Ẹyano

2 Vwẹ uvwre rẹ ọke yena, ọshare ọvo vwẹ evwruwevwin ri Livae da rọvwọn ọmọtẹ ri Livae ọvo. 2 Aye na da mrevun, o de vwiẹ ọmọshare. Ọke rọ vwọ mrẹ obo ro vwo erhuvwu te, o de sionu emeranvwe erha. 3 Ọke ro rhe se sionu ọfaa, ọ da reyọ obere* ra vwẹ okankọn ri papairọs vwo ru, ọ da vwẹ bitumẹn vẹ orọnvwọn obiebi ọvo rọ họhọ ikota vwọ rharọ, o de mu ọmọ na phiyọ evun rọyen, o de muo phiyọ ohri rẹ ekankọn* rehẹ orhoma rẹ Urhie ri Nail. 4 Ẹkẹvuọvo oniọvo rọyen ọmọtẹ de mudia ugboko rọ vwọ mrẹ obo re cha phia kẹ.

5 Ọke rẹ ọmọtẹ ri Fero vwọ rhe họ vwẹ Nail na, jẹ idibo rọyen emetẹ yan vwẹ orhoma ri Nail na. Ọ da kparo mrẹ obere na vwẹ ohri rẹ ekankọn na. Ugege yena o de ji odibo rọyen ọmọtẹ yanran re muo rhe. 6 Ọke ro vwo rhie, ọ da mrẹ ọmọ na, jẹ ọmọshare na viẹ, aro rọyen da dọn, ẹkẹvuọvo ọ da ta: “Ọnana ọvo vwẹ usun rẹ emọ rẹ ihwo ri Hibru na.” 7 Ọtiọyena oniọvo rọyen ọmọtẹ da ta kẹ ọmọtẹ ri Fero: “Me sa yanran re se ọvo vwẹ usun rẹ eya ri Hibru na rhe rere ọ vwẹrote ọmọ na kẹ wẹ?” 8 Ọmọtẹ ri Fero da ta kẹ: “Yanran!” Ugege yena ọmọtẹ na da yanran re se oni rẹ ọmọ na rhe. 9 Ọmọtẹ ri Fero da ta kẹ: “Mu ọmọ nana yanran rere wọ vwẹrote kẹ vwẹ, me cha hwosa kẹ wẹ.” Ọtiọyena aye na de mu ọmọ na, ọ da vwẹrote. 10 Ọke rẹ ọmọ na vwọ rho re, o de reyọ rhe ọmọtẹ ri Fero, ọ da rhe dia ọmọ rọyen. O de se Mosis,* ọ da ta: “Kidie mi siro nẹ evunrẹ ame rhe.”

11 Asaọkiephana vwẹ ọke yena, Mosis vwo te omiragua re,* o de bru iniọvo rọyen ra rere ọ vwọ mrẹ obo ra gba ayen vwọ wian gangan te, ọ da mrẹ ohwo rẹ Ijipt ọvo ro hwe ohwo ri Hibru rọ dia ọvo vwẹ usun rẹ iniọvo rọyen. 12 Ọtiọyena, o vwo ni obonẹ ni obonẹ ọ mrẹ ohwo vuọvoo, ọ da teyen ohwo rẹ Ijipt na hwe, o de sionu vwevunrẹ ekpẹn.

13 Ẹkẹvuọvo vwẹ ẹdẹ rọ vwọ kpahọn ọ da yan phia, eshare ri Hibru ivẹ ke họnra. Ọtiọyena ọ da ta kẹ ọ ro ru chọ na: “Diesorọ wọ vwọ ghwiẹ ọrivẹ wẹn?” 14 Ọtiọyena ọ da kpahen: “Ono yen vwẹ owẹ mu osun kugbe oguẹdjọ vwọ kẹ avwanre? Gbanẹ wọ jiroro wọ vwọ teyen ovwẹ hwe kirobo ru wọ teyen ohwo rẹ Ijipt yena hwe?” Asaọkiephana oshọ ko muẹ Mosis, ọ da ta: “Vwọrẹ uyota, ihwo riẹn kpahen ota nana re!”

15 Fero de rhi nyo kpahọn, ọ da davwẹngba ro vwo hwe Mosis; ẹkẹvuọvo Mosis da djẹ nẹ asan ri Fero hepha, ọ da ra dia otọ ri Midian, o de chidia kẹrẹ orhare ọvo. 16 Asaọkiephana orherẹn ri Midian vwo emetẹ ighwrẹn, enana de rhi vo ame rere ayen vo asan re ku ame rẹ eranvwe na phiyọ vọn vwọ kẹ ichuru rẹ ọsẹ rayen. 17 Ẹkẹvuọvo kirobo rẹ ayen ruẹ jovwo, isuigodẹ na da rhe rhe djẹ ayen. Ọtiọyena Mosis de vrẹn ọ da cha eya na uko,* ọ da vwẹ ame kẹ ichuru rayen. 18 Ọke rẹ ayen vwo bru ọsẹ rayen Ruẹl* rhe uwevwin, o de kperi: “Mavọ we ruro wan ovwan vwọ fobọ te uwevwin nonẹna?” 19 Ayen da kpahen: “Ohwo re Ijipt ọvo yen sivwin avwanre nẹ abọ rẹ isuigodẹ na, ọ tobọ vo ame kẹ avwanre ji vwẹ ame kẹ ichuru na.” 20 Ọ da ta kẹ emetẹ rọyen: “Kẹ tivọ yen ọ hepha? Diesoro ovwan vwọ yanjẹ ọshare na vwo? Ovwan se rhe, rere o se vwo nene avwanre riemu.” 21 Ọyena vwọ wan nu, Mosis da rhọnvwe nẹ ọyen che nene ọshare na dia, ọ da vwẹ ọmọtẹ rọyen Zipora kẹ Mosis rọvwọn. 22 Ọke vwọ yanran na o de vwiẹ ọmọshare, o de se Gẹshọm,* kidie ọ tare, “Me rhe dia ọrhorha vwẹ otọ ọrhorha re.”

23 Ọke grongron vwọ wan nu,* ovie rẹ Ijipt de ghwu, ẹkẹvuọvo ihwo rẹ Izrẹl je guan fikirẹ ẹdia rẹ eviẹn rẹ ayen hepha, ayen je viẹ phia vwọrẹ enuebro, oviẹ rayen vwọ kẹ ukẹcha fikirẹ ẹdia rẹ ọviẹn na ko brẹ Ọghẹnẹ rẹ uyota na ra. 24 Ọke vwọ yanran na Ọghẹnẹ de nyo enuebro rayen, Ọghẹnẹ da karophiyọ ọphọ rọ vẹ Ebraham, Aizik, kugbe Jekọp rere. 25 Ọghẹnẹ da tẹnrovi ihwo rẹ Izrẹl; Ọghẹnẹ de vwo oniso rayen.