Jẹnẹsis

14 Vwẹ ọke yena, Amrafẹl yen ovie ri Shaina, Eriọk yen ovie rẹ Ẹllesa, Kẹdolahoma yen ovie rẹ Ilam, Taida kọyen rha ovie ri Goim. 2 Ivie nana da kpare ofovwin bru Bira ovie ri Sọdọm, Besha ovie ri Gomora, Shainab ovie rẹ Adma, Shẹmiba ovie ri Zeboim, kugbe ovie ri Bila, kọyen Zoa. 3 Enana ejobi de ku isodje rayen kugbe vwẹ Iyara* ri Sidim, kọyen Abadi rẹ Ughwanka* na.

4 Ayen ga Kẹdolahoma vwẹ ẹgbukpe 12, ẹkẹvuọvo ayen de gbevwọsuọ vwẹ ukpe rẹ 13 na. 5 Ọtiọyena vwẹ ukpe rẹ 14 na, Kẹdolahoma vẹ ivie re vẹ ọyen gba herọ na da rhe, ayen de phi ihwo ri Rẹfeim kparobọ vwẹ Ashterọt-kaneim, ihwo ri Zuzim vwẹ Ham, ihwo rẹ Imẹm vwẹ Sheva-kiriateim, 6 kugbe ihwo ri Họ vwẹ ugbenu rayen ri Siẹ rhirin re te Ẹl-peran rọhẹ obo aton na. 7 Ayen de kuomarhẹriẹ, ayen da rhe Ẹn-mishpat, kọyen Kedẹsh, ayen de phi ọsoso rẹ ekogho rẹ ihwo rẹ Amalẹk eje kparobọ, ọtiọyen ji te ihwo rẹ Amọ re dia Hazazọn-tema.

8 Asaọkiephana ovie ri Sọdọm de kpo Iyara* ri Sidim, ọ vẹ ovie ri Gomora, ovie rẹ Adma, ovie ri Zeboim, kugbe ovie ri Bila, kọyen Zoa, ayen da tẹnrẹn urhiẹ rẹ ayen vwo nene ayen phi ofovwin, 9 rẹ ayen vwo nene Kẹdolahoma ovie rẹ Ilam, Taida ovie ri Goim, Amrafẹl ovie ri Shaina, kugbe Eriọk ovie rẹ Ẹllesa phi ofovwin—ivie ẹne vwọso iyorin na. 10 Asaọkiephana Iyara* ri Sidim vọnre vẹ ikpotọ ri bitumẹn, ivie ri Sọdọm vẹ Gomora ke davwẹngba rẹ ayen vwọ djẹ vabọ, ayen de she phiyọ evun rayen, ihwo ri chekọ da djẹ kpo ekogho rẹ igbenu na. 11 Ọtiọyena ihwo ri phikparobọ na da ghwẹ ekuakua ri Sọdọm vẹ Gomora eje reyọ, ọtiọyen ji te emuọre rayen eje, ayen da yanran. 12 Ayen ji mu Lọt, ọmọ rẹ oniọvo rẹ Ebram rọ dia Sọdọm, ọtiọyen ji te ekuakua rọyen, ayen da yanran.

13 Ọyena vwọ wan nu, ọshare ọvo rọ djẹ vabọ da rhe vuẹ Ebram, ohwo ri Hibru na. Ọke yena jẹ ọ dia* kẹrẹ irhe ride ri Mamre, ohwo rẹ Amọ, oniọvo rẹ Ẹshkọl kugbe Ena. Eshare nana igbeyan rẹ Ebram. 14 Ọtiọyena Ebram de nyo nẹ e mu ohwo rẹ orua* rọyen. O de koko eshare rọyen re ton ona rẹ ofovwin, idibo 318 re vwiẹre vwẹ uwevwin rọyen, ọ da vwọtua ayen re te Dan. 15 Vwevunrẹ ason, ọ da ghare eshare rọyen, ọ vẹ idibo rọyen de nene ayen họnre, ayen de phi ayen kparobọ. Ọ da vwọtua ayen rhirin re te Hoba, rọhẹ ẹbẹre rẹ obohwẹre ọnre ri Damaskọs. 16 O de mie ayen ekuakua na ejobi, ọ da je reyọ Lọt, oniọvo rọyen, ekuakua rọyen, eya na, kugbe ihwo ri chekọ na.

17 Ebram vwo phi Kẹdolahoma kugbe ivie re vẹ ọyen gba herọ kparobọ ji rhivwin rhe nu, ovie ri Sọdọm de bru Ebram ra vwẹ Iyara* ri Sheva, kọyen Iyara rẹ Ovie na. 18 Mẹlkizẹdẹk ovie ri Selẹm da vwẹ ibrẹdi vẹ iwaini rhe; ọyen orherẹn rẹ Ọghẹnẹ ro Me Kpenu na.

19 Ọtiọyena o de bruba kẹ, ọ da ta:

Ebram da vwẹ ẹkẹn ọvo rẹ ẹkẹn ihwe rẹ erọnvwọn ejobi kẹ.

21 Ọyena vwọ wan nu, ovie ri Sọdọm da ta kẹ Ebram: “Kẹ vwẹ ihwo* na, ẹkẹvuọvo reyọ ekuakua na kẹ oma wẹn.” 22 Ẹkẹvuọvo Ebram da ta kẹ ovie ri Sọdọm: “Me kpare obọ mẹ vwo duvwun iyorin vwẹ odẹ ri Jihova Ọghẹnẹ ro Me Kpenu na, Ohwo rọ ma odjuvwu vẹ otọrakpọ na, 23 nẹ me cha reyọ orọnvwọn wẹn vuọvoo, vwo nẹ oruru re te ufi rẹ isabatu, rere wo vwo jẹ tanẹ, ‘Mẹvwẹ yen nẹrhẹ Ebram fe.’ 24 Me cha reyọ emu vuọvoo jokparẹ oborẹ ighene eshare na rere. Vwọ kẹ ẹkẹn rẹ eshare ri nene uvwe ra na, Ena, Ẹshkọl, kugbe Mamre—e jẹ ayen reyọ ẹkẹn rayen.”