Ọbe rẹsosuọ ri Samuẹl

26 Ọke vwọ yan obaro, eshare ri Zif de bru Sọl rhe vwẹ Gibia, ayen da tanẹ: “Devid siomanu vwẹ ugbenu otete ri Hakaila, ro hirharoku Jẹshaimọn.”* 2 Ọtiọyena Sọl de vrẹn, ọ vẹ eshare rẹ Izrẹl 3,000 ra sanere de kpo aton ri Zif ra guọnọ Devid vwẹ aton ri Zif. 3 Sọl wonphiyọ* asan rọ kẹrẹ idjerhe na vwẹ ugbenu otete ri Hakaila ro hirharoku Jẹshaimọn. Devid dia aton na vwẹ ọke yena, o de nyo nẹ Sọl rhe aton na rhe guọnọ ọyen. 4 Ọtiọyena Devid de ji ihwo nẹ ayen ra bẹbẹ no sẹ Sọl ghene rhe. 5 Ọke vwọ yan obaro, Devid de kpo asan rẹ Sọl wonphiyọ na, Devid da mrẹ Sọl vẹ Abna ọmọ ri Nẹr, onotu rẹ otuofovwin rọyen re vwerhẹn; Sọl vwerhẹn vwẹ uherevie rẹ asan rẹ ayen wonphiyọ na vẹ ituofovwin na re gba riariẹ phiyọ. 6 Etiyin Devid da ta kẹ Ahimẹlẹk ohwo ri Hẹt kugbe Abishai ọmọ ri Zẹruya, oniọvo ri Joab nẹ: “Ono yen che nene uvwe kpo asan rẹ Sọl wonphiyọ na?” Abishai da kpahen nẹ: “Mi che nene uwe ra.” 7 Ọtiọyena Devid vẹ Abishai de kpo asan rẹ otuofovwin na hepha vwẹ ason, ayen da mrẹ Sọl rọ vwerhẹn vwẹ uherevie rẹ asan rẹ ayen wonphiyọ na vẹ oshuẹ rọyen ro duvwun phiyọ otọ kẹrẹ asan uyovwin rọyen; Abna vẹ otuofovwin na sherhẹn riariẹ phiyọ.

8 Abishai da ta kẹ Devid nẹ: “Ọghẹnẹ phi ọvweghrẹn wẹn phiyọ obọ wẹn nonẹna. Biko, juvwe vwẹ oshuẹ na duvwon muotọ obọ ọvo, mi che ruo abọ ivẹẹ.” 9 Ẹkẹvuọvo Devid da ta kẹ Abishai nẹ: “Wọ wan omaa, kidie ono yen sa kpare obọ rọyen vwọso ohwo rẹ Jihova jẹreyọ ro de jẹ abe ẹriọ?” 10 Devid da je ta: “Rẹ Jihova vwọ herọ na, Jihova komobọ cha teyọn hwe yẹrẹ ẹdẹ rọyen cha rhe, ko che ghwu, yẹrẹ o che kpo ofovwin, o mi ghwu. 11 Ọ cha vwerhen Jihova oma re me vwọ kpare obọ mẹ vwọso ohwo rẹ Jihova jẹreyọọ! Ọtiọyena biko, reyọ oshuẹ rọ kẹrẹ uyovwin rọyen na kugbe ochẹ rẹ ame na, rere a yanran.” 12 Ọtiọyena Devid da reyọ oshuẹ na kugbe ochẹ rẹ ame na re kẹrẹ asan uyovwin ri Sọl, ayen da yanran. Ohwo vuọvo mrẹ ayen yẹrẹ riẹn oborẹ ayen ruruu kidie ayen eje vwerhẹn, fikirẹ ovwerhẹn okokodo ri Jihova vwo mu ayen. 13 Ọtiọyena Devid de kpo ẹbẹre ro chekọ na, o de mudia enu rẹ ugbenu ro sheri kẹ asan rẹ Sọl hepha na.

14 Devid da kpare unu se otuofovwin na kugbe Abna ọmọ ri Nẹr, rọ vwọ tanẹ: “Abna, wo nyo vwe?” Abna da kpahen nẹ: “Wẹwẹ ono yen se ovie na?” 15 Devid da ta kẹ Abna nẹ: “Wẹ dia ọshare? Ono yen họhọ owẹ vwẹ Izrẹl? Diesorọ wọ rha rhẹrẹ ọrovwowe oviee? Kidie ọvo vwẹ usun rẹ isodje na rhere rhe teyen ọrovwowe ovie hwe. 16 Oborẹ wo ruru na yovwiriin. Rẹ Jihova vwọ herọ na, ofori nẹ wo ghwu, kidie wọ rhẹrẹ ọrovwowe rẹ Jihova jẹreyọ naa. Asaọkiephana gbe ni oma riariẹ, oshuẹ rẹ ovie na kugbe ochẹ rẹ ame na rọ kẹrẹ asan uyovwin rọyen na rhọ?”

17 Sọl de vughe urhuru ri Devid, ọ da tanẹ: “Ọyen urhuru wẹn, ọmọ mẹ Devid?” Devid da kpahen nẹ: “E, urhuru mẹ, ọrovwovwe ovie.” 18 Ọ da je tanẹ: “Diesorọ ọrovwovwe vwọ tua odibo rọyen, die yen mi ruru, umwemwu vọ yen mi ruru? 19 Biko, e jẹ ọrovwovwe ovie kerhọ rẹ eta rẹ odibo rọyen: Ọ da dianẹ Jihova yen kpare ẹwẹn wẹn vwọso ovwẹ, e jẹ o rhiabọreyọ* izobo rẹ eka mẹ. Ẹkẹvuọvo ọ da dianẹ ihworakpọ yen kpare ẹwẹn wẹn, e jẹ ekan dia vwọ kẹ ayen vwẹ obaro ri Jihova, kidie ayen djẹ vwẹ nonẹna mi vwo jẹ ẹkẹn evwo vwẹ uku ri Jihova, rẹ ayen vwọ tanẹ, ‘Yanran ra ga eghẹnẹ efa!’ 20 Asaọkiephana e jẹ ọbara mẹ suẹn totọ sherẹ kẹ obaro ri Jihovaa, kidie ovie rẹ Izrẹl yan phia ra guọnọ insẹti otete ọvo kerẹsiẹ ra da mrẹ nẹ ọ vwọtua ọhohowa rọhẹ enu rẹ igbenu.”

21 Etiyin Sọl da tanẹ: “Mi ru umwemwu. Rhivwin rhe, ọmọ mẹ Devid, me rha cha vwọtua wẹ ọfaa, kidie wo ni arhọ* mẹ ghanghanre nonẹna. Vwọrẹ uyota, mi ru uruemu rẹ ẹkpa, mi ji ru chọ mamọ.” 22 Devid da tanẹ: “Oshuẹ rẹ ovie na na. E jẹ ọvo vwẹ usun rẹ ighene eshare na yanrhe rhe reyọ. 23 Jihova yen ohwo rọ cha hwosa kẹ ohwo ọvuọvo fikirẹ ọvwata rọyen vẹ evun-ẹfuọn rọyen, kidie nonẹna, Jihova phi we phiyọ obọ mẹ, ẹkẹvuọvo me rhọnvwe kpare obọ mẹ vwọso ohwo rẹ Jihova jẹreyọọ. 24 Nighere! Kirobo rẹ arhọ* wẹn ghanre kẹ vwẹ nonẹna, e jẹ arhọ* mẹ je ghanre vwẹ ẹro ri Jihova, e jẹ o ji sivwin uvwe vwo nẹ ukpokpogho ejobi.” 25 Sọl da kpahen kẹ Devid nẹ: “E jẹ ebruba dia kẹ wẹ, ọmọ mẹ Devid. Vwọrẹ uyota, wo che ru emu ride, wo ji che phikparobọ.” Ọyena vwọ wan nu, Devid da yanran, Sọl de rhivwin kpo uwevwin rọyen.