Livitikọs
21 Jihova da ta kẹ Mosis: “Ta kẹ irherẹn na, emọ rẹ Erọn, rere wọ vuẹ ayen nẹ, ‘E jẹ ohwo vuọvo gbe oma rọyen ẹgua fikirẹ ohwo ro ghwuru* vwẹ ohri rẹ ihwo rọyeen. 2 Ẹkẹvuọvo o se ru ọtiọyen fikirẹ ohwo rẹ orua rọyen rọ kẹrerẹ, fikirẹ oni rọyen, ọsẹ rọyen, ọmọ rọyen ọmọshare, ọmọ rọyen ọmọtẹ, oniọvo rọyen ọshare, 3 o ji se gbe oma rọyen ẹgua fikirẹ oniọvo rọyen ọmọtẹ, ọ da dia ọmọtobẹ rọ kẹrerẹ rọ je rhe rọvwọọn. 4 E jẹ o gbe oma rọyen ẹgua je phọphọ oma rọyen fikirẹ aye rẹ ọshare ọfa vwẹ usun rẹ ihwo rọyeen. 5 E jẹ ayen wanre ẹton rẹ uyovwin rayen muotọ yẹrẹ brẹ ẹtuegban rayen yẹrẹ brẹ eka phiyọ oma rayeen. 6 E jẹ ayen dia fuanfon vwọ kẹ Ọghẹnẹ rayen, ayen je phọphọ odẹ rẹ Ọghẹnẹ rayeen, kidie ayen vwẹ izobo ri Jihova ra vwẹ erhanre torhẹ vwọ kpahotọ kẹ, ibrẹdi* rẹ Ọghẹnẹ rayen na, e jẹ ayen fon. 7 E jẹ ayen rọvwọn igberadja, aye re gberi ẹgua, yẹrẹ aye rọ vẹ ọshare rọyen fan orọnvwee, kidie orherẹn na pha fuanfon kẹ Ọghẹnẹ rọyen. 8 Ovwan mi ruo fon kidie ọyen ohwo rọ vwẹ ibrẹdi na vwọ kpahotọ kẹ Ọghẹnẹ rẹ ovwan. E jẹ ọ dia fuanfon kẹ ovwan, kidie mẹvwẹ ri Jihova ro ruẹ ovwan fuan na, me fonro.
9 “‘Asaọkiephana ọ da dianẹ ọmọtẹ rẹ orherẹn kọ phọphọ oma rọyen womarẹ o vwo gbe igberadja, jẹ ọ phọphọ ọsẹ rọyen. E jẹ a vwẹ erhanre vwọ torhẹ.
10 “‘Orherẹn rode rẹ iniọvo rọyen, ọ re ku evwri rẹ ẹjẹreyọ na ku uyovwin rọyen, re ji vwo mu* ro vwo ku iwun rẹ orherẹn na phiyọ, yanjẹ ẹton rẹ uyovwin rọyen vwo yanghan yanghan yẹrẹ bẹrẹ iwun rọyeen. 11 E jẹ o siẹkẹrẹ orivwin rẹ ohwo vuọvoo;* ọ tobọ gbe oma rọyen ẹgua fikirẹ ọsẹ rọyen yẹrẹ oni rọyeen. 12 E jẹ o nẹ asan ọfuanfon na kpo otafee, ọ je phọphọ asan ọfuanfon rẹ Ọghẹnẹ rọyeen, kidie oka rẹ omaẹvwọkpahotọ na, evwri rẹ ẹjẹreyọ rẹ Ọghẹnẹ rọyen, hẹ oma rọyen. Mẹvwẹ Jihova.
13 “‘E jẹ ọ rọvwọn aye rọ dia ọmọtobẹ. 14 Ọ cha sa rọvwọn ayeuku, aye rọ fan orọnvwe, ohwo re gberi ẹgua, yẹrẹ igberadjaa; ẹkẹvuọvo e jẹ ọ reyọ ọmọtobẹ nẹ ohri rẹ ihwo rọyen kerẹ aye. 15 E jẹ ọ phọphọ emọ* rọyen vwẹ ohri rẹ ihwo rọyeen, kidie mẹvwẹ Jihova, ohwo ro ruo fuan na.’”
16 Jihova da rhoma ta ota kẹ Mosis, ọ da ta: 17 “Vuẹ Erọn nẹ, ‘E jẹ ohwo vuọvo vwẹ usun rẹ emọ* wẹn vwẹ uvwiẹ rayen eje ro vwo asan ro shechọ vwẹ oma rọyen yancha rọ vwọ vwẹ ibrẹdi rẹ Ọghẹnẹ rọyen vwọ kpahotọọ. 18 Ohwo rẹ asan ọvo shechọ vwẹ oma rọyen da herọ, e jẹ ọ yanchaa: ohwo rọ dia orhuẹro yẹrẹ ukpono yẹrẹ ohwo rẹ opharo rọyen ruoka* yẹrẹ ohwo rẹ ẹbẹre ọvo rẹ oma rọyen gron nọ, 19 ohwo rẹ owọ yẹrẹ obọ rọyen vwirhirin, 20 ọsuke yẹrẹ ohwo rọ pha kuankon, yẹrẹ ohwo ro vwo ọga rẹ ẹro yẹrẹ ẹvwen* yẹrẹ ephrẹvwe* yẹrẹ ohwo rọ wan oma vwẹ ibi ivwrite. 21 E jẹ ohwo vuọvo vwẹ usun rẹ emọ* rẹ Erọn orherẹn na ro vwo asan ro shechọ vwẹ oma rọyen yancha rhe vwẹ izobo ri Jihova ra vwẹ erhanre torhẹ vwọ kpahotọọ. Kidie nẹ o vwo asan ro shechọ vwẹ oma rọyen na, ọ cha sa yanrhe rhe vwẹ ibrẹdi rẹ Ọghẹnẹ rọyen vwọ kpahotọọ. 22 Ọ sa re ibrẹdi rẹ Ọghẹnẹ rọyen vwẹ usun rẹ erọnvwọn re ma fon kugbe erọnvwọn efuanfon na. 23 Ẹkẹvuọvo o che se sikẹrẹ ikọtini naa, ọ je cha sa yanrhe asan agbada naa, kidie asan ọvo shechọ vwẹ oma rọyen; e jẹ ọ phọphọ asan ọfuanfon mẹẹ, kidie mẹvwẹ Jihova, ohwo ro ruẹ ayen fuan na.’”
24 Ọtiọyena Mosis da ta ota kẹ Erọn vẹ emọ rọyen kugbe ihwo rẹ Izrẹl eje.