaphia kẹ wẹ ọke wọ vwọ djẹ kẹ oniọvo wẹn Isọ.”
2 Ọtiọyena Jekọp da ta kẹ evwruwevwin rọyen kugbe ihwo na eje re vẹ ọyen gba herọ: “Ovwan si eghẹnẹ erhorha na nẹ ohri rẹ ovwan, rere ovwan ru oma rẹ ovwan fon ji wene iwun rẹ ovwan, 3 e jẹ avwanre vrẹn rere e kpo Bẹtẹl. Me cha so agbada ọvo kẹ Ọghẹnẹ rẹ uyota na vwẹ etiyin, rọ kpahen kẹ vwẹ vwẹ ẹdẹ rẹ ukpokpogho mẹ, ro ji nene uvwe dia vwẹ kasan kasan* re me rare.” 4 Ọtiọyena ayen da vwẹ eghẹnẹ erhorha na eje ro rhe ayen vwọ kẹ Jekọp, ọtiọyen ji te erọnvwọn re erhọ rehẹ erhọ rayen, Jekọp da tọn ayen phiyọ otọ* vwẹ obotọ rẹ urhe rode rọ kẹrẹ Shikẹm.
5 Ọke rẹ ayen vwọ yanran, oshọ rẹ Ọghẹnẹ de mu irere re riariẹ ayen phiyọ, ọtiọyena ayen rha vwọtua emọ ri Jekọp naa. 6 Ukuotọ rọyen Jekọp de rhi te Lọz, kọyen Bẹtẹl vwẹ otọ ri Kenan, ọ vẹ ihwo eje re vẹ ọyen gba herọ. 7 Etiyin kọyen ọ so agbada ọvo phiyọ, o de se asan na Ẹl-bẹtẹl,* kidie etiyin yen Ọghẹnẹ rẹ uyota na de dje oma kẹ ọke rọ vwọ djẹ kẹ oniọvo rọyen. 8 Ọke vwọ yanran na, Dẹbora rọ dia ọyọnrọmọ ri Rebeka de ghwu, e de sho kẹrẹ Bẹtẹl vwẹ otọ rẹ urhe rẹ ok ọvo. Ọtiọyena, o de se Ẹlọn-bẹkọt.*
9 Ọghẹnẹ da vwomaphia kẹ Jekọp obọfa ọke ro vwo nẹ Padan-eram cha, o de bruba kẹ. 10 Ọghẹnẹ da ta kẹ: “Odẹ wẹn Jekọp. Odẹ wẹn rha cha dia Jekọp ọfaa, ẹkẹvuọvo Izrẹl yen cha dia odẹ wẹn.” O de se Izrẹl. 11 Ọghẹnẹ da rhoma ta kẹ: “Mẹvwẹ Ọghẹnẹ ro Me Vwo Ẹgba na. Vwiẹ wo bunphiyọ. Ẹgborho kugbe ọghwẹgbe rẹ ẹgborho che nẹ oma wẹn rhe, ivie ji che nẹ oma wẹn rhe.* 12 Vwọ kpahen otọ re me vwọ kẹ Ebraham vẹ Aizik, wẹwẹ yen me cha vwọ kẹ, me cha vwẹ otọ na kẹ emọ* wẹn re cha vwẹ obuko wẹn.” 13 Ọghẹnẹ da yan jovwo vwẹ asan rọ vẹ ọyen da ta ota na.
14 Ọtiọyena Jekọp da vwẹ uchivwo vwo vi vwẹ asan rọ vẹ ọyen da ta ota na, uchivwo rẹ ukuta, o de ku izobo rẹ udi kuo ji ku evwri kuo. 15 Jekọp ko se asan rẹ Ọghẹnẹ de nene ta ota na Bẹtẹl.
16 Ayen de vrẹn nẹ Bẹtẹl. Ayen ji vwo sherabọ kẹ Ẹfrata emerha, Rechẹl kọ chuvwiẹ, uvwiẹ na ganre gangan. 17 Ọke rẹ uvwiẹ na vwọ bẹn kẹ re, orhere na da ta kẹ: “Wo jẹ oshọ mu wee, kidie wo ji che vwiẹ ọmọshare nana.” 18 Ọke rẹ arhọ* rọyen vwọ ghworiẹ yanran re (kidie o ghwẹ), o de se Bẹn-onai,* ẹkẹvuọvo ọsẹ rọyen de se Bẹnjamin.* 19 Ọtiọyena Rechẹl de ghwu, e de sho vwẹ orhoma idjerhe ra wan kpo Ẹfrata, kọyen Bẹtlẹhẹm. 20 Jekọp da vwẹ uchivwo vwo vi vwẹ enu rẹ ushi rọyen; ọyen uchivwo rẹ ushi ri Rechẹl rhi duvwun nonẹna.
21 Ọyena vwọ wan nu, Izrẹl de vrẹn nẹ etiyin, o de chiyin utughẹ rọyen phiyọ asan ro sherabọ kẹ uwevwin ro kpenu rẹ Ida. 22 Ọke ọvo rẹ Izrẹl je vwọ dia otọ yena, Rubẹn da yanran, o de re nene Bilha rọ dia ọsen rẹ ọsẹ rọyen vwerhẹn, Izrẹl de nyo kpahọn.
Ọtiọyena emeshare 12 yen Jekọp vwori. 23 Emọ rẹ Lia vwiẹre yen Rubẹn ọmọkpako ri Jekọp, efa ke rha hẹ Simiọn, Livae, Juda, Isaka, kugbe Zẹbulọn. 24 Emọ rẹ Rechẹl vwiẹre yen Josẹf vẹ Bẹnjamin. 25 Emọ rẹ Bilha, odibo ri Rechẹl vwiẹre yen Dan vẹ Naftalai. 26 Emọ rẹ Zilpa, odibo ri Lia vwiẹre yen Gad vẹ Asha. Enana emọ ri Jekọp re vwiẹ kẹ vwẹ Padan-eram.
27 Ukuotọ rọyen Jekọp de rhi te asan rẹ ọsẹ rọyen Aizik diare vwẹ Mamre, o de te Kiriat-aba, kọyen Hẹbrọn, asan rẹ Ebraham vẹ Aizik diare kerẹ erhorha. 28 Aizik dia akpọ te ẹgbukpe 180. 29 Aizik da wẹn ẹwẹn rọ koba rọyen, o de ghwu, e de koko bru ihwo rọyen ra,* ọke ro vwo yeren omamọ rẹ akpọ vwẹ ọke grongron nu;* emọ rọyen Isọ vẹ Jekọp de sho.