Iguẹdjọ
13 Ihwo rẹ Izrẹl da rhoma ru obo re brare vwẹ ẹro ri Jihova, Jihova de phi ayen phiyọ obọ rẹ ihwo ri Filistia vwẹ ẹgbukpe 40.
2 Vwẹ uvwre rẹ ọke nana, o vwo ohwo ri Zora ọvo ro nẹ orua ri Dan rhe, odẹ rọyen Manoa. Aye rọyen ẹgan, o vwo ọmọọ. 3 Ọke vwọ yanran na, amakashe ri Jihova da vwomaphia kẹ aye na, ọ da ta kẹ nẹ: “Nighere, wẹwẹ ẹgan wo vwo ọmọọ. Ẹkẹvuọvo wọ cha mrevun ku wo che vwiẹ ọmọshare. 4 Ọtiọyena gba jomaotọ, wọ da iwaini yẹrẹ koka koka rẹ udi ọgangaan, wọ je riemu vuọvo ro jẹfuọọn. 5 Nighere! Wọ cha mrevun ku wo che vwiẹ ọmọshare, a vwẹ anre* vuọvo vwo te uyovwin rọyeen, kidie ọmọ na cha dia Nazarait rẹ Ọghẹnẹ vwo nẹ evun* rhe, ọ cha kobaro ro vwo sivwin Izrẹl nẹ obọ rẹ ihwo ri Filistia na.”
6 Aye na da yanran ra ta kẹ ọshare rọyen nẹ: “Ohwo rẹ Ọghẹnẹ rẹ uyota na ọvo bru vwe rhe, ọ pha kerẹ amakashe rẹ Ọghẹnẹ rẹ uyota na, ọ vọnre vẹ urinrin. Me nọrọ asan ro nurhee, ọ je vuẹ vwẹ odẹ rọyeen. 7 Ẹkẹvuọvo ọ ta kẹ vwẹ nẹ, ‘Nighere! Wọ cha mrevun ku wo che vwiẹ ọmọshare. Asaọkiephana wọ da iwaini yẹrẹ koka koka rẹ udi ọgangaan, wọ je riemu vuọvo ro jẹfuọọn, kidie ọmọ na cha dia Nazarait rẹ Ọghẹnẹ vwo nẹ evun* rhe rhirin re te ẹdẹ ughwu rọyen.’”
8 Manoa da rẹ Jihova, ọ da tanẹ: “Wọ ghwọọ, Jihova. Biko jẹ ohwo rẹ Ọghẹnẹ rẹ uyota na ru wo ji rhe nananana rhoma rhivwin rhe, rhe vwẹ odjekẹ kẹ avwanre kpahen obo ro fori nẹ avwanre ru kẹ ọmọ rẹ avwanre che vwiẹ na.” 9 Ọtiọyena Ọghẹnẹ rẹ uyota na da kerhọ ri Manoa, amakashe rẹ Ọghẹnẹ rẹ uyota na da rhoma rhivwin bru aye na rhe ọke ro vwo chidia otafe;* jẹ Manoa rẹ ọshare rọyen hẹ etiyiin. 10 Aye na de brokpakpa djẹ yanran ra vuẹ ọshare rọyen nẹ: “Nighere! Ọshare ro bru vwe rhe ẹdẹ yena ye rhoma vwomaphia kẹ vwẹ re.”
11 Ọtiọyena Manoa de vrẹn o de nene aye rọyen. O de bru ọshare na ra, ọ da nọ nẹ: “Wẹwẹ yen ọshare ro nene aye mẹ ta ota na?” Ọ da kpahen nẹ: “E, omẹvwẹ.” 12 Manoa da ta: “E jẹ eta wẹn na rugba! Oka rẹ akpọ vọ yen ọmọ na che yerin, oka rẹ iruo vọ yen o che ru?” 13 Ọtiọyena amakashe ri Jihova da ta kẹ Manoa nẹ: “E jẹ aye wẹn kẹnoma kẹ kemu kemu re me vuẹrẹ nẹ ọ kẹnoma kẹ na. 14 Ọ ria orọnvwọn vuọvo ro nẹ ivaini rẹ igrepu rhee, ọ da iwaini yẹrẹ koka koka rẹ udi ọgangaan, ọ je riemu vuọvo ro jẹfuọọn. E jẹ o ru erọnvwọn eje ri mi ji iji rọyen kẹ na.”
15 Manoa da ta kẹ amakashe ri Jihova na nẹ: “Biko hẹrhẹ, rere avwanre chere ọmọ rẹ ẹvwe kẹ wẹ.” 16 Ẹkẹvuọvo amakashe ri Jihova da ta kẹ Manoa nẹ: “Me da hẹrhẹ, me cha riemu wẹẹn; ẹkẹvuọvo wọ da guọnọ ze izobo rẹ ẹtorhẹ kẹ Jihova, wo se vwo ze.” Manoa riẹnre nẹ amakashe ri Jihova yen o ruẹẹ. 17 Ọtiọyena Manoa da nọ amakashe ri Jihova na nẹ: “Die yen odẹ wẹn, rere avwanre se vwo muọghọ kẹ wẹ ọke rẹ ota wẹn na de rugba?” 18 Ẹkẹvuọvo amakashe ri Jihova na da ta kẹ nẹ: “Diesorọ wọ vwọ nokpẹn rẹ odẹ mẹ, jẹ wọ mrẹ nẹ ọ rẹ igbevwunu?”
19 Manoa da reyọ ọmọ rẹ ẹvwe na vẹ izobo rẹ eka, ọ da vwẹ ayen ze kẹ Jihova vwẹ enu rẹ oragha. Manoa vẹ aye rọyen vwo nẹ na, jẹ O* ruẹ orọnvwọn rẹ igbevwunu ọvo. 20 Erhanre na vwọ la nẹ agbada na kpenu na, amakashe ri Jihova na da ro evunrẹ erhanre ro nẹ agbada na kpenu na, o de nene kpenu, jẹ Manoa vẹ aye rọyen no yanran. Siẹvuọvo na, ayen de she bọvwọn opharo rhuotọ. 21 Amakashe ri Jihova rha rhoma vwomaphia kẹ Manoa vẹ aye rọyen ọfaa. Ọtiọyena Manoa da rhe mrẹvughe nẹ amakashe ri Jihova yen o ruẹ. 22 Manoa da ta kẹ aye rọyen nẹ: “Avwanre che je ghwoo, kidie Ọghẹnẹ yen avwanre mrẹre na.” 23 Ẹkẹvuọvo aye rọyen da ta kẹ nẹ: “Ọ da dianẹ Jihova guọnọ teyen avwanre hwe jovwo, o rhe rhiabọreyọ izobo rẹ ẹtorhẹ kugbe izobo rẹ eka na mie avwanree, o rhe dje erọnvwọn nana eje kẹ avwanree, ọ rha je vuẹ avwanre erọnvwọn nana vuọvoo.”
24 Ọke vwọ yan obaro, aye na de vwiẹ ọmọshare, o de se Samsin; rẹ ọmọ na vwọ rhua na, jẹ Jihova brẹba kẹ. 25 O rhi vwo te ọke ọvo, ẹwẹn ri Jihova kọ wian vwẹ oma rọyen vwẹ Mehanẹ-dan, rọhẹ uvwre ri Zora vẹ Ẹshtaọl.