Jẹnẹsis
39 Asaọkiephana a reyọ Josẹf kpo Ijipt re, ohwo rẹ Ijipt ọvo re se Pọtifa, ohwo rode vwẹ ọguan ri Fero kugbe onotu rẹ ihwo re rhẹrẹ da dẹ mie ihwo rẹ Ishmẹl re reyerọ kpo etiyin. 2 Ẹkẹvuọvo Jihova vẹ Josẹf herọ. Fikirẹ ọtiọyena erọnvwọn eje ki shephiyọ kẹ, a da reyọ vwo mu vwẹ enu rẹ uwevwin rẹ onini rọyen, ohwo rẹ Ijipt na. 3 Onini rọyen da mrẹ nẹ Jihova vẹ Josẹf herọ, Jihova ji ruo rere kemu kemu ro ruẹ vwo shephiyọ kẹ.
4 Josẹf kọ mrẹ ẹroesiri rọyen ọkieje, ọ da rhe dia odibo rọ vwẹroso. O de vwo mu vwẹ enu rẹ uwevwin rọyen, o de phi kemu kemu ro vwori ejobi phiyọ obọ rọyen. 5 Vwo nẹ ọke rọ vwọ reyọ vwo mu vwẹ enu rẹ uwevwin rọyen, ro ji vwo phi erọnvwọn eje ro vwori phiyọ obọ rọyen, Jihova ko ku ebruphiyọ kuẹ uwevwin rẹ ohwo rẹ Ijipt na fikirẹ Josẹf, ebruphiyọ ri Jihova da rhe dia enu rẹ erọnvwọn ejobi ro vwori vwevunrẹ uwevwin na kugbe evunrẹ aghwa. 6 Ukuotọ rọyen ọ da yanjẹ erọnvwọn ejobi ro vwori vwo, vwẹ obọ ri Josẹf, ọ rha davwerhọ rẹ emu vuọvoo jokparẹ emu rọ ria. Vwọba, Josẹf de rhi te ọshare, o de ji vwo erhuvwu.
7 Asaọkiephana rẹ enana vwọ wan nu, aye rẹ onini rọyen ko nẹ Josẹf, ọ da ta: “Nene uvwe vwerhẹn.” 8 Ẹkẹvuọvo ọ da sen, ọ da ta kẹ aye rẹ onini rọyen: “Onini mẹ riẹn obo ri rhe vwe vwẹ uwevwin naa, o ji phi erọnvwọn ejobi ro vwori phiyọ obọ mẹ. 9 O vwo ohwo vuọvo rọ rho nọ vwẹ vwevunrẹ uwevwin nanaa, o ji si orọnvwọn vuọvo nu kẹ vwẹẹ jokparẹ owẹwẹ, kidie wẹwẹ aye rọyen. Ọtiọyena kẹ mavọ mi se vwo ru emu ọbrabra rode nana, rere mi ru umwemwu so Ọghẹnẹ?”
10 Ọtiọyena nẹ ẹdẹ ra ro ẹdẹ kọyen ọ vwọ ta ota kẹ Josẹf, jẹ ọ rhọnvwe nene vwerhẹn kakaka yẹrẹ nene diaa. 11 Ẹkẹvuọvo ẹdẹ ọvo rẹ Josẹf vwo kpo evunrẹ uwevwin na re ruiruo rọyen, idibo rẹ evwruwevwin na vuọvo hẹ evunrẹ uwevwin naa. 12 O de shabọ phiyọ ewun rọyen, ọ da ta: “Nene uvwe vwerhẹn!” Ẹkẹvuọvo ọ da yanjẹ ewun rọyen vwo vwẹ obọ rọyen, ọ da djẹ ro otafe. 13 Ugege rọ vwọ mrẹ nẹ ọ yanjẹ ewun rọyen vwo vwẹ obọ rọyen je djẹ ro otafe, 14 o de kperi se eshare rẹ uwevwin rọyen, ọ da ta kẹ ayen: “Nighere! Ọ reyọ ohwo ri Hibru nana bru avwanre rhe rere ọ vwẹ avwanre jehwẹ. O bru vwe rhe rhi nene uvwe vwerhẹn, ẹkẹvuọvo mi de kperi vẹ urhuru ọgangan. 15 Ugege ro vwo nyo vwe re me vwọ kpare urhuru mẹ kpenu, ri mi vwo kperẹ gangan, ọ da yanjẹ ewun rọyen vwo kẹ vwẹ, ọ da djẹ ro otafe.” 16 Ọyena vwọ wan nu, aye na de mu ewun ri Josẹf kẹrẹ oma bẹsiẹ rẹ onini rọyen vwọ rhe uwevwin rọyen.
17 Ọ da je vuẹ orọnvwọn vuọvo na, nẹ: “Odibo ri Hibru ru wọ reyọ bru avwanre rhe na, bru vwe rhe rhe vwẹ ovwẹ jehwẹ. 18 Ẹkẹvuọvo ugege re me vwọ kpare urhuru mẹ kpenu ri mi vwo kperẹ, ọ da yanjẹ ewun rọyen vwo kẹrẹ ovwẹ, ọ da djẹ ro otafe.” 19 Ọke rẹ onini rọyen ghwe vwo nyo eta rẹ aye rọyen ta kẹ nẹ: “Enana yen erọnvwọn rẹ odibo wẹn ru vwe,” ophu de muo gangan. 20 Ọtiọyena onini ri Josẹf da reyọ, o de muo phiyọ uwodi, asan re muẹ ihwo rẹ ovie na muru phiyọ, ọ da dia evunrẹ uwodi na.
21 Ẹkẹvuovo Jihova ji nene Josẹf dia, ko dje ẹguọnọ rọyen ro jẹ rhẹriẹ vwọ kẹ, ọ je nẹrhẹ ọ mrẹ ẹroesiri rẹ onotu rẹ uwodi na. 22 Ọtiọyena onotu rẹ uwodi na da vwẹ Josẹf vwo mu vwẹ enu rẹ ihwo eje re mu phiyọ uwodi na, kemu kemu re ruẹ vwẹ etiyin, kọyen ohwo rọ nẹrhẹ e ruẹ ayen. 23 Onotu rẹ uwodi na rha davwerhọ rẹ orọnvwọn vuọvo rẹ Josẹf vwẹrotee, kidie Jihova vẹ Josẹf herọ, Jihova je nẹrhẹ kemu kemu ro ruẹ shephiyọ.