Joshua

9 Ọke rẹ ivie eje rehẹ ẹbẹre ọnre shera ri Jọdan na vwo nyo kpahen obo re phiare na, e rehẹ ekogho rẹ igbenu na, e rehẹ Shẹfila, orhoma rẹ Abadi Rode* na ejobi, kugbe obaro ri Lẹbanọn—ihwo ri Hẹt, ihwo rẹ Amọ, ihwo ri Kenan, ihwo ri Pẹriz, ihwo ri Haiv, kugbe ihwo ri Jẹbus— 2 ayen de vwo obọechuro* rẹ ayen vwọ họnre vwọso Joshua vẹ Izrẹl.

3 Ihwo ri Gibiọn ji nyo kpahen oborẹ Joshua ru Jẹriko kugbe Ai. 4 Ọtiọyena ayen de dje uruemu rẹ aghwanre phia rẹ ayen vwo phi emu phiyọ esiso re ghwore mu phiyọ enu rẹ ekẹkẹtẹ rayen, vẹ ekpu rẹ iwaini re ghwore, re bẹrire, re ji ko re; 5 ayen ji ku isabato re ghwore, ri vwrẹri, re ji ko re phiyọ awọ rayen, ayen ji ku iwun re ghwore phiyọ. Ibrẹdi eje rẹ ayen ghwa nene oma pha yaya, i ji tue. 6 Ayen de bru Joshua ra vwẹ asan rẹ ayen wonphiyọ* na vwẹ Gilga, ayen da ta kẹ vẹ eshare rẹ Izrẹl nẹ: “Asan oshesheri yen avwanre nurhe. Asaọkiephana ovwan nene avwanre re ọphọ.” 7 Ẹkẹvuọvo eshare rẹ Izrẹl da ta kẹ ihwo ri Haiv na nẹ: “Ọ sa dianẹ ovwan dia kẹrẹ avwanre. Ọtiọyena kẹ mavọ avwanre vẹ ovwan sa vwọ re ọphọ?” 8 Ayen da kpahen kẹ Joshua nẹ: “Avwanre idibo* wẹn.”

Joshua da ta kẹ ayen nẹ: “Ovwan ihwo vọ, tivọ yen ovwan nurhe?” 9 Ọtiọyena ayen da kpahen kẹ nẹ: “Avwanre idibo wẹn ri nẹ asan ro sheri mamọ rhe fikirẹ odẹ ri Jihova Ọghẹnẹ wẹn, kidie avwanre nyo usi rọyen ji nyo kpahen erọnvwọn eje ro ruru vwẹ Ijipt 10 vẹ erọnvwọn eje ro ru ivie ivẹ rẹ ihwo rẹ Amọ rehẹ ẹbẹre ro chekọ* ri Jọdan na, Ovie Saihọn ri Hẹshbọn vẹ Ovie Ọg ri Beshan, rọhẹ Ashtarọt jovwo. 11 Ọtiọyena ekpako rẹ avwanre vẹ ihwo rẹ otọ rẹ avwanre eje da vuẹ avwanre nẹ, ‘Ovwan ghwa emu nene oma kpo oyan na rere we bru ayen ra. Ovwan vuẹ ayen nẹ: “Avwanre cha dia idibo rẹ ovwan; asaọkiephana ovwan nene avwanre re ọphọ.”’ 12 Ibrẹdi nana rẹ avwanre ghwa nene oma na je tuabọ vwẹ ẹdẹ rẹ avwanre vwo vrẹn nẹ uwevwin nẹ avwanre brẹ ovwan cha. Asaọkiephana ovwan sa mrẹ nẹ ọ yare, o ji tue. 13 Ikpu rẹ iwaini nana ekpokpọ ọke rẹ avwanre vwo ku iwaini phiyọ ayen, jẹ asaọkiephana e bẹrire. Iwun vẹ isabato rẹ avwanre je ghwore fikirẹ ugbo oshesheri rẹ avwanre yanre na.”

14 Ọtiọyena eshare na da reyọ* evo vwẹ usun rẹ emu rayen na, ẹkẹvuọvo ayen nọ mie Jihovaa. 15 Joshua vẹ ihwo na de vwo ọrhọnvwekugbe rẹ ufuoma, o de ji nene ayen re ọphọ nẹ ọyen che djobọte ayeen, ọtiọyen isun rẹ ọghwẹgbe na ji duvwun iyorin kẹ ayen.

16 Ẹdẹ erha vwọ wan rẹ ayen vẹ ihwo na vwọ re ọphọ nu, ayen de nyo nẹ ihwo na dia kẹrẹ ayen vwẹ asan ro ghwe sheri kẹ ayeen. 17 Ọtiọyena ihwo rẹ Izrẹl de mu oyan phiyọ, ayen de te irere rayen vwẹ ẹdẹ rerha; irere rayen na yen Gibiọn, Kifaira, Biẹrọt, kugbe Kiriat-jiarim. 18 Ẹkẹvuọvo ihwo rẹ Izrẹl na djobọte ayeen, kidie isun rẹ ọghwẹgbe na vwẹ odẹ ri Jihova Ọghẹnẹ rẹ Izrẹl vwo duvwun iyorin kẹ ayen nure. Ọtiọyena ọghwẹgbe na eje ki guẹn isun na. 19 Ọtiọyena isun na eje da ta kẹ ọghwẹgbe na ejobi nẹ: “Rọ vwọ dianẹ avwanre vwẹ odẹ ri Jihova Ọghẹnẹ rẹ Izrẹl na vwo duvwun iyorin kẹ ayen nure na, avwanre rhe che se djobọte ayeen. 20 Ọnana yen oborẹ avwanre che ru: Avwanre che djobọte ayeen, rere Ọghẹnẹ vwo jẹ ophu emuo kpahen avwanre fikirẹ iyorin rẹ avwanre duvwun kẹ ayen na.” 21 Isun na da je ta: “Ovwan hwe ayeen, ẹkẹvuọvo jẹ ayen dia ihwo ri she irhe vẹ ihwo ri vo ame vwọ kẹ ọghwẹgbe na eje.” Ọnana yen oborẹ isun na ve vwọ kẹ ayen.

22 Joshua de se ayen, ọ da ta kẹ ayen nẹ: “Diesorọ ovwan vwọ phiẹn avwanre, rẹ ovwan vwọ tanẹ, ‘Asan ro sheri kẹ ovwan mamọ yen avwanre nurhe,’ jẹ vwọrẹ uyota, ohri rẹ avwanre yen ovwan dia? 23 Nẹ ọke nana yanran, e duvwun iyorin kẹ ovwan, ọkieje yen ovwan cha vwọ dia ẹdia rẹ ọviẹn kerẹ ihwo ri she irhe kugbe ihwo ri vo ame vwẹ uwevwin rẹ Ọghẹnẹ mẹ.” 24 Ayen da kpahen kẹ Joshua nẹ: “Kidie a vuẹ idibo wẹn phephẹn nẹ Jihova Ọghẹnẹ wẹn vwẹ iji kẹ Mosis, odibo rọyen nẹ ọ vwẹ otọ na eje kẹ ovwan je ghwọrọ ihwo eje re dia otọ na no vwẹ irharo rẹ ovwan. Ọtiọyena oshọ rẹ arhọ* rẹ avwanre de mu avwanre fikirẹ ovwan, kọyensorọ avwanre vwo ru ọnana. 25 Asaọkiephana avwanre hẹ obọ wẹn. Ru kemu kemu ru wo rorori nẹ o yovwirin ro ji shephiyọ kẹ avwanre.” 26 Ọyena yen obo ro ru kẹ ayen; o sivwin ayen nẹ obọ rẹ ihwo rẹ Izrẹl na, ayen rhe hwe ayeen. 27 Ẹkẹvuọvo vwẹ ẹdẹ yena Joshua da vwẹ ayen ru ihwo ri she irhe kugbe ihwo ri vo ame vwọ kẹ ọghwẹgbe na kugbe agbada ri Jihova vwẹ kasan kasan Rọ sanere, ayen da dia ọtiọyen rhi te ọke na.