Jẹnẹsis
46 Ọtiọyena Izrẹl de mu erọnvwọn ejobi ro vwori,* ọ da yanran. Ọke ro vwo te Biẹ-shiba, o de ze izobo kẹ Ọghẹnẹ rẹ ọsẹ rọyen Aizik. 2 Ọghẹnẹ da ta ota kẹ Izrẹl vwẹ emramrẹ vwẹ ason, ọ da ta: “Jekọp, Jekọp!” ọtiọyena ọ da kpahen: “Mẹvwẹ na!” 3 Ọ da ta: “Mẹvwẹ yen Ọghẹnẹ rẹ uyota na, Ọghẹnẹ rẹ ọsẹ wẹn. Wo jẹ oshọ mu we wo vwo kpo Ijiptii, kidie mi che ru we phiyọ ẹgborho rode vwẹ oboyin. 4 Mẹvwẹ komobọ che nene uwe kpo Ijipt, mẹvwẹ komobọ je cha reyọ owẹ nẹ oboyin rhe, Josẹf kọ ghwobọ rọyen kpahen ẹro wẹn.”*
5 Ọyena vwọ wan nu, Jekọp de vrẹn nẹ Biẹ-shiba, emọ rẹ Izrẹl de mu Jekọp ọsẹ rayen, emọ rayen kugbe eya rayen phiyọ ekpẹrẹ rẹ Fero vwọ rhe rhi muo. 6 Ayen mu ichuru rayen vẹ ekuakua rayen rẹ ayen kokori vwẹ otọ ri Kenan nene oma. Ọtiọyena ayen da ro evunrẹ Ijipt, Jekọp vẹ emọ rọyen eje. 7 O mu emọ rọyen vẹ ivwrọmọ rọyen emeshare, emetẹ rọyen vẹ ivwrọmọ rọyen emetẹ—emọ rọyen eje nene oma ro Ijipt.
8 Asaọkiephana enana yen edẹ rẹ emọ rẹ Izrẹl re rhe Ijipt, Jekọp vẹ emeshare rọyen: Ọmọkpako ri Jekọp yen Rubẹn.
9 Emọ ri Rubẹn yen Henọk, Palu, Hẹzrọn, kugbe Kamai.
10 Emọ ri Simiọn yen Jemuẹl, Jemin, Ohad, Jekin, Zoha, kugbe Shẹol rọ dia ọmọ rẹ aye ri Kenan ọvo vwiẹ kẹ.
11 Emọ ri Livae yen Gẹshọn, Kohat, kugbe Mẹrerai.
12 Emọ ri Juda yen Ẹr, Onan, Shila, Pirẹz, kugbe Zira. Ẹkẹvuọvo Ẹr vẹ Onan ghwuru vwẹ otọ ri Kenan.
Emọ ri Pirẹz kẹ Hẹzrọn kugbe Hemọl.
13 Emọ rẹ Isaka yen Tola, Puva, Yọb, kugbe Shimrọn.
14 Emọ ri Zẹbulọn yen Sirẹd, Ilọn, kugbe Jaleẹl.
15 Enana yen emeshare ri Lia, ro vwiẹ kẹ Jekọp vwẹ Padan-eram, vẹ ọmọtẹ rọyen Daina. Emeshare rọyen vẹ emetẹ rọyen eje* kẹ 33.
16 Emọ ri Gad yen Zifiọn, Hagai, Shunai, Ẹzbọn, Irai, Arọdai, kugbe Arilai.
17 Emọ rẹ Asha yen Imnah, Ishva, Ishvai, kugbe Beraya, oniọvo rayen ọmọtẹ yen Sira.
Emọ ri Beraya yen Hiba kugbe Malkiẹ.
18 Enana yen emọ ri Zilpa, rẹ Leban vwọ kẹ ọmọtẹ rọyen Lia. O vwiẹ enana kẹ Jekọp: Ayen eje ihwo 16.*
19 Emọ ri Rechẹl rọ dia aye ri Jekọp yen Josẹf kugbe Bẹnjamin.
20 E vwiẹ Manasẹ vẹ Ifrem kẹ Josẹf vwẹ otọ rẹ Ijipt. Asenat ọmọtẹ ri Pọtaifẹra orherẹn rẹ Ọn* yen vwiẹ ayen kẹ.
21 Emọ ri Bẹnjamin yen Bila, Bika, Ashbẹl, Gira, Neman, Ihai, Rọsh, Mọpim, Họpim, kugbe Ad.
22 Enana emọ ri Rechẹl, ro vwiẹ kẹ Jekọp: Ayen eje ihwo 14.*
23 Ọmọ* ri Dan yen Hushim.
24 Emọ ri Naftalai yen Jahziẹẹl, Gunai, Jiza, kugbe Shilẹm.
25 Enana yen emọ ri Bilha, rẹ Leban vwọ kẹ ọmọtẹ rọyen Rechẹl. O vwiẹ enana kẹ Jekọp: ayen eje ihwo ighwrẹn.*
26 Ihwo eje* rẹ Jekọp vwiẹre ri nenire ro Ijipt e de si eya rẹ emọ ri Jekọp no nu kẹ 66. 27 Emọ ri Josẹf re vwiẹ kẹ vwẹ Ijipt, ivẹ.* Ihwo* rẹ uwevwin ri Jekọp eje re rhe Ijipt kẹ 70.
28 Jekọp de ji Juda kobaro kẹ ayen ra vuẹ Josẹf nẹ ọyen hẹ idjerhe kpo Goshẹn. Ọke rẹ ayen vwo te otọ ri Goshẹn, 29 Josẹf da tanẹ e muegbe rẹ akpẹrẹ rọyen, ọ da ra vwa ọsẹ rọyen Izrẹl vwẹ Goshẹn. Ọke rọ vwọ vwomaphia kẹ, ugege yena ọ da gbanọ, ọ da viẹ vwẹ uvwre rẹ ọke evo.* 30 Ọtiọyena Izrẹl da ta kẹ Josẹf: “Asaọkiephana mi muegbe mi vwo ghwu re; me mrẹ opharo wẹn re, me je riẹn nẹ wọ jehẹ akpọ.”
31 Josẹf da ta kẹ iniọvo rọyen kugbe evwruwevwin rẹ ọsẹ rọyen: “Juvwe yanran ra niyẹnrẹn kẹ Fero rere me vuẹ nẹ, ‘Iniọvo mẹ kugbe evwruwevwin rẹ ọsẹ mẹ rehẹ otọ ri Kenan, bru vwe rhe etinẹ re. 32 Eshare na isuigodẹ, ayen vwẹrote eranvwe, ayen mu ichuru rayen vẹ erhuẹn rayen kugbe erọnvwọn rẹ ayen vwori eje nene oma rhe.’ 33 Fero de se ovwan, ọ da nọ ovwan nẹ, ‘Oka rẹ iruo vọ yen ovwan ruẹ?’ 34 ovwan me ta, ‘Idibo wẹn vwẹrote igodẹ nẹ ọkiemọ rhi te ọke nana, te avwanre te esẹ rẹ avwanre ride,’ rere ovwan sa vwọ dia otọ ri Goshẹn, kidie kohwo kohwo ro suẹn igodẹ ọyen ẹgua vwọ kẹ ihwo rẹ Ijipt.”