Jẹnẹsis
45 Ọtiọyena Josẹf rha sa yọnrọn oma rọyen vwẹ obaro rẹ idibo rọyen eje ọfaa. O de kperi phia: “E jẹ ihwo eje vrẹn nẹ etinẹ!” Ohwo vuọvo vẹ ọyen rha herọ ọke rẹ Josẹf vwo dje oma rọyen kẹ iniọvo rọyeen.
2 Kọ viẹ gangan te asan rẹ ihwo rẹ Ijipt de nyo, uwevwin ri Fero de ji nyo. 3 Ukuotọ rọyen Josẹf da ta kẹ iniọvo rọyen: “Mẹvwẹ Josẹf. Ọsẹ mẹ jehẹ akpọ?” Ẹkẹvuọvo iniọvo rọyen sa kpahen kẹ kakakaa, kidie o gbe ayen unu. 4 Ọtiọyena Josẹf da ta kẹ iniọvo rọyen: “Biko ovwan sikẹrẹ ovwẹ.” Ọtiọyena ayen de sikẹrẹ.
Ọ da ta: “Mẹvwẹ Josẹf oniọvo rẹ ovwan, ohwo rẹ ovwan shẹ kpo Ijipt. 5 Ẹkẹvuọvo asaọkiephana ovwan muophuu, ovwan je hanrha ohwohwo kidie nẹ ovwan shẹ vwẹ rhe etinẹẹ; kidie Ọghẹnẹ ji vwe kobaro kẹ ovwan rere ọ sa vwọ sẹro rẹ arhọ. 6 Ọnana ukpe rivẹ rẹ owẹnvwe rọ cha dia otọ na, ikpe iyorin je herọ re che vwo jẹ evoro yẹrẹ jẹ evuon. 7 Ẹkẹvuọvo Ọghẹnẹ ji vwe kobaro kẹ ovwan, rere ọ sa vwọ sẹro rẹ uchekotọ kẹ ovwan vwẹ otọrakpọ na,* ọ je vwọ sẹro rẹ arhọ rẹ ovwan womarẹ usivwin rode. 8 Ọtiọyena ọ dia ovwan yen ji vwe rhe etinẹẹ, ẹkẹvuọvo Ọghẹnẹ rẹ uyota na, rere ọ sa vwọ vwẹ ovwẹ vwo mu kerẹ onotu rẹ obruche* vwọ kẹ Fero kugbe olori vwọ kẹ uwevwin rọyen eje kugbe osun rẹ otọ rẹ Ijipt eje.
9 “Ovwan rhivwin kpakpata bru ọsẹ mẹ ra rere ovwan ta kẹ, ‘Ọnana yen oborẹ ọmọ wẹn Josẹf tare: “Ọghẹnẹ vwẹ ovwẹ mu olori rẹ Ijipt eje. Gbe bru vwe rhe. Wo hwọkee. 10 Wọ me dia otọ ri Goshẹn, asan ru wọ da sa kẹrẹ ovwẹ—wẹwẹ vẹ emeshare wẹn, ivwrọmọ wẹn rẹ emeshare, igodẹ wẹn, ichuru wẹn, kugbe kemu kemu ru wo vwori. 11 Me cha kẹ wẹ emu vwẹ etiyin, kidie ẹgbukpe iyorin rẹ owẹnvwe ji chekọ. Ọ rha dia ọtiọyeen, wẹwẹ vẹ uwevwin wẹn kugbe kemu kemu ru wo vwori che hirhephiyọ igbere.”’ 12 Ovwan vẹ oniọvo mẹ Bẹnjamin sa mrẹ asaọkiephana nẹ mẹvwẹ yen ghene ta ota kẹ ovwan na. 13 Ọtiọyena ovwan vuẹ ọsẹ mẹ kpahen urinrin mẹ eje vwẹ Ijipt kugbe kemu kemu rẹ ovwan mrẹre. Asaọkiephana ovwan yanran kpakpata rere ovwan ra reyọ ọsẹ mẹ rhe etinẹ.”
14 Ọtiọyena ọ da gbane oniọvo rọyen Bẹnjamin, ọ da viẹ, Bẹnjamin da je viẹ, jẹ ọ vwẹ abọ gbane ohọre rọyen. 15 Ọ da fiọnfiọn iniọvo rọyen eje, ọ da viẹ ku ayen, ọyena vwọ wan nu, iniọvo rọyen de nene ta ota.
16 Iyẹnrẹn na de te uwevwin ri Fero nẹ: “Iniọvo ri Josẹf rhire!” Iyẹnrẹn na shephiyọ vwẹ ẹro ri Fero vẹ idibo rọyen. 17 Ọtiọyena Fero da ta kẹ Josẹf: “Vuẹ iniọvo wẹn, ‘Ovwan ru ọnana: Ovwan mu ekuakua rẹ ovwan phiyọ eranvwe rẹ ovwan ri muẹ eghwa rere ovwan kpo otọ ri Kenan, 18 rere ovwan reyọ ọsẹ rẹ ovwan kugbe evwruwevwin rẹ ovwan, ovwan bru vwe rhe etinẹ. Me cha kẹ ovwan erọnvwọn iyoyovwin rẹ otọ rẹ Ijipt, kẹ ovwan re ẹbẹre ro me yovwin rẹ otọ na. 19 Mi jurhi kẹ wẹ nẹ wọ vuẹ ayen nẹ: “Ovwan ru ọnana: Ovwan reyọ ekpẹrẹ vwo nẹ otọ rẹ Ijipt re mu emọ rẹ ovwan kugbe eya rẹ ovwan, ovwan mi ji mu ọsẹ rẹ ovwan phiyọ ọvo vwẹ usun rayen, rere ovwan rhe etinẹ. 20 Wo kpokpo oma kpahan ekuakua ru wo vworii, kidie obo ri me yovwin vwẹ otọ rẹ Ijipt eje ewẹn.”’”
21 Emọ rẹ Izrẹl de ru ọtiọyen, Josẹf da kẹ ayen ekpẹrẹ vwo nene iji ri Fero, ọ da je kẹ ayen emuọre vwọ kẹ oyan na. 22 Ọ da kẹ ayen ohwo ọvuọvo ewun ro vwo wene, ẹkẹvuọvo ọ da kẹ Bẹnjamin idọnọ efuanfon 300 vẹ iwun iyorin ro vwo wene. 23 Ọ da vwẹ erọnvwọn nana vwo rhe ọsẹ rọyen: ekẹkẹtẹ ihwe ri mu erọnvwọn iyoyovwin rẹ Ijipt kugbe ekẹkẹtẹ eya ihwe ri mu eka vẹ ibrẹdi kugbe oka rẹ emuọre efa vwo rhe ọsẹ rọyen vwọ kẹ oyan na. 24 Ọtiọyena o de siobọnu iniọvo rọyen, ayen vwọ yanran, ọ da ta kẹ ayen: “Ovwan muophu kpahan ohwohwo vwẹ idjerhee.”
25 Ayen de vrẹn nẹ Ijipt, ayen da ro otọ ri Kenan bru ọsẹ rayen Jekọp ra. 26 Ọtiọyena ayen da vuẹ nẹ: “Josẹf jehẹ akpọ, ọyen osun rẹ otọ rẹ Ijipt ejobi!” Ẹkẹvuọvo eta na te re ubiuduu, kidie o se ayen gbuyotaa. 27 Ọke rẹ ayen vwọ vuẹ eta na eje rẹ Josẹf vuẹ ayen, rọ je vwọ mrẹ ekpẹrẹ rẹ Josẹf vwọ rhe rhi muo, ẹwẹn rẹ ọsẹ rayen Jekọp da rhe sasa. 28 Izrẹl de kperi: “O teri! Ọmọ mẹ Josẹf jehẹ akpọ! Me cha yanran ra mrẹ tavwen mi ki ghwu!”