Ukeri
20 Vwẹ emeranvwe rẹsosuọ na, ọghwẹgbe rẹ ihwo rẹ Izrẹl eje de rhi te aton ri Zin, ihwo na ke dia Kedẹsh. Etiyin Miriam de ghwu, e de ji sho.
2 Asaọkiephana ame herọ vwọ kẹ ọghwẹgbe naa, ayen de siomakoko vwọso Mosis vẹ Erọn. 3 Ihwo na ki nene Mosis kunu, kẹ ayen ta: “Mane kẹ avwanre ghwuru ọke rẹ iniọvo rẹ avwanre vwo ghwu vwẹ obaro ri Jihova! 4 Diesorọ wọ vwọ reyọ ọghwẹgbe ri Jihova ro evunrẹ aton nana rere avwanre vẹ ichuru rẹ avwanre vwo ghwu vwẹ etinẹ? 5 Diesorọ wọ je vwọ reyọ avwanre vwo nẹ Ijipt rhe orharhe asan nana? Ọnana dia asan ra sa kọn ubi vẹ ifigi kugbe ivaini vẹ ipọmigranẹti phiyọọ, ame vuọvo je herọ ra cha daa.” 6 Ọtiọyena Mosis vẹ Erọn de nẹ obaro rẹ ọghwẹgbe na kpo obaro rẹ utughẹ ra da vwoma na, ayen de she bọvwọn opharo rhuotọ, urinrin ri Jihova da vwomaphia kẹ ayen.
7 Jihova da ta kẹ Mosis: 8 “Reyọ ọkpọ na rere wo se ọghwẹgbe na koko, wẹ vẹ Erọn oniọvo wẹn, rere wọ ta ota kẹ oragha na vwẹ irharo rayen, rere ọ vwẹ ame rọyen phia, wọ me reyọ ame nẹ evunrẹ oragha na rhe kẹ ayen rere ọghwẹgbe na vẹ ichuru rayen vwọ mrẹ ame da.”
9 Ọtiọyena Mosis da reyọ ọkpọ na vwo nẹ obaro ri Jihova kirobo ro ji iji rọyen kẹ. 10 Mosis vẹ Erọn de se ọghwẹgbe na koko vwẹ obaro rẹ oragha na, ọ da ta kẹ ayen: “Asaọkiephana ovwan kerhọ, ihwo ri gbe vwọsua na! Avwanre yen cha reyọ ame vwọ kẹ ovwan vwo nẹ oragha na rhe?” 11 Ọtiọyena Mosis da kpare obọ rọyen kpenu, ọ da reyọ ọkpọ rọyen vwọ ghwiẹ oragha na abọ ivẹ, ame buebun ko hwẹ no cha, ọghwẹgbe na vẹ ichuru rayen ke da.
12 Ọke vwọ yanran na, Jihova da ta kẹ Mosis vẹ Erọn: “Kidie nẹ ovwan dje esegbuyota phia kpahen ovwẹ ji ru vwe fon vwẹ obaro rẹ ihwo Izrẹl naa, ovwan cha reyọ ọghwẹgbe nana ro otọ re me cha vwọ kẹ ayen naa.” 13 Enana yen ame ri Mẹriba,* asan rẹ ihwo rẹ Izrẹl de brenu kpahen Jihova, rọ nẹrhẹ o ru oma rọyen fon vwẹ ohri rayen.
14 Mosis de ji ikọn vwo nẹ Kedẹsh bru ovie rẹ Idọm ra: “Ọnana yen oborẹ oniọvo wẹn Izrẹl tare, ‘Wọ nabọ riẹn kpahen oja rẹ avwanre rere eje. 15 Esẹ rẹ avwanre kpo Ijipt, avwanre da dia Ijipt ikpe* buebun, ihwo rẹ Ijipt de gboja kẹ avwanre vẹ esẹ rẹ avwanre. 16 Ukuotọ rọyen avwanre de kperi se Jihova, o de nyo avwanre, o de ji amakashe ọvo rhe, ọ da reyọ avwanre nẹ Ijipt, avwanre hẹ Kedẹsh re, orere rọhẹ ughwru rẹ ekogho wẹn. 17 Biko jẹ avwanre wan otọ wẹn vrẹ. Avwanre cha wan udju yẹrẹ ogba rẹ ivaini vuọvo vrẹẹ, avwanre je cha da ame rẹ orhare vuọvoo. Avwanre cha wan Idjerhe rẹ Ovie na jẹ avwanre che kuomarhẹriẹ kpo obọrhen yẹrẹ obohwẹree, bẹsiẹ rẹ avwanre vwọ wan ekogho wẹn vrẹ.’”
18 Ẹkẹvuọvo Idọm da ta kẹ: “Wọ cha wan ekogho rẹ avwanree. Wo de ru ọtiọyen, me cha vwẹ ọlọkọ rhe vwọ vwa wẹ.” 19 Ọtiọyena ihwo rẹ Izrẹl da kpahen kẹ: “Avwanre cha wan idjerhe rode na, avwanre vẹ ichuru rẹ avwanre da da ame wẹn, avwanre cha hwosa rọyen. Avwanre de guọnọ vwẹ owọ wanvrẹ, avwanre guọnọ emu ọfaa.” 20 Dedena ọ da ta: “Wọ cha sa wanvrẹẹ.” Ọtiọyena Idọm vẹ ihwo buebun kugbe otuofovwin rọ pha gangan* da rhe vwa. 21 Idọm rha rhọnvwe nẹ Izrẹl wan ekogho rọyeen; ọtiọyena Izrẹl de kuomarhẹriẹ vwo nẹ asan rọ hepha.
22 Ihwo rẹ Izrẹl, ọghwẹgbe na eje de vrẹn nẹ Kedẹsh, ayen de rhi te Ugbenu ri Họ. 23 Ọtiọyena Jihova da ta kẹ Mosis vẹ Erọn vwẹ Ugbenu ri Họ vwẹ ughwru rẹ otọ rẹ Idọm: 24 “E che koko Erọn bru ihwo rọyen ra.* Ọ cha ro otọ re me cha vwọ kẹ ihwo rẹ Izrẹl naa, kidie ovwan ihwo ivẹ na gbe vwọso iji mẹ kpahen ame ri Mẹriba. 25 Reyọ Erọn vẹ ọmọ rọyen Ẹlieza rere wọ reyọ ayen rhe obenu rẹ Ugbenu ri Họ. 26 Ku iwun rẹ Erọn no oma rere wo ku ayen phiyọ Ẹlieza ọmọ rọyen, Erọn ko che ghwu vwẹ etiyin.”*
27 Ọtiọyena Mosis de ru kirobo rẹ Jihova ji iji rọyen, ayen de yeren Ugbenu ri Họ vwẹ irharo rẹ ọghwẹgbe na eje. 28 Mosis de ku iwun rẹ Erọn no oma, o de ku ayen phiyọ Ẹlieza ọmọ rọyen. Ọyena vwọ wan nu, Erọn de ghwu vwẹ etiyin, vwẹ enu rẹ ugbenu na. Mosis vẹ Ẹlieza de wontọ nẹ ugbenu na rhe. 29 Ọke rẹ ọghwẹgbe na eje vwọ mrẹ nẹ Erọn ghwure, uwevwin rẹ Izrẹl eje da viẹ fikirẹ Erọn vwẹ ẹdẹ 30.