Ẹyano

34 Jihova da ta kẹ Mosis: “Kare ephapha rẹ ukuta ivẹ re họhọ erẹsosuọ na kẹ oma wẹn, ki mi che si eta rehẹ ephapha rẹsosuọ ru wọ guọghọre na phiyọ ayen. 2 Muegbe hẹrhẹ urhiọke, kidie wo che yerin kpenu rẹ Ugbenu ri Sainai vwẹ urhiọke, ku wo che mudia obaro mẹ vwẹ etiyin, vwẹ enu rẹ ugbenu na. 3 Ẹkẹvuọvo ohwo vuọvo che nene uwee, e jẹ a mrẹ ohwo ọfa vwẹ asan vuọvo vwẹ ugbenu naa. E jẹ igodẹ yẹrẹ erhuẹn dede ria ẹbe vwẹ obaro rẹ ugbenu naa.”

4 Ọtiọyena Mosis da kare ephapha rẹ ukuta ivẹ kerẹ erẹsosuọ na, o de vrẹn vwẹ edegburhiọke, o de yerin kpenu rẹ Ugbenu ri Sainai kirobo rẹ Jihova ji iji rọyen kẹ, o mu ephapha rẹ ukuta ivẹ na vwẹ obọ rọyen. 5 Jihova de wontọ vwevunrẹ evwru na, o de nene mudia etiyin, o de ghwoghwo odẹ ri Jihova. 6 Jihova kọ wan obaro rọyen, jẹ ọ ta: “Jihova, Jihova, Ọghẹnẹ rẹ arodọnvwẹ rọ je ria ehrọre, rọ fobọ muophuu, rọ vọnre vẹ ẹguọnọ ro jẹ rhẹriẹ kugbe uyota,* 7 ro dje ẹguọnọ ro jẹ rhẹriẹ kẹ uriorin buebun, ro vwo ghovwo oruchọ, urhiẹchọ, kugbe umwemwu, ẹkẹvuọvo o che jẹ oja egbe vwọ kẹ ihwo re riabee, ọ cha hwosa rẹ oruchọ rẹ esẹ vwọ kẹ emọ kugbe ivwrọmọ, uvwiẹ rẹrha kugbe ọrẹne.”

8 Mosis de brokpakpa vwẹ uyovwin kpotọ, o de sherhẹn totọ. 9 Ọ da ta: “Asaọkiephana, ọ da dianẹ me mrẹ ẹroesiri wẹn re, E Jihova, biko Jihova, gba ro ohri rẹ avwanre rere wo nene avwanre, dede nẹ avwanre ihwo ri vwo udu ọgangan,* vwo ghovwo oruchọ vẹ umwemwu rẹ avwanre rere wọ reyọ avwanre kerẹ ihwo robọ wẹn.” 10 Ọ da kpahen: “Enẹna me vẹ ovwan re ọphọ: Mi che ru emu rẹ igbevwunu re ji rhi ru vwẹ akpọ na ejobi yẹrẹ vwẹ ohri rẹ ẹgborho na eje dẹvoo vwẹ obaro rẹ ihwo wẹn eje, ihwo eje rẹ ovwan dia ohri rayen ke cha mrẹ iruo ri Jihova, kidie emu rẹ igbevwunu yen mi che ru kẹ ovwan.

11 “Kerhọ rẹ oborẹ mi ji iji rọyen kẹ ovwan nonẹna. Enẹna me djẹ ihwo rẹ Amọ, ihwo ri Kenan, ihwo ri Hẹt, ihwo ri Pẹriz, ihwo ri Haiv, kugbe ihwo ri Jẹbus nẹ obaro rẹ ovwan. 12 Ovwan jomaotọ rere ovwan vẹ ihwo rẹ otọ rẹ ovwan ra na vwo jẹ ọphọ ẹriọ, ọ rha dia ọtiọyeen, kọ cha dia ufi vwẹ ohri rẹ ovwan. 13 Ẹkẹvuọvo ovwan kporon egbada rayen, ovwan guọghọ ichivwo rẹ ẹga rayen, ovwan me je nyavwe ekpọ rẹ ẹga* rayen she. 14 Wọ vwẹ uyovwin kpotọ kẹ ọghẹnẹ ọfaa, kidie a riẹn Jihova phiyọ* ohwo rọ guọnọ ẹga ọsoso.* E, ọyen Ọghẹnẹ rọ guọnọ ẹga ọsoso. 15 Ovwan jomaotọ rere ovwan vẹ ihwo rehẹ otọ na vwo jẹ ọphọ ẹriọ, kidie ọke rẹ ayen de nene eghẹnẹ rayen gbe ọfanrhiẹn ji ze izobo kẹ eghẹnẹ rayen, e che durhie ovwan, ovwan me re nẹ izobo rayen. 16 Vwọrẹ uyota, kẹ ovwan cha reyọ emetẹ rayen evo vwọ kẹ emeshare rẹ ovwan, emetẹ rayen ki che nene eghẹnẹ rayen gbe ọfanrhiẹn, ayen me nẹrhẹ emeshare rẹ ovwan ji nene eghẹnẹ rayen gbe ọfanrhiẹn.

17 “Ovwan ruẹ eghẹnẹ rẹ utehruu.

18 “Ovwan me re Orẹ rẹ Ibrẹdi ro Jephuo. Ovwan cha re ibrẹdi ro jephuo kirobo ri mi ji iji rọyen kẹ ovwan; ovwan ru ọnana vwẹ ẹdẹ ighwrẹn vwẹ ọke re bruphiyọ vwẹ emeranvwe rẹ Ebib,* kidie emeranvwe rẹ Ebib yen ovwan vwo vrẹn nẹ Ijipt.

19 “Emekpako eje re dia emeshare* emẹ, ọtiọyen ji te ichuru rẹ ovwan eje, owenẹ ọ dia erhuẹn ọshare rẹsosuọ yẹrẹ ogodẹ ọshare rẹsosuọ. 20 Ovwan me vwẹ ogodẹ vwọ dẹ ọmọkpako rẹ ekẹkẹtẹ rẹ ovwan reyọ. Ẹkẹvuọvo ovwan rha dẹẹ, kẹ ovwan vwirhin ohọre rọyen. Ovwan me dẹ emeshare rẹ ovwan eje re dia emekpako reyọ. E jẹ ohwo vuọvo vwomaphia vwẹ obaro mẹ vẹ abọ fefee.

21 “Ẹdẹ esan yen ovwan cha vwọ wian, ẹkẹvuọvo vwẹ ẹdẹ righwrẹn na, ovwan mi rovwoma.* Ọ da tobọ dia ọke re vwo voro kugbe ọke re vwo vuẹn orhọ, ovwan che rovwoma.

22 “Ovwan me reyọ emamọ rẹsosuọ rẹ orhọ rẹ iwiti rẹ ovwan re ghworo vwọ re Orẹ rẹ Idughwrẹn rẹ ovwan, ovwan me je re Orẹ re Vwo Koko Orhọ* vwẹ oba rẹ ukpe na.

23 “Abọ erha ẹgbukpe, eshare rẹ ovwan eje me vwomaphia vwẹ obaro rẹ Ọrovwori rẹ uyota na, Jihova Ọghẹnẹ rẹ Izrẹl. 24 Kidie me cha djẹ ẹgborho na nẹ obaro rẹ ovwan, ke me cha nẹrhẹ ekogho rẹ ovwan hẹrephiyọ, o vwo ohwo vuọvo ro che vwo urhurusivwe kpahen otọ rẹ ovwan ọke rẹ ovwan da yanran ra mrẹ opharo ri Jihova Ọghẹnẹ rẹ ovwan vwẹ abọ erha ẹgbukpe naa.

25 “Ovwan vwẹ orọnvwọn vuọvo ro vwo iphuephu* vwọ ba ọbara rẹ izobo rẹ ovwan ze kẹ vwẹẹ. Ovwan yanjẹ izobo rẹ orẹ rẹ Ọwanvrẹ na vwo hrọkee.

26 “Ovwan me reyọ i ri me yovwin vwẹ usun rẹ emamọ rẹsosuọ rẹ otọ rẹ ovwan re ghworo rhe uwevwin ri Jihova Ọghẹnẹ rẹ ovwan.

“Ovwan reyọ ameivie rẹ oni ẹvwe vwo chere ọmọ rọyeen.”

27 Jihova da ta kẹ Mosis: “Wo mi si eta nana phiyotọ kidie vwo nene eta nana, ọyen mẹ vẹ owẹ kugbe Izrẹl cha vwọ re ọphọ.” 28 Ọ vẹ Jihova da dia etiyin ẹdẹ 40 kugbe ason 40. Ọ re ibrẹdii,* ọ je da amee. O* de si eta rẹ ọphọ na, Irhi Ihwe na phiyọ ephapha na.

29 Mosis de wontọ nẹ Ugbenu ri Sainai rhe, jẹ ephapha ivẹ rẹ Oseri na hẹ obọ rọyen. Ọke ro vwo wontọ nẹ ugbenu na rhe, Mosis riẹnre nẹ opharo rọyen loo, kidie o nene Ọghẹnẹ ta ota rhanvwẹsiẹn. 30 Ọke rẹ Erọn vẹ ihwo rẹ Izrẹl vwọ mrẹ Mosis, ayen de noso nẹ opharo rọyen lo, oshọ rẹ ayen vwo sikẹrẹ ko muẹ ayen.

31 Ẹkẹvuọvo Mosis de se ayen, ọtiọyena Erọn vẹ isun rẹ ọghwẹgbe na eje de bro rhe, Mosis de nene ayen ta ota. 32 Ọyena vwọ wan nu, ihwo rẹ Izrẹl eje de sikẹrẹ, ọ da vwẹ irhi na eje rẹ Jihova vwọ kẹ vwẹ Ugbenu ri Sainai na vwọ kẹ ayen. 33 Ọke rẹ Mosis de nene ayen ta ota nu, ọ me vwẹ oga* vwo rhurhu opharo rọyen. 34 Ẹkẹvuọvo ọke rẹ Mosis de kpo obaro ri Jihova re nene ta ota, o mi si oga na nẹ opharo bẹsiẹ rọ vwọ ro otafe. O de ru nu, ọ me ro otafe, ọ me vwẹ iji ra vwọ kẹ vwọ phia kẹ ihwo rẹ Izrẹl. 35 Ihwo rẹ Izrẹl da mrẹ nẹ opharo ri Mosis lo; ọtiọyena Mosis da rhoma vwẹ oga na vwo rhurhu opharo rọyen, bẹsiẹ rọ vwọ yanran re nene Ọghẹnẹ ta ota.