Jẹnẹsis

30 Ọke rẹ Rechẹl vwọ mrẹ nẹ o ji rhi vwiẹ ọmọ vuọvo kẹ Jekọpuu, kọ rioma kpahan oniọvo rọyen, ọ da ta kẹ Jekọp: “Kẹ vwẹ emọ, ọ rha dia ọtiọyeen, mi che ghwu.” 2 Ọtiọyena ophu de mu Jekọp gangan kpahen Rechẹl, ọ da ta: “Mẹvwẹ yehẹ ẹdia rẹ Ọghẹnẹ rọ nẹrhẹ wo jẹ emọ evwiẹ?”* 3 Ọ da ta: “Odibo ọmọtẹ mẹ Bilha na. Nene vwerhẹn rere o se vwo vwiẹ emọ kẹ vwẹ,* rere wan oma rọyen, mi ji vwo vwo emọ.” 4 Ọtiọyena ọ da vwẹ odibo rọyen Bilha vwọ kẹ kerẹ aye, Jekọp de nene vwerhẹn. 5 Bilha da mrevun, ọke vwọ yanran o de vwiẹ ọmọshare kẹ Jekọp. 6 Rechẹl da ta: “Ọghẹnẹ rhe dia oguẹdjọ mẹ re, ọ je kerhọ rẹ urhuru mẹ, rọ vwọ kẹ vwẹ ọmọshare.” Ọnana yen sorọ o vwo se Dan.* 7 Bilha odibo ri Rechẹl da rhoma mrevun obọfa, ọke vwọ yanran o de vwiẹ ọmọshare rivẹ kẹ Jekọp. 8 Ọtiọyena Rechẹl da ta: “Ohọnre ọgangan yen mi nene oniọvo mẹ họnre, mi de ji phikparobọ!” O de se Naftalai.*

9 Lia vwọ mrẹ nẹ ọyen dobọ rẹ emọ evwiẹ ji re, ọ da reyọ odibo rọyen Zilpa, ọ da vwọ kẹ Jekọp kerẹ aye. 10 Zilpa rọ dia odibo ri Lia de vwiẹ ọmọshare kẹ Jekọp. 11 Ọtiọyena Lia da ta: “Erọnvwọn shephiyọ kẹ vwẹ re!” O de se Gad.* 12 Ọyena vwọ wan nu, Zilpa odibo ri Lia de vwiẹ ọmọshare rivẹ kẹ Jekọp. 13 Lia da ta: “Oma vwerhen ovwẹ! Kidie o muẹro dẹn nẹ emetẹ na che se vwe ohwo rẹ oma vwerhan.” Ọtiọyena o de se Asha.*

14 Asaọkiephana Rubẹn yan vwẹ ọke rẹ orhọ rẹ iwiti, ọ da mrẹ imandreki* vwevunrẹ udju na. Ọtiọyena ọ da reyọ ayen rhe oni rọyen Lia. Rechẹl da ta kẹ Lia: “Biko kẹ vwẹ evo vwẹ usun rẹ imandreki rẹ ọmọ wẹn na.” 15 Ọtiọyena ọ da ta kẹ: “Ọ ru wọ reyọ ọshare mẹ na teri? Asaọkiephana wọ je cha reyọ imandreki rẹ ọmọ mẹ?” Ọtiọyena Rechẹl da ta: “Oshephiyọ. O che nene uwe vwerhẹn vwẹ ason na, rere wọ kẹ vwẹ imandreki rẹ ọmọ wẹn na.”

16 Ọke ri Jekọp vwo nẹ udju na cha vwẹ ovwọnvwọn, Lia da yanran ra vwa, ọ da ta: “Mẹvwẹ yen wo che nene vwerhẹn, kidie me vwẹ imandreki rẹ ọmọ mẹ vwọ hwosa phiyọ owẹ nure.” Ọtiọyena o de nene vwerhẹn vwẹ ason yena. 17 Ọghẹnẹ de nyo, ọ da kpahen kẹ Lia, ọ da mrevun, ọke vwọ yanran, o de vwiẹ ọmọshare riyorin kẹ Jekọp. 18 Ọtiọyena Lia da ta: “Ọghẹnẹ hwosa kẹ vwẹ re, kidie me vwẹ odibo mẹ kẹ ọshare mẹ.” O de se Isaka.* 19 Lia da mrevun obọfa, ọke vwọ yanran, o de vwiẹ ọmọshare resan kẹ Jekọp. 20 Ọtiọyena Lia da ta: “Ọghẹnẹ kẹ vwẹ re, e, mẹvwẹ, ọ kẹ vwẹ omamọ rẹ okẹ. Asaọkiephana ọshare mẹ che rhiabọreyọ ovwẹ, kidie mi vwiẹ emeshare esan kẹ re.” O de se Zẹbulọn.* 21 Ọke vwọ yanran, o de vwiẹ ọmọtẹ ọvo, o de se Daina.

22 Ukuotọ rọyen Ọghẹnẹ da karophiyọ Rechẹl, Ọghẹnẹ de nyo, ọ da kpahen kẹ, rọ vwọ nẹrhẹ ọ mrẹvun.* 23 Ọ da mrevun, o de vwiẹ ọmọshare. Ọ da ta: “Ọghẹnẹ si ophọphọvwe mẹ no re!” 24 Ọtiọyena o de se Josẹf,* rọ vwọ ta: “Jihova vwẹ ọmọshare ọfa ba kẹ vwẹ re.”

25 Rechẹl vwo vwiẹ Josẹf nu, ugege yena Jekọp da ta kẹ Leban: “Siobọnẹ uvwe rere me yanran kpo asan mẹ, mi kpo otọ mẹ. 26 Kẹ vwẹ eya mẹ kugbe emọ mẹ re me vwẹ fiki rayen ga wẹ, rere me yanran, kidie wọ nabọ riẹn obo re me ga wẹ te.” 27 Ọtiọyena Leban da ta kẹ: “Me da mrẹ ẹroesiri wẹn,—mi vwo ẹruọ rẹ oka na re, nẹ* Jihova brẹba kẹ vwẹ fiki wẹ.” 28 Vwọba, ọ da ta: “Vuẹ vwẹ obo wọ guọnọre ne me hwa kẹ wẹ, ke me cha vwẹ ayen kẹ wẹ.” 29 Ọtiọyena Jekọp da ta kẹ: “Wọ riẹn obo re me ga wẹ te kugbe oborẹ ichuru wẹn hepha vwẹ obọ mẹ; 30 tavwen me ke rhe, obo wo vwori tumukuu, ẹkẹvuọvo ichuru wẹn ki buẹnphiyọ, e da rhe dia buebun. Jihova bruba kẹ wẹ rhanvwẹ ọke me vwọ rhe na. Kẹ ọke vọ yen mi che vwo ru orọnvwọn kẹ evwruwevwin robọ mẹ?”

31 Ọtiọyena ọ da ta: “Die yen me cha kẹ wẹ?” Jekọp da ta: “Wọ cha kẹ vwẹ emu vuọvoo! Wo de se ru orọnvwọn vuọvo nana kẹ vwẹ, me cha vwẹrote igodẹ wẹn kirobo ri jovwo je sẹro rayen. 32 Me cha wan ohri rẹ ichuru wẹn eje nonẹna. Wọ me dia ohri rayen da sane igodẹ eje ri vwo ipe ri ji kere ipe kugbe igodẹ eje ri vwo ikọlọ rẹ ibrani vwẹ usun rẹ egbon itete na kugbe i ri vwo ipe ji kere ipe vwẹ usun rẹ ẹvwe rẹ eya na. Nẹ ọke nana yanran, enana keyen cha dia osa mẹ. 33 Ophiọnphiọn mẹ* ko soseri kpahen ovwẹ vwẹ ẹdẹ ru wọ rhere rhi ni osa mẹ; ọ ro jẹ ipe evwo ro ji kere ipee vwẹ usun rẹ ẹvwe rẹ eya na kugbe ọ ro jẹ ikọlọ rẹ ibrani evwo vwẹ usun rẹ egbon itete na, ku wo se no nẹ mi cho ro siẹrẹ wọ da mrẹ vwẹ obọ mẹ.”

34 Ọtiọyena Leban da ta: “Oshephiyọ! E jẹ ọ dia kirobo ru wọ tare.” 35 Vwẹ ẹdẹ yena, ọ da sane ẹvwe rẹ eshare ri vwo irhiẹ ji kere ipe kugbe ẹvwe rẹ eya na eje ri vwo ipe ji kere ipe, ayen eje ri vwo upe ọfuanfon kugbe i ri vwo ikọlọ rẹ ibrani vwẹ usun rẹ egbon itete na, ọ da reyọ ayen kẹ emọ rọyen* eshare. 36 Ọyena vwọ wan nu, o de phi ugbo rẹ oyan rẹ ẹdẹ erha phiyọ uvwre rọyen vẹ Jekọp, Jekọp kọ vwẹrote ichuru ri Leban ri chekọ vwẹ etiyin.

37 Jekọp da reyọ irhe ri stọras, almond, kugbe pleni re ghwe bru nu obọ, ọ da kpẹn ipe efuanfon phiyọ ayen, ro vwo rhie obevun rẹ irhe na re fuan na. 38 O de phi irhe rọ kpẹnre na phiyọ obaro rẹ ichuru na, vwẹ egọdọ na, vwẹ asan re kuẹ ame rẹ eranvwe na phiyọ, asan rẹ ichuru na cha rhe rhe da ame, rere ayen sa vwọ mroma vwẹ obaro rayen vwẹ ọke rẹ ayen da rhe da ame.

39 Ọtiọyena ichuru na me mroma vwẹ obaro rẹ irhe na, ichuru na mi vwiẹ emọ ri vwo irhiẹ vẹ i ri vwo ipe, kugbe i ri kere ipe. 40 Ọtiọyena Jekọp da hẹriẹ egbon itete na, ọ da nẹrhẹ ichuru na hirharoku i ri vwo irhiẹ na kugbe i ri vwo ikọlọ rẹ ibrani eje vwẹ usun rẹ ichuru ri Leban. Ọ da hẹriẹ ichuru robọ rọyen no, o rhe ku ayen kugbe ichuru ri Leban naa. 41 Kọke kọke rẹ eranvwe re pha tubie tubie na da cha mroma, Jekọp mi phi irhe na phiyọ egọdọ na vwẹ obaro rẹ ichuru na, rere ayen sa vwọ mroma vwẹ asan rẹ irhe na hepha. 42 Ẹkẹvuọvo siẹrẹ eranvwe na da dia dọndọn, o phiẹ irhe na phiyọ etiyiin. Ọtiọyena ọkieje kọyen e re pha dọndọn na vwọ dia i ri Leban, ẹkẹvuọvo e re pha tubie tubie na ke dia i ri Jekọp.

43 Ọshare na de rhi fe mamọ, o de vwo ichuru buebun kugbe idibo eshare vẹ e rẹ eya, ọtiọyen ji te ikamẹl vẹ ekẹkẹtẹ.