Jẹnẹsis

37 Jekọp je dia otọ ri Kenan, asan rẹ ọsẹ rọyen diare kerẹ ọrhorha.

2 Ọnana ikuegbe ri Jekọp.

Ọke rẹ Josẹf vwọ hẹ ẹgbukpe 17, eghene ọshare na vẹ emọ ri Bilha kugbe emọ ri Zilpa, eya rẹ ọsẹ rọyen, vwẹrote ichuru na. Josẹf da ghwa iyẹnrẹn ọbrabra kpahen ayen vwo rhe ọsẹ rayen. 3 Asaọkiephana Izrẹl vwo ẹguọnọ ri Josẹf vrẹ emọ rọyen ri chekọ eje, kidie ọyen ọmọ rẹ ọke ọghwo rọyen, o de ko ewun oghẹresan ọvo* vwọ kẹ. 4 Ọke rẹ iniọvo rọyen vwọ mrẹ nẹ ọsẹ rayen vwo ẹguọnọ rọyen vrẹ iniọvo rọyen eje, ayen de vwo utuoma kpahọn, ayen rhe se nene ta ota vwọrẹ ufuomaa.

5 Ọke vwọ yanran, Josẹf da vwerhẹn evwerhẹn ọvo, ọ da vuẹ iniọvo rọyen kpahọn, ọyena da nẹrhẹ ayen vwo utuoma kpahọn vrẹ obo ri jovwo. 6 Ọ da ta kẹ ayen: “Biko ovwan kerhọ rẹ evwerhẹn nana re me vwerhẹnre na. 7 Avwanre gba ekrun rẹ eka vwẹ uherevie rẹ udju na, ekrun rẹ eka mẹ de vrẹn, o de mudia gogorogo, ekrun rẹ eka rẹ ovwan da riariẹ phiyọ, ayen da vwẹ uyovwin kpotọ vwọ kẹ ekrun rẹ eka mẹ.” 8 Iniọvo rọyen da ta kẹ: “Wọ cha ghene vwẹ oma wẹn vwo mu ovie vwẹ enu rẹ avwanre rere wo sun avwanre?” Ọtiọyena ayen da mrẹ emu ọfa rọ nẹrhẹ ayen vwo utuoma kpahọn, fikirẹ evwerhẹn rọyen kugbe obo rọ tare.

9 Ọyena vwọ wan nu, ọ da vwerhẹn evwerhẹn ọfa, ọ da vuẹ iniọvo rọyen kpahọn: “Me vwerhẹn evwerhẹn ọfa. Ọ rẹ udje nana, ọnre na, emeranvwe na kugbe isio 11 vwẹ uyovwin kpotọ vwọ kẹ vwẹ.” 10 Ọtiọyena ọ da vuẹ ọsẹ rọyen kugbe iniọvo rọyen kpahọn, ọsẹ rọyen da ghwọkuo, ọ da ta kẹ: “Die yen evwerhẹn wẹn nana mudiaphiyọ? Mẹvwẹ, oni wẹn, vẹ iniọvo wẹn che ghini bru we rhe rhe vwẹ uyovwin kpotọ kẹ wẹ?” 11 Iniọvo rọyen ke rioma kpahọn, ẹkẹvuọvo ọsẹ rọyen phi eta na phiyọ ẹwẹn.

12 Iniọvo rọyen da yanran ra vwẹ odin kẹ ichuru rẹ ọsẹ rayen vwẹ asan rọ kẹrẹ Shikẹm. 13 Ọke vwọ yanran, Izrẹl da ta kẹ Josẹf: “Iniọvo wẹn vwẹrote ichuru na vwẹ asan rọ kẹrẹ Shikẹm, ọ dia ọtiọyen? Gba yanrhe rere mi ji we bru ayen ra.” Ọtiọyena Josẹf da ta kẹ: “Me choma re!” 14 Ọ da ta kẹ: “Biko, yanran rere wo re ni sẹ erọnvwọn eje shephiyọ kẹ iniọvo wẹn. Ni oborẹ ichuru na hepha rere wọ vwẹ eta rhe vwe.” Ọtiọyena o de jo yanran vwo nẹ iyara* ri Hẹbrọn, o de kpo Shikẹm. 15 Ọke vwọ yanran, ọshare ọvo da mrẹ rọ vwọ yan kpenẹ kpenẹ vwevunrẹ udju ọvo. Ọshare na da nọ: “Die yen wọ guọnọ?” 16 Ọtiọyena ọ da kpahen kẹ: “Me guọnọ iniọvo mẹ. Biko vuẹ vwẹ, tivọ yen ayen da vwẹrote ichuru na?” 17 Ọshare na da ta: “Ayen vrẹn nẹ etinẹ re, kidie mi nyori rẹ ayen vwọ tanẹ, ‘E jẹ avwanre kpo Dotan.’” Ọtiọyena Josẹf da guọnọ iniọvo rọyen yanran, ọ da mrẹ ayen vwẹ Dotan.

18 Asaọkiephana ayen da kparo mrẹ vwẹ ugboko, tavwen o ki rhi te asan rẹ ayen hepha, kẹ ayen jiroro rẹ oborẹ ayen vwọ teyọn hwe. 19 Ọtiọyena ayen da ta kẹ ohwohwo: “Nighere! Ọvwerhevwerhẹn na cha re. 20 Ovwan mọ asaọkiephana rere e hwe, rere e do phiyọ ọvo vwẹ usun rẹ egọdọ na, kẹ avwanre cha tanẹ eranvwe rẹ aghwa ọvo rọ djoma yen hwere. Ọke yena kẹ avwanre cha mrẹ oborẹ evwerhẹn rọyen na che vwo rugba.” 21 Ọke rẹ Rubẹn vwo nyo ọnana, ọ da davwẹngba ro vwo sivwon nẹ abọ rayen. Ọtiọyena ọ da ta: “E jẹ avwanre reyọ arhọ rọyeen.”* 22 Rubẹn da ta kẹ ayen: “Ovwan ku ọbara kuotọọ. Ovwan do phiyọ ọgọdọ nana vwevunrẹ aton na, ẹkẹvuọvo ovwan wan omaa.”* Ọdavwẹ rọyen ọyen o vwo sivwon nẹ obọ rayen rere ọ reyọ rhivwin bru ọsẹ rọyen ra.

23 Ugege rẹ Josẹf vwo te asan rẹ iniọvo rọyen hepha, ayen de ku ewun rọyen no oma, ewun oghẹresan ro ku phiyọ na. 24 Ayen da reyọ, ayen de do phiyọ ọgọdọ na. Ọke yena ọgọdọ na ofefe; ame vuọvo hẹ evun rọyeen.

25 Ayen de chidia rẹ ayen vwọ riemu. Ayen vwọ kpare opharo, ayen da mrẹ ẹko rẹ ihwo rẹ Ishmẹl ri nẹ Giliẹd cha. Ikamẹl rayen mu igọmu ri labdenọm, balsam, kugbe ohọrọ rẹ urhe ri rẹsinọs, ayen hẹ idjerhe kpo Ijipt. 26 Ọtiọyena Juda da ta kẹ iniọvo rọyen: “Erere vọ yen che te avwanre siẹrẹ e de hwe oniọvo rẹ avwanre ji rhurhu ọbara rọyen? 27 Asaọkiephana ovwan yanrhe rere a shẹ kẹ ihwo rẹ Ishmẹl, e jẹ avwanre djobọtee. Kidie ọyen oniọvo rẹ avwanre, uvwo rẹ avwanre.” Ọtiọyena ayen da kerhọ rẹ oniọvo rayen. 28 Ọke rẹ ineki ri Midian vwọ wanvrẹ, ayen de mu Josẹf nẹ evunrẹ ọgọdọ na rhe, ayen da shẹ idọnọ efuanfon 20 vwọ kẹ ihwo rẹ Ishmẹl. Eshare nana da reyọ Josẹf kpo Ijipt.

29 Ọke vwọ yanran, Rubẹn vwo rhivwin kpo asan ọgọdọ na, rọ vwọ mrẹ nẹ Josẹf rha hẹ ọgọdọ naa, ọ da bẹrẹ iwun rọyen. 30 Ọke ro vwo rhivwin bru iniọvo rọyen ra, o de kperi: “Ọmọ na rha hẹ etiyiin! Mẹvwẹ na—kẹ die yen mi che ru?”

31 Ọtiọyena ayen da reyọ ewun ri Josẹf, ayen de hwe ẹvwe rẹ ọshare ọvo, ayen de duvwun ewun na phiyọ ọbara na. 32 Ọyena vwọ wan nu, ayen da vwẹ ewun oghẹresan na vwo rhe ọsẹ rayen, ayen da ta: “Ọnana oborẹ avwanre mrẹre. Biko no sẹ ọnana ewun rẹ ọmọ wẹn yẹrẹ ọ dia ọyeen.” 33 Ọ da fuẹrẹn, o de kperi: “Ọnana ewun rẹ ọmọ mẹ! Eranvwe rẹ aghwa rọ djoma hwere re! Ọ ghene bẹrẹ Josẹf chẹghẹchẹghẹ!” 34 Ọtiọyena Jekọp da bẹrẹ iwun rọyen, ọ da vwẹ amwa rẹ esiso vwọ rhuon ehun rọyen, o de vwerhe ọmọ rọyen ẹdẹ buebun. 35 Emeshare rọyen eje vẹ emetẹ rọyen eje ke davwẹngba rẹ ayen vwọ vwẹ uchebro kẹ, ẹkẹvuọvo kọ sian uchebro, rọ vwọ ta: “Mi che vwerhe ọmọ mẹ bẹsiẹ mi vwo kpotọ kpo evunrẹ Ushi!”* Ọsẹ rọyen kọ viẹ fiki rọyen.

36 Asaọkiephana ihwo ri Midian na da shẹ kẹ Pọtifa vwẹ Ijipt, ohwo rode vwẹ aguare ri Fero kugbe onotu rẹ ihwo re rhẹrẹ.