Ọbe rẹsosuọ ri Samuẹl

25 Ọke vwọ yan obaro, Samuẹl de ghwu; Izrẹl eje da ghwomakoko rẹ ayen vwo vweri kẹ, ji sho phiyọ uwevwin rọyen vwẹ Rema. Ọyena vwọ wan nu, Devid de vrẹn, o de kpo aton ri Peran.

2 Asaọkiephana o vwo ọshare ọvo vwẹ Meọn ro ruiruo vwẹ Kamẹl.* Ọshare na feri mamọ; o vwo igodẹ 3,000 kugbe ẹvwe 1,000, o brẹ ẹton rẹ igodẹ rọyen vwẹ Kamẹl vwẹ ọke yena. 3 Odẹ rẹ ọshare na Nebal, odẹ rẹ aye rọyen ke rha Abigẹl. Aye na ohwo vẹ aghwanre, o ji vwo erhuvwu, ẹkẹvuọvo ọshare na rọ dia ohwo rẹ orua ri Kelẹb na djoma, o ji vwo orharhe uruemu. 4 Devid de nyo vwevunrẹ aton na nẹ Nebal brẹ ẹton rẹ igodẹ rọyen. 5 Ọtiọyena Devid de ji ighene eshare ihwe bro ra, Devid da ta kẹ ighene eshare na nẹ: “Ovwan kpo Kamẹl, ovwan de te asan ri Nebal, ovwan vwẹ odẹ mẹ vwọ nokpẹn rẹ oborẹ erọnvwọn hepha kẹ. 6 Ovwan me tanẹ, ‘E jẹ wọ dia akpọ kri, e jẹ o yovwin kẹ wẹ,* e jẹ o yovwin kẹ evwruwevwin wẹn, e jẹ o yovwin kẹ erọnvwọn eje ru wo vwori. 7 Asaọkiephana mi nyori nẹ wo brẹ ẹton rẹ igodẹ wẹn. Ọke rẹ isuigodẹ wẹn vẹ avwanre vwọ herọ, avwanre wan ayen omaa, o ji vwo emu vuọvo ro ghwru va ayen abọ vwẹ ọkieje rẹ ayen vwọ hẹ Kamẹl naa. 8 Nọ ighene eshare wẹn, ayen cha vuẹ wẹ. Jẹ ighene eshare mẹ mrẹ ẹroesiri vwẹ obọ wẹn, kidie avwanre rhere vwẹ ọke rẹ orẹ.* Biko vwẹ kemu kemu wo se siobọnu vwọ kẹ idibo wẹn vẹ ọmọ wẹn Devid.’”

9 Ọtiọyena ighene eshare ri Devid da yanran, ayen da vwẹ odẹ ri Devid vwọ vuẹ Nebal erọnvwọn nana eje. Ọke rẹ ayen vwọ ta nu, 10 Nebal da kpahen kẹ idibo ri Devid nẹ: “Ono yen Devid, ono yen ọmọ ri Jẹsi? Buebun rẹ idibo rẹ ọke nana djẹ jẹ inini rayen vwo. 11 Me gba vwẹ ibrẹdi mẹ, ame mẹ, kugbe eranvwe ri mi hweri vwọ kẹ ihwo ri brẹ ẹton rẹ igodẹ mẹ vwọ kẹ eshare re me riẹn asan rẹ ayen nurhee?”

12 Ọtiọyena ighene eshare ri Devid de rhivwin rhe, je niyẹnrẹn rẹ eta nana eje vwọ kẹ. 13 Ugege yena Devid da ta kẹ eshare rọyen nẹ: “E jẹ ohwo ọvuọvo gba ọlọkọ rọyen si ehun rọyen!” Ọtiọyena ayen eje da gba elọkọ rayen si ehun rayen, Devid da je gba ọlọkọ rọyen si ehun rọyen, omarẹ eshare 400 de nene Devid, eshare 200 de rhe mudia kẹrẹ eghwa na.

14 Vwẹ uvwre rẹ ọke nana, ọvo vwẹ usun rẹ idibo na da niyẹnrẹn kẹ Abigẹl, aye ri Nebal nẹ: “Nighere! Devid ji ikọn vwo nẹ obo aton na rhe rhi yeren onini rẹ avwanre, ẹkẹvuọvo ọ da vwẹ ekan vwọ họ ayen. 15 Eshare yena nabọ dje uruemu esiri kẹ avwanre, o vwo ọke vuọvo rẹ ayen vwọ wan avwanre omaa, orọnvwọn vuọvo ji ghwru va avwanre abọ vwẹ ọke ejobi rẹ avwanre vẹ ayen vwọ dia evunrẹ aghwa naa. 16 Ayen pha kerẹ igbẹhẹ rẹ ochọnvwe rọ riariẹ avwanre phiyọ te ason te uvo, vwẹ ọkieje rẹ avwanre vẹ ayen vwọ herọ, rẹ avwanre vwo suẹn ichuru na. 17 Asaọkiephana brorhiẹn rẹ oborẹ wo che ru, kidie o muẹro nẹ okpetu cha kẹ onini rẹ avwanre vẹ ihwo rẹ uwevwin rọyen eje, jẹ ohwo vuọvo sa ta ota kẹẹ kidie ọyen ohwo re che se vwo ru emuọvoo.”

18 Ọtiọyena Abigẹl de brokpakpa reyọ ibrẹdi 200, echẹ rẹ iwaini ride ivẹ, igodẹ iyorin ra va nure, ovwanvwọ rẹ siya* iyorin rẹ ibali ra vwọ tọn, ikeki rẹ rezin 100, kugbe ikeki ra vwẹ ifigi ọvo vwo ru 200, o de mu ayen eje phiyọ enu rẹ ekẹkẹtẹ. 19 Ọ da ta kẹ idibo rọyen nẹ: “Ovwan kobaro kẹ vwẹ; me cha vwọ kpahen ovwan.” Ẹkẹvuọvo ọ ta ota vuọvo kẹ Nebal ọshare rọyeen.

20 Ọ vwọ hẹ enu rẹ ekẹkẹtẹ gua yanran na, ugbenu ọvo herọ rọ nẹrhẹ Devid vẹ eshare rọyen re cha ẹbẹre rọyen na jẹmrẹ, ọ da vwa ayen siẹvuọvo. 21 Asaọkiephana Devid ta jovwo nẹ: “Kọyen me de rhẹrẹ erọnvwọn eje rẹ ọshare nana vwori vwẹ aton na kufia. O vwo orọnvwọn rọyen vuọvo ro ghwruruu, jẹ umwemwu kọyen ọ vwọ hwosa rẹ erhuvwu kẹ vwẹ. 22 E jẹ Ọghẹnẹ ru ọtiọyen kẹ ivwighrẹn ri Devid* je vwọ ba, siẹrẹ mi rhe hwe Nebal vẹ eshare rọyen eje* bẹsiẹ ọke vwo rhiee.”

23 Ọke rẹ Abigẹl vwọ mrẹ Devid, o de brokpakpa wontọ nẹ enu rẹ ekẹkẹtẹ na, o de shiguẹ, ọ da bọvwọn opharo rhuotọ vwẹ obaro ri Devid. 24 O de shiguẹ vwẹ asan awọ rọyen, ọ da ta: “Ọrovwovwe, jẹ ekan na dia uyovwin mẹ; jẹ odibo ọmọtẹ wẹn ta ota kẹ wẹ, rere wọ kerhọ rẹ eta rẹ odibo ọmọtẹ wẹn. 25 Biko, e jẹ ọrovwovwe davwerhọ ri Nebaal, ohwo re che se vwo ru emuọvoo na, kidie ọ ghwa hepha kirobo rẹ odẹ rọyen hepha. Nebal* yen odẹ rọyen, jẹ ọhọ evwo kpokpo. Ẹkẹvuọvo, mẹvwẹ rẹ odibo wẹn ọmọtẹ, mrẹ ighene eshare rẹ ọrovwovwe ji rhe naa. 26 Asaọkiephana ọrovwovwe, rẹ Jihova vwọ herọ, rẹ wọ* je vwọ herọ na, Jihova yen da wẹ obọ ji wo vwo jẹ abe rẹ ọbara ẹriọ, rẹ wo ji vwo jẹ obọ wẹn ẹ vwọ reihri na.* E jẹ ivwighrẹn wẹn kugbe ihwo re guọnọ sua omaẹwan kẹ ọrovwovwe dia kerẹ Nebal. 27 Asaọkiephana, e jẹ a vwẹ okẹ* nana rẹ odibo wẹn ọmọtẹ mu rhe ọrovwovwe na vwọ kẹ ighene eshare ri nene ọrovwovwe na. 28 Biko vwẹ oruchọ rẹ odibo wẹn ọmọtẹ vwo ghovwo, o vwo obo rọ wanree, Jihova cha nẹrhẹ uwevwin rẹ ọrovwovwe dia bẹdẹ, kidie ifovwin ri Jihova yen ọrovwovwe phiẹ, jẹ a je rhe mrẹ umwemwu vuọvo vwẹ obọ wẹn vwẹ uchọke ru wọ dia akpọ re naa. 29 Siẹrẹ ohwo de vrẹn vwọtua wẹ rere ọ reyọ arhọ* wẹn, a cha nabọ phare arhọ* rẹ ọrovwovwe je sẹro rọyen phiyọ ekpu rẹ arhọ vwẹ obọ ri Jihova Ọghẹnẹ wẹn, ẹkẹvuọvo o che do arhọ* rẹ ivwighrẹn wẹn kufia kerẹ ibiukuta ra vwẹ islingi* sa. 30 Ọke rẹ Jihova de ru emu esiri eje ro ve vwọ kẹ ọrovwovwe, rọ da reyọ vwo mu kerẹ osun vwẹ enu rẹ Izrẹl, 31 wọ rha cha viẹ oja yẹrẹ idiekpọvwẹ* vwẹ ubiudu wẹn kidie nẹ wo ku ọbara kuotọ ekuekuu, nẹ ọrovwovwe vwẹ obo rọyen reihrii.* Ọke rẹ Jihova de bruba kẹ ọrovwovwe, karophiyọ odibo wẹn ọmọtẹ.”

32 Ọtiọyena Devid da ta kẹ Abigẹl nẹ: “Ujiri dia kẹ Jihova Ọghẹnẹ rẹ Izrẹl, ohwo ro ji we rhe rhe vwa vwẹ nonẹna! 33 Ebruba dia kẹ wẹ fikirẹ aghwanre wẹn! Ebruba dia kẹ wẹ kidie wọ da vwẹ obọ ji nonẹna mi vwo jẹ abe rẹ ọbara ẹriọ, ri mi vwo jẹ obọ mẹ ẹ vwọ reihri.* 34 Ọ rha dia ọtiọyen jovwoo, rẹ Jihova Ọghẹnẹ rẹ Izrẹl rọ da vwẹ obọ ji ri mi vwo juwe oma ẹwan na vwọ herọ na, mane kẹ wo brokpakpa rhe vwa vwẹẹ, ọshare vuọvo* rhe chekọ vwẹ uwevwin ri Nebal bẹsiẹ ọke vwo rhiee.” 35 Ọtiọyena Devid da reyọ obo ro mu rhe na mie je ta kẹ nẹ: “Yan kpo uwevwin wẹn vwọrẹ ufuoma. Nighere, mi nyo oborẹ wọ tare, mi che ru oborẹ wọ yare na.”

36 Ọyena vwọ wan nu, Abigẹl de rhivwin bru Nebal, rọ ria je da kerẹ ovie vwẹ uwevwin rọyen, jẹ oma muo* vwerhan, ọ je da oma sha re. Abigẹl vuẹrẹ ota vuọvo bẹsiẹ ọke vwo rhiee. 37 Ọke vwo rhie, rẹ idi vwo nẹ Nebal ẹro re, aye rọyen da vuẹ erọnvwọn nana eje. Ubiudu rọyen da dia kerẹ ọ rẹ ohwo ro ghwuru, o de ghwu mu vwẹ asan ro sherhẹn kerẹ ukuta. 38 Omarẹ ẹdẹ ihwe vwọ wan nu, Jihova da ghwiẹ Nebal, o de ghwu.

39 Ọke rẹ Devid vwo nyo nẹ Nebal ghwure, ọ da tanẹ: “Ujiri dia kẹ Jihova, ohwo rọ chochọn mẹ vwo nẹ ehwẹjẹ ri Nebal, rọ je da odibo rọyen obọ ji ro vwo jẹ orọnvwọn ọbrabra vuọvo eruo, Jihova je nẹrhẹ Nebal vwẹ uyovwin rọyen ghwa oghwa rẹ umiovwo rọyen re!” Devid da vwẹ ovuẹ rhe Abigẹl nẹ ọyen guọnọ reyọ kerẹ aye. 40 Idibo ri Devid de bru Abigẹl rhe vwẹ Kamẹl, ayen da ta kẹ nẹ: “Devid ji avwanre bru we rhe rhe reyọ owẹ kerẹ aye rọyen.” 41 Ugege yena o de vrẹn, ọ da vwẹ uyovwin kpotọ, ọ da tanẹ: “Me choma me vwọ dia odibo rọ cha hworhẹ awọ rẹ idibo rẹ ọrovwovwe.” 42 Ọtiọyena Abigẹl de vrẹn kpakpata, ọ da ro ekẹkẹtẹ rọyen, jẹ idibo rọyen rẹ emetẹ iyorin vwẹ owọ yan nene vwẹ obuko; o de nene ikọn ri Devid na, ọ da rhe dia aye rọyen.

43 Devid je rọvwọn Ahinoam ro nẹ Jẹzriẹl rhe jovwo re, eya ivẹ na da rhe dia eya rọyen.

44 Ẹkẹvuọvo Sọl vwẹ ọmọtẹ rọyen Maikal, aye ri Devid, vwọ kẹ Paltai ọmọ ri Leish ro nẹ Galim rhe nure.