Iguẹdjọ
7 Ọyena vwọ wan nu, Jerubel, kọyen Gidiọn, vẹ ihwo na eje re vẹ ọyen gba herọ de vrẹn vwẹ edegburhiọke, ayen de wonphiyọ* asan ame ri Herọd, jẹ Midian wonphiyọ ẹbẹre rẹ obohwẹre ọnre rẹ asan rẹ Gidiọn wonphiyọ na, vwẹ ugbenu otete ri Morẹ vwẹ iyara* na. 2 Jihova da ta kẹ Gidiọn nẹ: “Ihwo re vẹ owẹ gba herọ na bun nọ, ri mi vwo phi Midian phiyọ obọ rayen. Ọ rha dia ọtiọyeen, Izrẹl sa rhe yonma kẹ vwẹ rẹ ayen da tanẹ, ‘Obọ mẹ yen sivwin uvwe.’ 3 Asaọkiephana biko ghwoghwo vwẹ obaro rẹ ihwo na nẹ: ‘E jẹ kohwo kohwo rẹ oshọ muẹ, rọ je phariẹ rhivwin kpo.’” Ọtiọyena Gidiọn da davwen ayen ni. O vwo ru ọyena nu, ihwo 22,000 de rhivwin kpo, 10,000 da domaji.
4 Jihova da je ta kẹ Gidiọn nẹ: “Ihwo na ji bun nọ. Vuẹ ayen nẹ ayen kpo asan ame na rere me davwen ayen ni kẹ wẹ vwẹ etiyin. Ọke me da ta kẹ wẹ nẹ, ‘Ọnana che nene uwe,’ o che nene uwe, ẹkẹvuọvo me da ta kẹ wẹ nẹ, ‘Ọnana che nene uwee,’ o che nene uwee.” 5 Ọtiọyena ọ da reyọ ihwo na kpo asan ame na.
Jihova da ta kẹ Gidiọn nẹ: “Hẹriẹ kohwo kohwo rọ vwẹ ẹrẹnvwe rọyen se ame da kirobo rẹ eranko vwẹ ẹrẹnvwe rọyen se ame da vwo nẹ ihwo ri shiguẹ totọ da ame.” 6 Uchunu rẹ ihwo re vwẹ obọ rayen sẹrhẹ ame da da dia eshare 300. Ihwo ri chekọ na shiguẹ totọ da ame.
7 Jihova da ta kẹ Gidiọn nẹ: “Me cha vwẹ eshare 300 re vwẹ obọ sẹrhẹ ame da na vwo sivwin ovwan, mi ji che phi Midian phiyọ obọ wẹn. Ẹkẹvuọvo e jẹ ihwo ri chekọ na eje rhivwin kpo.” 8 Ayen vwọ reyọ ekuakua vẹ egban na mie ihwo na nu, ọ da tanẹ eshare rẹ Izrẹl ri chekọ na eje rhivwin kpo, eshare 300 na ọvo kọyen ọ yan jovwo. Asan ri Midian wonphiyọ na hẹ obotọ rẹ asan ro wonphiyọ vwẹ iyara na.
9 Vwẹ ason yena Jihova da ta kẹ nẹ: “Vrẹn, re nene ayen họnre vwẹ asan rẹ ayen wonphiyọ na, kidie mi phi ayen phiyọ obọ wẹn nure. 10 Ẹkẹvuọvo ọ da dianẹ oshọ ru wo vwo nene ayen họnre mu we, wẹ vẹ Piura rẹ odibo wẹn gbe kpo asan rẹ ayen wonphiyọ na. 11 Kerhọ rẹ oborẹ ayen ta, ọyena da wan nu, ku wo che fiudugberi* ru wo vwo nene ayen họnre vwẹ asan rẹ ayen wonphiyọ na.” Ọtiọyena ọ vẹ Piura rẹ odibo rọyen de kpo ọkọkọ rẹ asan rẹ otuofovwin na wonphiyọ na.
12 Asaọkiephana Midian vẹ Amalẹk kugbe ihwo rehẹ Ẹbẹre Ọnre Va Nẹcha na eje vọn iyara na kerẹ ẹko rẹ ebaka, ikamẹl rayen vwo unuu, ayen pha buebun kerẹ ehavwo* rehẹ orhoma rẹ abadi. 13 Asaọkiephana Gidiọn da rhe, jẹ ọshare ọvo gbikun rẹ evwerhẹn rọ vwerhẹnre kẹ ọrivẹ rọyen, ọ da tanẹ: “Ọnana yen evwerhẹn re me vwerhẹnre na. O vwo ibrẹdi rẹ ibali rọ pha ghorien ghorien ro ghorien ro evunrẹ asan rẹ Midian wonphiyọ na. O de ghorien te asan utughẹ ọvo, o de dje gangan, ọ da guọghọ totọ. E, ọ gare utughẹ na vi otọ, utughẹ na de she totọ.” 14 Ọtiọyena ọrivẹ rọyen na da tanẹ: “Ọnana dia emu ọfaa, ọnana ọlọkọ ri Gidiọn ọmọ ri Joash, ohwo rẹ Izrẹl. Ọghẹnẹ phi Midian vẹ otuofovwin na eje phiyọ obọ rọyen nure.”
15 Ugege rẹ Gidiọn vwo nyo ọshare ro gbikun rẹ evwerhẹn na kugbe otọ rọyen, ọ da vwẹ uyovwin kpotọ rọ vwọ ga ẹga. Ọyena vwọ wan nu, o de rhivwin kpo asan rẹ ihwo rẹ Izrẹl na wonphiyọ, ọ da tanẹ: “Ovwan vrẹn, kidie Jihova phi otuofovwin ri Midian na phiyọ obọ rẹ ovwan nure.” 16 Ọtiọyena ọ da ghare eshare 300 na phiyọ ẹko erha, ọ da kẹ ayen eje egban kugbe echẹ ifefe ride vẹ ibiurhe re la vwẹ evun rayen. 17 Ọ da ta kẹ ayen nẹ: “Ovwan ni vwe rere ovwan ru obo ri mi ghwe ru. Ọke ri mi de kpo ọkọkọ rẹ asan rẹ ayen wonphiyọ na, ovwan mi ghwe ru obo ri mi ruru. 18 Ọke ri mi de hworo ọgban na, mẹvwẹ vẹ ihwo eje re vẹ ovwẹ gba herọ na, ovwan mi ji hworo egban na nene asan rẹ ayen wonphiyọ na eje rere ovwan kperi, ‘Ọ ri Jihova kugbe ọ ri Gidiọn!’”
19 Gidiọn vẹ eshare 100 re vẹ ọyen gba herọ na de kpo ọkọkọ rẹ asan rẹ ayen wonphiyọ na vwẹ ọtonphiyọ rẹ orhẹrẹ rẹ uherevie rẹ ason na,* re ghwe vwo wene isodje re rhẹrẹ na nu. Ayen de hworo egban na je guọghọ echẹ ride rehẹ obọ rayen na. 20 Ọtiọyena ẹko erha na de hworo egban na, ayen da guọghọ echẹ ride na. Ayen vwẹ obohwẹre rayen yọnrọn ibiurhe re la na, ayen da rha vwẹ obọrhen rayen yọnrọn egban na, ayen de kperi phia: “Ọlọkọ ri Jihova kugbe ọ ri Gidiọn!” 21 Vwẹ ọke yena eje na jẹ ọshare ọvuọvo mudia asan rọyen riariẹ asan rẹ ayen wonphiyọ na, otuofovwin na eje da djẹ, jẹ ayen kperẹ rẹ ayen vwọ djẹ na. 22 Eshare 300 na ji vwo hworo ọgban na, Jihova da nẹrhẹ ọlọkọ rẹ ohwo ọvuọvo vwọso ọrivẹ rọyen vwevunrẹ asan rẹ ayen wonphiyọ na eje; otuofovwin na da djẹ rhirin re te Bẹt-shita, kpo Zẹrera, rhirin re te ughwru rẹ Ebẹl-mẹhola rọ kẹrẹ Tabat.
23 E de se eshare rẹ Izrẹl rẹ uvwiẹ ri Naftalai, Asha, kugbe Manasẹ eje koko, ayen da vwọtua Midian. 24 Gidiọn de ji ikọn ro evunrẹ ekogho rẹ igbenu rẹ Ifrem eje, tanẹ: “Ovwan yanran re nene Midian họnre, rere ovwan reyọ asan ra wan kpo asan ame na rhirin re te Bẹt-bara kugbe Jọdan.” Ọtiọyena eshare rẹ Ifrem eje de siomakoko, ayen da reyọ asan ame na rhirin re te Bẹt-bara kugbe Jọdan. 25 Ayen ji mu isun ri Midian ivẹ, Orẹb kugbe Ziẹb; ayen hwe Orẹb vwẹ enu rẹ oragha rẹ Orẹb, ayen de rhe hwe Ziẹb vwẹ asan re de miẹ iwaini ri Ziẹb. Ayen da je vwọtua Midian ji mu uyovwin rẹ Orẹb vẹ Ziẹb bru Gidiọn ra vwẹ ekogho ri Jọdan na.